ގައުމީ ވާޖިބު އަދާކުރުމުގައި ދެމިތިއްބައި ފުރާނަ ގެއްލޭ ފުލުހުންގެ އާއިލާތަކަށް، ފުލުހުންގެ ހިދުމަތުގެ ފަރާތުން ބޭސްފަރުވާގެ ކަންކަން ހަމަޖައްސައިދޭން ލާޒިމުވާ ގޮތަށް ފުލުހުންގެ ވަޒީފާގެ ގަވައިދަށް އިސްލާހު ގެނެސް، އެ އިސްލާހު ސަރުކާރުގެ ގެޒެޓުގައި މިރޭ ޝާއިއުކޮށްފިއެވެ.

އާ އިސްލާހުގައި ވާގޮތުން، ހިދުމަތުގައި ދެމިތިބޭ ފުލުހުންނާއި އެ މީހުންގެ އާއިލާތަކަށް ލިބިދޭ ބޭސްފަރުވާގެ އިނާޔަތްތައް، ވަޒީފާގެ ވާޖިބު އަދާކުރަނިކޮށް ނިޔާވާ ފުލުހުންގެ އާއިލާތަކަށްވެސް ދެމެހެއްޓެނިވި ގޮތެއްގައި ފޯރުކޮށްދޭން ޖެހޭނެއެވެ. މީގެ އިތުރުން، މިފަދަ ހިތާމަވެރި ހާދިސާތަކުގައި ނިޔާވާ އޮފިސަރުންގެ ޖަނާޒާ ހާއްސަ ރަސްމިއްޔާތެއްގެ ގޮތުގައި ބޭއްވުމުގެ އިހްތިޔާރުވެސް ގަވައިދުގެ ތެރެއިން ވަނީ ފަހިކޮށްދީފައެވެ.

ނަމަވެސް، އެގޮތަށް ހަމަޖައްސާނީ ހާދިސާ ހިނގި ގޮތާއި، މަރުވި ހާލަތުގެ އިތުރުން އެ މުވައްޒަފަކު އަދާކުރި ދައުރަށް ރިއާޔަތްކޮށް، ފުލުހުންގެ އެގްޒެކެޓިވް މެނޭޖްމަންޓް ބޯޑުން މައްސަލަ ދިރާސާކުރުމަށް ފަހު ނިންމާ ގޮތެއްގެ މަތިންނެވެ.

މި އަހަރުގެ ޖެނުއަރީ މަހު އޮޑިޓާ ޖެނެރަލްގެ އޮފީހުން އާންމުކުރި ތަފާސް ހިސާބުތަކަށް ބަލާއިރު، 2019 އިން 2024 ގެ ނިޔަލަށް ފުލުހުންނާއި އެ ފަރާތްތަކުގެ އާއިލާތަކުގެ ސިއްހީ ފަރުވާއަށް 618.9 މިލިއަން ރުފިޔާ ވަނީ ހޭދަކޮށްފައެވެ. އަދި ސިފައިންނާއި އެ ފަރާތްތަކުގެ އާއިލާތަކަށް 601 މިލިއަނަށް ވުރެ ގިނަ ރުފިޔާ ހޭދަކޮށްފައިވެއެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މި މުއްދަތުގައި އެވްރެޖްކޮށް ކޮންމެ އަހަރަކު ވެސް ފުލުހުންގެ ބޭސްފަރުވާގެ ހަރަދު 24 ޕަސަންޓް އަދި ސިފައިންގެ ހަރަދު 23 ޕަސަންޓް ވަނީ މައްޗަށް ގޮސްފައެވެ.