ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް) ގެ ކުއްލިއްޔާ އޮފް ޝަރީއާ އެންޑް ލޯ އަދި އައިޔޫއެމް ލޯ ސޮސައިޓީ ގުޅިގެން، ގެވެށި އަނިޔާގެ ގާނޫނާއި ތަންފީޒުކުރުމާ ގުޅޭ ހާއްސަ ޕެނަލް ޑިސްކަޝަނެއް ބާއްވައިފިއެވެ.

އައިޔޫއެމުން މިއަދު ނެރުނު ނޫސްބަޔާނެއްގައި ބުނެފައިވާ ގޮތުގައި އެ ޔުނިވާސިޓީގެ ހޯލުގައި ރޭ 8:00 ގައި ބޭއްވި މި ބައްދަލުވުމުގެ މައިގަނޑު މަގުސަދަކީ ގެވެށި އަނިޔާ ހުއްޓުވުމުގެ ގާނޫނު ތަންފީޒުކުރުމުގައި އަމަލީ ގޮތުން ދިމާވާ ގޮންޖެހުންތަކާއި، ގާނޫނާއި އަމަލީ މައިދާނާ ދެމެދު ހުރި ފަރަގުތަކާމެދު ކަމާބެހޭ މުއައްސަސާތަކުގެ މެދުގައި މަޝްވަރާކޮށް ހޭލުންތެރިކަން އިތުރުކުރުމެވެ.

"ޑޮމެސްޓިކް ވަޔަލަންސް ލޯ އެންޑް އެންފޯސްމަންޓް: ގެޕްސް ބިޓްވީން ލޯ އެންޑް ޕްރެކްޓިސް" ގެ ނަމުގައި ކުރިއަށްގެންދިޔަ މި ޕެނަލް ޑިސްކަޝަންގައި ކަމާ ގުޅުންހުރި ދާއިރާތަކުގެ ތަޖުރިބާކާރު ބޭފުޅުން ވަނީ ޕެނަލިސްޓުންގެ ގޮތުގައި ބައިވެރިވެވަޑައިގެންފައެވެ. އޭގެ ތެރޭގައި ފެމިލީ ކޯޓުގެ ގާޒީ މައީޝާ ޔޫސުފް ސަމީރާއި، ޕްރޮސެކިއުޓާ ޖެނެރަލްގެ އޮފީހުގެ ސީނިއާ ޕަބްލިކް ޕްރޮސެކިއުޓާ އާމިނަތު ޝަހާމާ ހިމެނިވަޑައިގަންނަވައެވެ. މީގެ އިތުރުން ފެމިލީ ޕްރޮޓެކްޝަން އޮތޯރިޓީގެ ލީގަލް އެންޑް ޕޮލިސީ ޑިރެކްޓަރު ހަދީޖާ އަރީޝާއާއި، މޯލްޑިވްސް ޕޮލިސް ސާވިސްގެ އިންސްޕެކްޓާ އޮފް ޕޮލިސް ހަސަން ޝަރީފް ވެސް މި ޕެނަލްގައި ބައިވެރިވެވަޑައިގެންނެވިއެވެ.

މި ޕެނަލް ޑިސްކަޝަން މޮޑަރޭޓްކޮށްދިނީ އައިޔޫއެމްގެ ކުއްލިއްޔާ އޮފް ޝަރީއާ އެންޑް ލޯގެ ދަރިވަރު ފާތިމަތު ސާނިހާ މުހައްމަދެވެ.

މި ބައްދަލުވުމުގައި، ގެވެށި އަނިޔާގެ މައްސަލަތައް ފުލުހުންނަށް ރިޕޯޓުކުރުމުން ފެށިގެން، ތަހުގީގު މަރުހަލާއާއި، ދައުވާ އުފުލުމާއި، ޝަރީއަތުގެ މަރުހަލާގެ އިތުރުން އަނިޔާ ލިބޭ ފަރާތްތަކަށް ރައްކާތެރިކަން ފޯރުކޮށްދިނުމުގައި ދިމާވާ ދަތިތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނު ކަމަށް އައިޔޫއެމްގެ ނޫސްބަޔާނުގައި ފާހަގަކޮށްފައިވެއެވެ. އަދި މިފަދަ މައްސަލަތައް ހައްލުކުރުމަށް މުއައްސަސާތަކުގެ މެދުގައި ގުޅުން ބަދަހިކުރުމުގެ މުހިންމުކަން ޕެނަލިސްޓުން ފާހަގަކުރެއްވިއެވެ.