މިއަހަރުގެ ސާފް ޗެމްޕިއަންޝިޕްގެ ތަށި ދިފާއުކުރުމަށް ނުކުންނަ އިންޑިއާއިން، ބަންގްލަދޭޝްގައި ނޮވެމްބަރު މަހު އޮންނަ މުބާރާތަށް ޒުވާން ސްކޮޑެއް ފޮނުވަފާނެ ކަމަށް މީޑިއާތައް ބުނެފިއެވެ.

މީޑިއާތަކުން ބުނެފައި ވަނީ ސާފް ޗެމްޕިއަންޝިޕަށް އިންޑިއާއިން 23 އަހަރުން ދަށުގެ ޓީމު ފޮނުވަން ވިސްނަނީ، ސާފް ޗެމްޕިއަންޝިޕް އޮންނަ ދުވަސްވަރު އެގައުމުގެ ސީނިއާ ޓީމުން އެކުވެރިކަމުގެ ދެ މެޗެއް ރާވާފައި އޮތުމުންނެވެ. އިންޑިއާއިން ރާވާފައި އޮތީ ނިއު ޒީލެންޑާ ދެކޮޅަށް އެކުވެރިކަމުގެ ދެ މެޗު ކުޅުމަށެވެ.

މިއަހަރު ބަންގްލަދޭޝްގައި ބާއްވަން ނިންމާފައިވާ ސާފް ޗެމްޕިއަންޝިޕް ފަށާނީ ނޮވެމްބަރު ފަސްވަނަ ދުވަހުއެވެ. އަދި މުބާރާތް ނިމޭނީ 17 ވަނަ ދުވަހުއެވެ. ސާފް ޗެމްޕިއަންޝިޕްގެ އެންމެ ފަހުގެ ދެ މުބާރާތް ވެސް ކާމިޔާބުކޮށްފައިވާ އިންޑިއާ ހިމެނެނީ ރާއްޖެ އާއި ޕާކިސްތާނާ އެއް ގްރޫޕެއްގައެވެ. އަނެއް ގްރޫޕުގައި ހިމެނެނީ ބަންގްލަދޭޝް އާއި ސްރީ ލަންކާ އަދި ބޫޓާނެވެ.

އިންޑިއާގެ ނޫސްތަކުން ބުނެފައި ވަނީ އިންޑިއާއިން ނިއު ޒީލެންޑާ ދެކޮޅަށް ކުޅޭ ފުރަތަމަ މެޗު، ނޮވެމްބަރު 12 ވަނަ ދުވަހު އޮންނާނީ އޯކްލޭންޑްގެ ގޯ މީޑިއާ ސްޓޭޑިއަމްގައި ކަމަށެވެ. އަދި ދެވަނަ މެޗު އޮންނާނީ މުޅިން އަލަށް ގައުމީ ޓީމު މެޗަކަށް ތައްޔާރުވަމުންދާ ކްރައިސްޓްޗާޗުގެ ވަން ނިއު ޒީލެންޑް ސްޓޭޑިއަމްގައި ނޮވެމްބަރު 15 ގައި ކަމަށްވެސް ނޫސްތައް ބުނެފައިވެއެވެ.

ނިއު ޒީލެންޑަކީ އެންމެފަހުގެ ވޯލްޑް ކަޕްގައިވެސް ވާދަކޮށްފައިވާ ގައުމަކަށްވާ އިރު، މިއީ އިންޑިއާއިން އޯޝެނިއާ ގައުމަކާ ދެކޮޅަށް މެޗެއް ކުޅެން ތައްޔާރުވާ ފުރަތަމަ ފަހަރެވެ.

ނޫސްތަކުން ބުނީ އިންޑިއާގެ ކޯޗު ހާލިދު ޖާމިލް ދެކޭ ގޮތުގައި އެކަހަލަ ވަރުގަދަ ގައުމެެއްގެ ދައުވަތެއް ލިބުމުން އެކަމަށް ނޫނެކޭ ބުނުމަކީ ކޮށްގެންވާނެ ކަމެއް ނޫނެވެ. އަދި އެކަމަށް ފެޑަރޭޝަނުން އާއެކޭ ބުނަން ޖެހޭ ސަބަބަކީ ނިއު ޒީލެންޑަކީ ވޯލްޑް ކަޕް ގައުމަކަށްވާތީ ކަމަށް އިންޑިއާ ކޯޗު ފާހަގަކޮށްފައިވާ ކަމަށްވެސް ނޫސްތައް ބުނެއެވެ.

ބެންގަލޫރުގެ ސްރީ ކަންޓީރަވާ ސްޓޭޑިއަމްގައި 2023 ވަނަ އަހަރު ކުޅުނު ފައިނަލް މެޗުގައި ކުވައިތު ބަލިކޮށް އިންޑިއާއިން ތަށި އުފުލާލީ ޕެނަލްޓީ ޖަހައިގެން 5-4 އިން ކުރި ހޯދައިގެންނެވެ. އެ މުބާރާތަކީ ސަރަހައްދުން ބޭރުން ދެ ގައުމު ކަމަށްވާ ލުބުނާނާއި ކުވައިތު ބައިވެރިވި ފުރަތަމަ ފަހަރެވެ. މި ދެ ގައުމުގެ ބައިވެރިވުމާއެކު 2023 ގެ މުބާރާތް ވެގެންދިޔައީ ސާފްގެ ތާރީހުގައިވެސް ފެނިގެންދިޔަ އެންމެ ވާދަވެރި އަދި އެންމެ ފޯރިގަދަ އެއް މުބާރާތަށެވެ.

އެ މުބާރާތުން ރާއްޖެ ގްރޫޕް ސްޓޭޖުން ކެޓި އިރު، އެއީ މުބާރާތުގެ ތާރީހުގައިވެސް ރާއްޖޭން ގްރޫޕް ސްޓޭޖުން ކެޓި ފުރަތަމަ ފަހަރެވެ.

ރާއްޖޭން މީގެ ކުރިން 2008 އަދި 2018 ވަނަ އަހަރު ސާފް ޗެމްޕިއަންޝިޕް ކާމިޔާބު ކޮށްފައިވާ އިރު، ރާއްޖެއަށް މިފަހަރު ގްރޫޕް ސްޓޭޖު ޗެލެންޖިންވާނެއެވެ.