ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި ހައްޔަރުކުރި ކުރީގެ ގައުމީ ވޮލީ ޓީމުގެ ކުޅުންތެރިޔާ އަހުމަދު ފާޒިލް 31އގެ ބަންދަށް އިތުރު 30 ދުވަސް ޖަހައިފިއެވެ.

ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސާއި ވ. އަތޮޅު ފުލުހުން ގުޅިގެން ހިންގި އޮޕަރޭޝަންގައި ފާޒިލް ހައްޔަރުކުރީ މިދިޔަ މަހުގެ 20 ވަނަ ދުވަހުއެވެ.

މި އޮޕަރޭޝަންގައި، ކެޔޮދޫގައި އޭނާ މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތު ކުރެވޭ ދެ ގެއެއް ބަލައިފާސްކޮށްފައިވެއެވެ. އެ ބަލައިފާސްކުރުމުގެ ތެރެއިން، މަސްތުވާތަކެތި ކަމަށް ބެލެވޭ 265.01 ގުރާމުގެ ތަކެތި ފެނިފައިވާ ކަމުގައިވެސް ފުލުހުންގެ ބުނެފައިވެއެވެ.

އެ މައްސަލައިގައި ފާޒިލްގެ ބަންދަށް ފުރަތަމަ ޖެހީ 10 ދުވަހެވެ. އޭގެ ފަހުން ބަންދުގެ މުއްދަތު އިތުރުކުރުމަށް ފަހު، އެ މުއްދަތު މިއަދަށް ހަމަވާތީ، އިއްޔެ އޭނާގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ވަނީ ބަންދަށް އިތުރު 30 ދުވަސް ޖަހައިފައެވެ.

ކޯޓު އަމުރުގައި، ފާޒިލްގެ ވަކީލު ވަނީ، މަސްތުވާތަކެތި ފެނުނު ގެއަކީ ފާޒިލް ދިރިއުޅޭ ގެ ނޫންކަން ބަޔާންކޮށްފައެވެ.

މި މައްސަލައިގައި ފުލުހުން ވަނީ ފާޒިލާ ދެކޮޅަށް ގިނަ ހެކިތަކެއް ހުށަހަޅައިފައެވެ. އޭގެ ތެރޭގައި އިންޓެލިޖެންސް ރިޕޯޓާއި، ސީންއަށް ދިޔަ ފުލުހުންގެ ބަޔާނާއި ފިންގާޕްރިންޓް އައިޑެންޓިފިކޭޝަން ނޯޓިސްއާއި ކުޑަކަމުދާތަކެތީގެ ތަހުލީލު ރިޕޯޓާއި މަސްތުވާތަކެތީގެ ތަހުލީލު ރިޕޯޓާއި މޯބައިލް ފޮރެންސިކް އެކްސްޓްރެކްޝަން ރިޕޯޓާއި އެކައުންސް ސްޓޭޓްމަންޓް ހިމެނެއެވެ.

މި މައްސަލަ ފުލުހުން ގެންދަނީ ތަހުގީގުކުރަމުންނެވެ.