އިންޑިއަން ސުޕަ ލީގު (އައިއެސްއެލް)ގެ ކްލަބު ކެރެލާ ބްލާސްޓާސް، ޔޫއޭއީގެ ކުޅިވަރުގެ އެކިއެކި މަސައްކަތާއި، ކުޅިވަރުގެ ދާއިރާގެ ޓެކްނޮލޮޖީއާ ގުޅޭ ކުންފުންޏެއް ކަމަށްވާ އަލް ފުރްސާނަށް ވިއްކާލަން ނިންމައިފިއެވެ.

އައިއެސްއެލްގެ ކެރަލާ ބްލާސްޓާސްއަކީ މީގެ ކުރިން ހައިދްރައާބާދު ކުންފުންޏެއް ކަމަށްވާ މެގްނަމް ގްރޫޕްގެ ކްލަބެކެވެ. އެ ކުންފުންޏާއެކު ޝެއިހް އަހުމަދު ބިން ފައިސަލް އަލް ގާސިމީ ލީޑް ކުރާ ފުރްސާން އެއްބަސްވުމަކަށް އައިސްފައި ވަނީ ކެރެލާ ބްލާސްޓާސްގެ 100 ޕަސެންޓް ހިއްސާ ވިއްކާލުމަށެވެ. ޝެއިހް އަހުމަދު ބިން ފައިސަލްއަކީ ދުބާއީގެ ޝާރްޖާގެ ޝާހީ އާއިލާއަށް ނިސްބަތްވާ ފަރާތެކެވެ.

އިންޑިއާއިން ނޫސްތައް ބުނެފައި ވަނީ ދެ ކުންފުނިން އެއްބަސްވުމަކަށް އައިސްފައިވާ ނަމަވެސް، އެ ޑީލްގެ ހުރިހާ ކަމެއް ނިމެން އަށްވަރަކަށް މަސް ދުވަސް ނަގާނެ ކަމަށެވެ. އެހެން ނަމަވެސް ކޮޗިންނަށް ނިސްބަތްވާ ކެރެލާ ބްލާސްޓާސްގެ ކަންކަމާ 2026-27 ވަނަ އަހަރު ސީޒަނުން ފެށިގެންވެސް ހަވާލުވާނީ ފުރްސާނެވެ.

ކެރެލާ ބްލާސްޓާސްއިން އަންނަ ސީޒަނަށް ތައްޔާރުވަމުންދާ އިރު، އާ ކޯޗު އެޝްލީ ވެސްޓްވުޑްގެ ކޯޗުކަމުގައި އެފްސީ މަދްރާސް ފެސިލިޓީގައި އެޓީމުން ދަނީ ތަމްރީނުތައް ކުރިއަށް ގެންދަމުންނެވެ. ހަބަރުތައް ބުނެފައި ވަނީ ކްލަބަށް އަލަށް ސޮއިކުރާ ނަންތައް ވަރަށް އަވަހަށް އިއުލާނު ކުރާނެ ކަމަށެވެ.

ކެރެލާ ބްލާސްޓާސްއިން މި ސީޒަނުގެ ހޯމް މެޗުތައް ކުޅެން ނިންމާފައި ވަނީ ކޮޗިންގައެވެ. އެޓީމަށް މިވަގުތު ރަސްމީ އަމިއްލަ ސްޓޭޑިއަމެއް ނެތް ނަމަވެސް މެޗުތައް ކުޅޭނީ ޖަވާހަރްލާން ނެހްރޫ ސްޓޭޑިއަމްގައެވެ. އެއީ ކުއްޔަށް ހިފައިގެން ވަކި އެއްބަސްވުމެއްގެ ދަށުންނެވެ.

އާ ވެރިން، އަލް ފުރްސާންއިން ކެރަލާ ބްލާސްޓާސްގެ އޮޕަރޭޝަންސްތައް ހިންގަން ހަވާލުކޮށްފައި ވަނީ އޮފިއޯ ސްޕޯޓީއާއެވެ. އެއީ އިންޑިއާ ކުންފުންޏެކެވެ. ކެރެލާ ބްލާސްޓާސްގެ ހިންގުން ދުވަހުން ދުވަހަށް ބަލާނީ އޮފިއޯގެ ސީއީއޯ ތަމީމް އަންވަރާއި ކޯ ފައުންޑާ ޝަރާހް ކުނިޔިލްއެވެ.

އިންޑިއާ ނޫސްތަކުން ބުނެފައި ވަނީ ކެރެލާ ބްލާސްޓާސްގެ އާ ވެރިން، "ޕްރޮޖެކްޓް ބްލާސްޓާސް" ގެ ނަމުގައި ކްލަބުގެ ކަންކަން އެއްކޮށް ބަދަލުކޮށްލުމުގެ ޕްރޮޖެކްޓެއް އިއުލާނުކުރަން ތައްޔާރުވެފައިވާ ކަމަށެވެ. އެގޮތުން އިންފްރާސްޓްރަކްޗާގެ ކަންކަންވެސް އޭގައި ހިމެނޭ ކަމަށް ނޫސްތައް ބުނެއެވެ.