އިނގިރޭސި ޕްރިމިއާ ލީގުގެ މެންޗެސްޓާ ސިޓީ، ފައިނޭންޝަލް އުސޫލުތަކުން ބޭރުގައި ހިންގާފައިވާ ކަމަށް ބުނާ 115 މައްސަލަ އެ ކްލަބުގެ މައްޗަށް ސާބިތުވެފައިވާ ކަމަށް މައްސަލަ ބެލި މިނިވަން ކޮމިޝަނުން ނިންމާފައިވާކަން ޕްރިމިއާ ލީގުން ރަސްމީކޮށް އިއުލާނު ކޮށްފިއެވެ.

ސިޓީން މިދިޔަ ސީޒަން ހުސް އަތާ ނިންމާލި ނަމަވެސް، އޭގެ ކުރިން ހަތް ސީޒަނުގެ ތެރެއިން ހަ ސީޒަނުގެ ލީގު ނެގިއެވެ. އަދި 2022-23 ވަނަ އަހަރު ސިޓީން ޗެމްޕިއަންސް ލީގުވެސް ހޯދާފައިވާ އިރު، އެ ކްލަބުން ފައިނޭންޝަލް އުސޫލުތަކާ ހިލާފުވި މައްސަލަތައް އޮތުމުން، އެކަމަށް ފިޔަވަޅު ނޭޅި ކާމިޔާބީތައް ހޯދާތީ ފާޑުކިޔުން އަމާޒުވެފައިވެއެވެ.

ސިޓީގެ 115 މައްސަލައެއް މިނިވަން ކޮމިޝަނުން ބަލަން ފެށީ 2023 ވަނަ އަހަރު ފެބްރުއަރީ މަހުގައެވެ. އެ މައްސަލަތަކަކީ 2009 ވަނަ އަހަރުން ފެށިގެން 2018 ވަނަ އަހަރާ ދެމެދު ސިޓީން ހިންގާފައިވާ މުއާމަލާތްތަކުގެ މައްސަލަތަކެކެވެ.

މިނިވަން ކޮމިޝަނާ ހަވާލާ ޕްރިމިއާ ލީގުން ނެރުނު ސްޓޭޓްމެންޓްގައި ބުނެފައި ވަނީ މައްސަލަތައް ސާބިތުވުމުގެ އިތުރުން އެ މައްސަލަ ތަހުގީގުކުރުމަށް ސިޓީން އެއްބާރުލުން ނުދޭކަންވެސް ސާބިތުވެފައިވާ ކަމަށެވެ. ކޮމިޝަނުން ރަސްމީކޮށް ބުނެފައި ވަނީ ސިޓީން އެތައް ވަގު އެއްބަސްވުންތަކެއް ހަދައި، ސްޕޮންސަރުންނާއި ޕާޓްނަރުންގެ ފަރާތުން ލިބޭ އާމްދަނީއާއި ކްލަބުން ކުރި ހަރަދުތަކުގެ ތަފްސީލުތައްވެސް ބޮޑުކޮށް އޮޅުވާލާފައިވާ ކަމަށެވެ.

ކޮމިޝަނުން ބުނެފައި ވަނީ ސިޓީން ލިބުނު އާމްދަނީއާއި ހަރަދުގެ ތަފްސީލު 900 މިލިއަން ޕައުންޑްގެ އަދަދަކަށް އޮޅުވާލާފައިވާ ކަމަށެވެ. އޭގެ ސަބަބުން އެޓީމުގެ ޓްރާންސްފާތަކަށް ގިނައިން ފައިސާ ހަރަދުކުރުމަށް ސިޓީއަށް ފުރުސަތު ލިބިގެން ގޮސްފައިވާ އިރު، އޭގެ ތެރޭގައި ސިޓީގެ އޯނާޝިޕް ކުންފުނި، އަބޫ ދާބީ ޔުނައިޓެޑް ގްރޫޕް އިންވެސްޓްމެންޓް އެންޑް ޑިވެލޮޕްމެންޓް ލިމިޓެޑުން ދީފައިވާ ފަންޑުގެ އަދަދުތައްވެސް ހިމެނެއެވެ.

ސިޓީ މިހާރު ހިންގަމުން ދަނީ ޝެއިހް މަންސޫރުގެ އަބޫ ދާބީ ޔުނައިޓެޑް ގްރޫޕުންނެވެ. އޭނާ ސިޓީ ގަތީ 2008 ވަނަ އަހަރުއެވެ. އޭގެފަހުން ފައިސާގެ މުއާމަލާތްތައް ޕްރިމިއާ ލީގަށް ހުށަހެޅުމުގައިވެސް ވަގު ހަދައި، އަދަދުތައް އޮޅުވާލާފައިވާ ކަމަށްވެސް ކޮމިޝަނުން ބުނެފައިވެއެވެ. އަދި ޕްރިމިއާ ލީގާއި ޔޫއެފާގެ ފައިނޭންޝަން ފެއާ ޕްލޭ އުސޫލުތަކުން ބޭރުން ސިޓީން ހަރަދުކޮށްފައިވާ ކަމަށްވެސް ކޮމިޝަނުގެ ރިޕޯޓުގައި ވެއެވެ.

ސިޓީގެ މައްސަލައިގައި ޕްރިމިއާ ލީގުން މައްސަލަ ބަލަން ހަވާލުވި މިނިވަން ކޮމިޝަނުން 42 އަޑުއެހުން ބާއްވައިފައިވެއެވެ. އެ މައްސަލަ ބެލުމުގައި ދުވަސްތަކެއް ހޭދަވެފައިވާ އިރު، ޕްރިމިއާ ލީގުގެ ޗީފް ރިޗާޑް މާސްޓާސް ވިދާޅުވެފައި ވަނީ މައްސަލަ ދިގުލައިގެން ދިޔައީ އެކަމުގައި ޕްރިމިއާ ލީގުން އަދާކުރަން ޖެހޭ މިނިވަން ދައުރު ފުރިހަމައަށް އަދާކުރުމަށް ކަމަށެވެ. އަދި މައްސަލަ ތަފުސީލުކޮށް ބެލީ ސިޓީން ޕްރިމިއާ ލީގަށް އޮޅުވާލަމުން ދިޔަ ދިޔުން އެންމެ ފުރިހަމައަށް ހޯދުމަށް ކަމަށާއި، އެ މައްސަލަ ބެލުމުގައި ޕްރިމިއާ ލީގުން އަމަލުކޮށްފައި ވަނީ ވަކި ފަރާތަކަށް ނުޖެހި، ނަޒާހަތްތެރިކަމާއެކުގައެވެ.

ރިޗާޑްސް ވިދާޅުވީ ސިޓީގެ މައްސަލައަކީ މިހާތަނަށް ޕްރިމިއާ ލީގު ތާރީހުގައިވެސް އެންމެ ފާހަގަކުރެވުނު އޮޅުވާލުމުގެ މައްސަލަ ކަމަށާއި، މައްސަލައާ ގުޅިގެން އަޅަން ޖެހޭ ފިޔަވަޅުތައް އަޅާނެ ކަމަށެވެ. އަދި އެކަން އޮންނަ ގޮތަށް ސާފުކޮށް ކަންކަން ކުރިއަށް ގެންދާނެކަމުގެ ޔަގީންކަން ދޭ ކަމަށްވެސް ރިޗާޑްސް ވިދާޅުވިއެވެ.

ސިޓީއަށް އަޅާނެ ފިޔަވަޅުތައް އަދި ހާމަކޮށްފައި ނުވާ އިރު، ޕޮއިންޓް އުނިކުރުން، ޖޫރިމަނާ ކުރުން ނޫނީ ލީގުން ބޭރު ކުރުމަކީވެސް ސިޓީއަށް ދީފާނެ ބައެއް އަދަބުތަކެވެ. ސާބިތުވި މައްސަލަތަކުގައި ސިޓީން އިސްތިއުނާފުކުރަން މަސައްކަތް ފަށާފައިވާ ކަމަށްވެސް ނޫސްތައް ބުނެއެވެ.