ވަޒީފާއާބެހޭ ޓްރައިބިއުނަލަށް ހުށަހަޅާ މައްސަލަތަކަށް ޖަވާބުދާރީވުމަށް މައްސަލަ ރައްދުވާ ފަރާތަށް، އިތުރުކޮށްދޭ މުއްދަތުގައި ޖަވާބުދާރީ ނުވާނަމަ، މައްސަލައަށް ޖަވާބުދާރީ ނުވީކަމުގައި ކަނޑައަޅައި، އެ ފަރާތުގެ ގައިރުހާޒިރުގައި މައްސަލަ ކުރިއަށްގެންދެވޭގޮތަށް ވަޒީފާއާބެހޭ ޓްރައިބިއުނަލްގެ ގަވާއިދަށް ބަދަލު ގެނެސްފިއެވެ.

ޓްރައިބިއުނަލްގެ ގަވާއިދުގައިވާގޮތުން އެތަނަށް މައްސަލަ ހުށަހަޅާ ފޯމް ބަލައިގަނެ، މައްސަލައެއްގެ ގޮތުގައި ރަޖިސްޓްރީ ކުރުމުން މައްސަލަ ހުށަހަޅާ ފޯމާއި، އެ ފޯމާއެކު ހުށަހަޅާފައިވާ ހެކި، މައްސަލަ ރައްދުވާ ފަރާތަށް ހިއްސާ ކުރާ ތާރީހުން ފެށިގެން 14 ދުވަހުގެ ތެރޭގައި މައްސަލަ ރައްދުވާ ފަރާތުން މައްސަލައިގެ ޖަވާބު ހުށަހަޅަންވާނެ އެވެ.

ނަމަވެސް ވެސް ޖަވާބު ހުށަހެޅުމަށް ދީފައިވާ މުއްދަތު އިތުރުކޮށްދިނުމަށް އެދޭނަމަ އެ މުއްދަތު ހަމަވުމުގެ ކުރިން ސަބަބާއެކު މުއްދަތު އިތުރުކޮށްދޭން ލިޔުމުން ޓްރައިބިއުނަލްގައި އެދެވޭނެއެވެ.

ގަވާއިދަށް އިސްލާހުތައް ގެނައުމުގެ ކުރިން އޮންނަނީ، އެގޮތަށް މުއްދަތު އިތުރުކޮށްދޭން ހުށަހަޅާ ސަބަބަކީ މަގުބޫލު ސަބަބެއްކަމަށް މައްސަލަ ބަލާ މަޖިލީހަށް ފެންނަ ނަމަ ހަތް ދުވަހަށްވުރެ އިތުރު ނުވާނެހެން މުއްދަތު އިތުރު ކުރެވިދާނެ ކަމަށެވެ.

ނަމަވެސް މި ފަހަރު ގަވާއިދަށް ގެނައި ބަދަލުގައި ހަތް ދުވަހުގެ މުއްދަތު އުނިކޮށް، ޖަވާބުދާރީ ވުމުގެ މުއްދަތު އިތުރު ކުރުުމުގެ އިހުތިޔާރު މައްސަލަ ބަލާ މަޖިލީހަށް ވަނީ ދީފައެވެ. އަދި އިތުރުކޮށްދޭ މުއްދަތުގައި ޖަވާބު ހުށަހަޅާފައި ނުވާނަމަ މައްސަލައަށް ޖަވާބުދާރީ ނުވީ ކަމަށް ކަނޑައަޅައި މައްސަލަ ރައްދުވާ ފަރާތުގެ ގައިރު ހާޒިރުގައި މައްސަލަ ކުރިއަށްގެންދަން ނިންމާފައިވާކަން އެ ފަރާތްތަކަށް އަންގަންވާނެ ކަމަށްވެސް ބުނެފައިވެއެވެ.

މި އިސްލާހު ގެނައުމުގެ ކުރިން އޮންނަނީ، މުއްދުގައި ޖަވާބުދާރީ ނުވެއްޖެ ނަމަ މައްސަލައިގެ އަޑުއެހުމެއް ތާވަލް ކުރަން ޖެހޭ ގޮތަށެވެ. އެ އަޑުއެހުުމުގައި ސަބަބާއެކު މައްސަލަ ރައްދުވާ ފަރާތުން އެދިއްޖެނަމަ އަނެއްކާވެސް ފަސް ދުވަހަށްވުރެ އިތުރު ނުވާނެގޮތަށް މުއްދަތު އިތުރުކުރެވޭގޮތަށެވެ.

ނަމަވެސް މި ފަަހަރު ގެނައި އިސްލާހުގައި އެބައިތައް ވަނީ ގަވާއިދުން އުނިކޮށްފައެވެ.

އޭގެ ބަދަލުގައި އިތުރަށްދޭ މުއްދަތުގައި ޖަވާބު ނުދީފިނަމަ ގައިރު ހާޒިރުގައި މައްސަލަ ކުރިއަށްގެންދެވޭ ގޮތަށް އޮތް ނަމަވެސް، މައްސަލައިގައި އަދުލުވެރި ނިންމުމަކަށް ވާސިލު ވުމަށްޓަކައި ބޭނުންވާ ލިޔެކިޔުމެއް، ނުވަތަ ރިކޯޑެއް، ނުވަތަ މައުލޫމާތެއް، ޓްރައިބިއުނަލުން ކަނޑައަޅާ މުއްދަތެއްގެ ތެރޭގައި ޓްރައިބިއުނަލަށް ހުށަހަޅަން، މައްސަލަ ރައްދުވާ ފަރާތުގެ މައްޗަށް އަމުރު ކުރުމުގެ އިހުތިޔާރު މި ގެނައި ބަދަލާއެކު މައްސަލަ ބަލާ މަޖިލީހަށް ވަނީ ދީފައެވެ.