ފީފާގެ ރިޒާވްގައި ހުރި ފައިސާއިން މެމްބަރު 211 ގައުމަށް، ކޮންމެ ގައުމަކަށް 10 މިލިއަން ޑޮލަރު ދޭން ޔޫއެފާއާއި ކޮންކެކަފްއިން ގޮވާލައި، އެކަމުގެ ޕްރޮޕޯސަލްއެއް ފޮނުވާފައިވުމާއެކު، އެކަން ކުރެވޭނެ ގޮތެއް ހޯދަން ރިވިއުއަކަށް ޖިއާނީ އިންފަންޓީނޯ އެދިލައްވައިފިއެވެ.

ފީފާގެ ރައީސް އިންފަންޓީނޯ މިވަގުތު ބޮޑު ޕްރެޝަރެއްގައި ހުރި އިރު، އޭނާއަށް މިފަހުން އެންމެ ބޮޑު ޕްރެޝަރަކަށްވީ ފީފާގެ މުބާރާތްތަކުގެ ހިއްސާ ވިއްކާލުމުގެ ޕްލޭނެއް ތަރުހީބު ނުލިބި ފެއިލްވުމެވެ. ފީފާ ފޯވަޑް އެންޓަޕްރައިސް (އެފްއެފްއީ) ގެ ނަމުގައި އިންފަންޓީނޯ ތައާރަފުކުރަން އުޅުނު ޕްލޭނަށް އެންމެ ފުރަތަމަ ނޫނެކޭ ބުނީ ޔޫއެފާއާއި ކޮންކެކަފްއިންނެވެ.

އެ ޕްލޭން ފެއިލްވުމާއެކު އިންފަންޓީނޯގެ ތާއީދު ކުޑަވެފައިވާ އިރު، އޭނާ ދަނީ ތާއީދު ހޯދަން މަސައްކަތް ކުރަމުންނެވެ. އަދި އިތުރު ދައުރަކަށް ފީފާގެ ރައީސްކަމަށް ކުރިމަތިލުމަށް އިންފަންޓީނޯ ވަނީ އިއުލާނުވެސް ކުރައްވައިފައެވެ.

ޔޫއެފާ ރައީސް އެލެކްސެންޑާ ޗެފެރިންނާއި ކޮންކެކަފްގެ ރައީސް ވިކްޓޯ މޮންޓަގްލިއާނީ ވަނީ އިންފަންޓީނޯއާ ދެކޮޅަށް ފާޅުގައި ވާހަކަ ދައްކަވާފައިވާ އިރު، އެ ދެ ރައީސުން ވަނީ އިންފަންޓީނޯއަށް ސިޓީއެއް ފޮނުއްވައިފައެވެ.

ސިޓީގައި ބުނެފައި ވަނީ 2023 އިން 2026 ވަނަ އަހަރާ ހަމައަށް ފީފާއަށް ލިބުނު އާމްދަނީން، ހަތަރު އަހަރުގެ ބަޖެޓް ނިންމާއިރު ރިޒާވްގައި 6 ބިލިއަން ޑޮލަރު އެބަހުރި ކަމަށެވެ. އެ ފައިސާ ހޭދަކުރަން ވީ ގައުމުތަކުގެ އިންފްރާސްޓްރަކްޗާ ރަނގަޅުކޮށް، ފުޓުބޯޅައަށް ހަރަދުކުރަން ކަމަށް ސިޓީގައި ބުނެފައިވާ އިރު، ކޮންމެ ގައުމަކަށް 10 މިލިއަން ޕައުންޑް ދޭން އެދިފައިވެއެވެ.

ފީފާގެ އިންވެސްޓްމަންޓް ޕްލޭނަށް ތާއީދު ހޯދުމަށް އިންފަންޓީނޯ ވަނީ ގައުމުތަކަށް ފައިސާ ދޭން ވައުދުވެސް ވެފައެވެ. އެ ފަހަރު އެ ޕްލޭނަށް ވަކި މުއްދަތެއްގެ ކުރިން ތާއީދުކޮށްފިނަމަ، 15 މިލިއަން ޕައުންޑް އެ ގައުމަކަށް ދޭނެކަމަށް އިންފަންޓީނޯ ވައުދުވިއެވެ.

ޔޫއެފާއާއި ކޮންކެކަފްއިން ލިޔުނު ސިޓީގައި ބުނެފައި ވަނީ 2030 ވަނަ އަހަރާ ހަމައަށް ފީފާގެ ހިންގުން ރަނގަޅުކުރަން ރަނގަޅު އަދަދެއްގެ ފައިސާ މިހާރުވެސް ހުރި އިރު، ގައުމުތަކުގައި އިންފްރާސްޓްރަކްޗާ ތަރައްގީކޮށް، ރަނގަޅަށް ހިންގުން ހަރުދަނާ ކުރުމަށް ފައިސާ ބޭނުންވެފައިވާ ކަމަށެވެ.

އިތުބާރު ނޫސްތަކުން ބުނެފައި ވަނީ ގައުމުތަކަށް އިތުރަށް ފައިސާ ދޭން ހިޔާލު ހޯދުމަށް އަންނަ އޮކްޓޯބަރު މަހު އޮންނަ ފީފާ ކައުންސިލް ބައްދަލުވުމަށް ހުށަހަޅަން އިންފަންޓީނޯ ނިންމަވާފައިވާ ކަމަށެވެ. ނޫސްތަކުން ބުނެފައި ވަނީ ގައުމުތަކަށް އިތުރަށް ފަންޑިން ދޭނެ އަދަދެއް އަދި ސީދާ ކަނޑައަޅާފައި ނުވާ ނަމަވެސް، އިންފަންޓީނޯ މަސައްކަތް ކުރައްވަނީ 2.1 ބިލިއަން ޑޮލަރު ރިޒާވްއިން ރިލީސް ކުރުމަށް ކަމަށެވެ.

މީގެ ކުރިންވެސް ފީފާއިން ގައުމުތަކަށް އެކި ޕްރޮޖެކްޓްތަކުގައި ފައިސާގެ އެހީތެރިކަން ދީފައިވާ އިރު، ރާއްޖެއަށްވެސް ފީފާ ފޯވަޑް ޕްރޮޖެކްޓްގެ ދަށުން އެހީތައް ދީފައިވެއެވެ. އެހެން ނަމަވެސް އޭރު ރާއްޖެއަށް ދިން ފަންޑިންގެ ބޭނުން ނަހަމަ ގޮތުގައި ހިފުމާއެކު، ފުޓުބޯޅައިގެ ތަރައްގީއަށް ވަނީ ހުއްޓުމެއް އައިސްފައެވެ.