ރާއްޖޭން މިރޭ ކުޅުނު އެކުވެރިކަމުގެ މެޗުގައި ކިރިގިސްތާން ކައިރިން ތަފާތު ބޮޑުކޮށް ބަލިވެއްޖެއެވެ.

ކިރިގިސްތާނުގެ ވެރިރަށް ބިޝްކެކްގައި ކުޅުނު މެޗުން ރާއްޖެ ބަލިވީ 5-0 އިންނެވެ. ކިރިގިސްތާނުން ފުރަތަމަ ހާފުގައި ގޯލްތައް ޖެހި އިރު، މިއީ އެޓީމުން އެންމެފަހުން ކުޅުނު ނުވަ މެޗުގެ ތެރެއިން ކްލީން ޝީޓެއް ދެމެހެއްޓި ފުރަތަމަ މެޗެވެ.

މިއަދުގެ މެޗަކީ މިފަހަރު އިންޓަނޭޝަނަލް ބްރޭކްގައި ރާއްޖޭން ކުޅުނު ދެވަނަ މެޗެވެ. ފުރަތަމަ ޗައިނާއާ ދެކޮޅަށް އެގައުމުގައި ކުޅުނު މެޗުން ރާއްޖެ ބަލިވެފައި އޮތީ 3-0 ގެ ނަތީޖާއަކުންނެވެ. އެމެޗުގެ ފުރަތަމަ ހާފުގައި ރާއްޖޭން ވަނީ ޗައިނާއަށް ގޯލެއް ޖެހިޔަނުދީ ހިފަހައްޓައިފައެވެ.

ކިރިގިސްތާނު މިރޭގެ މެޗު ތަފާތު ބޮޑުކޮށް ކާމިޔާބުކުރި ނަމަވެސް، މި ފަހަކަށް އައިސް ކިރިގިސްތާނުގެ މައްޗަށް ރާއްޖެ އޮތީ ދެމެޗުން ކުރި ހޯދައިފައެވެ. މިރޭ ކުޅުނު މެޗުގެ ކުރިން ރާއްޖޭން ހަތަރު މެޗެއް ކިރިގިސްތާނާ ދެކޮޅަށް ކުޅެފައިވެއެވެ. އެންމެ ފުރަތަމަ 1997 ވަނަ އަހަރު އެގައުމުގައި ކުޅުނު ވޯލްޑް ކަޕް ކޮލިފިކޭޝަން މެޗުގައި ކިރިގިސްތާނުން ރާއްޖެ ބަލިކުރީ 3-0 އިންނެވެ. އަދި އެފަހަރު ރާއްޖޭގައި ކުޅުނު މެޗުގައި ކިރިގިސްތާން މޮޅުވީ 6-0 އިންނެވެ. އެންމެފަހުން ދެޓީމުން އޭއެފްސީ ޗެލެންޖް ކަޕްގައި ކުޅުނު މެޗުން ރާއްޖެ 2-0 އިން މޮޅުވި އިރު، އޭގެ ކުރިން 2012 ވަނަ އަހަރު އޭއެފްސީ ޗެލެންޖް ކަޕް ކޮލިފިކޭޝަން ރާއްޖޭން ކުޅުނު މެޗުގައި 2-1 އިން ކިރިގިސްތާން ބަލިކުރިއެވެ.

އެހެންކަމުން މިއީ 1997 ވަނަ އަހަރަށްފަހު ކިރިގިސްތާނުން ރާއްޖެ ބަލިކުރި ފުރަތަމަ ފަހަރެވެ.

މިރޭ ކުޅުނު މެޗުގެ ފުރަތަމަ ހާފުގައި ރާއްޖޭގެ ފަރާތުން ފެނުނީ ދަށް ކުޅުމެކެވެ. ފަހަތުންނާއި ގޯލްކީޕަރު ހުސައިން ޝަރީފްގެ ފަރާތުންވެސް ގޯސްތައް ފެނިގެން ގޮސްފައިވާ އިރު، ރާއްޖެއަށް ރަނގަޅު އެޓޭކެއްވެސް އުފެއްދިފައެއް ނުވެއެވެ. އަދި ހާއްސަކޮށް އެ ހާފުގައި ކިރިގިސްތާނުން ވަނީ ފުލުފުލުގައި ގޯލްތައް ޖަހައިފައެވެ.

މެޗުގެ 12 ވަނަ މިނެޓުގައި އެރްބޯލް އަޓަބައޭވް ޖެހި ގޯލުން ކިރިގިސްތާން ލީޑު ނެގި އިރު، 20 ވަނަ މިނެޓުގައި ސިރޮޒިދިން އަސްޓަނަކޫލޯވް ވަނީ އެޓީމުގެ ދެވަނަ ގޯލް ޖަހައިފައެވެ. އެ ގޯލަކީ ކީޕަރު ހުސައިން އަތު ތެރެއިން ގޮސް ވަން ގޯލެކެވެ. އޭގެ ތިން މިނެޓް ފަހުން ރަނގަޅު މޫވްއަކާއެކު އަޓަބައޭވް ތިންވަނަ ގޯލެއް ޖެހި އިރު، ހާފު ނިމުމުގެ ކުރިން އެޓީމުން އިތުރު ދެ ގޯލް ޖަހައި ފަސް ގޯލް ހަމަކުރިއެވެ. އެ ގޯލްތައް ޖެހީ ވަލޭރީ މުރްޒަކޯވާއި ޖޮއެލް ކޯޖޯއެވެ.

ރާއްޖެއިން އެންމެ ރަނގަޅަށް ފޮނުވާލި ހަމަލާއެއް ފެނުނީ ޑިފެންޑަރު އަމްދާން އަލީ (އެންޑީ) ފަރާތުންނެވެ. އޭނާ އެޓޭކަކަށް އަރައި ބޮލުން ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.

ދެވަނަ ހާފުގައި ރާއްޖޭންވެސް ކިރިގިސްތާނުންވެސް ބަދަލުތަކެއް ކޮށްފައިވާ އިރު، އެ ހާފުގައި ރާއްޖޭން ވަނީ ކުޅުން ތަންކޮޅެއް ރަނގަޅުކޮށްފައެވެ. ހާއްސަކޮށް ފަހަތުން ހެދުނު ގޯސްތައް ރާއްޖޭން ރަނގަޅުކުރިއެވެ. އެއާއެކު ހާފުގައި ރާއްޖޭން ވަނީ އިތުރު ގޯލެއް ވަނަ ނުދީ ހިފަހައްޓާލައިފައެވެ. އެހެން ނަމަވެސް ކިރިގިސްތާނުން ވަނީ އޭރިއާ ތެރެއަށް ގިނަ ބޯޅަތަކެއް ސަޕްލައިކޮށްފައެވެ. އެޓީމުގެ ކުޅުންތެރިންނަށް ދިޔައީ ރަނގަޅަށް ނިންމާ ނުލެވިއެވެ.

މިރޭގެ މެޗުގައި އަރީން އަބްދުﷲ އިބްރާހީމް ވަނީ ރާއްޖޭގެ ގައުމީ ސީނިއާ ޓީމަށް ފުރަތަމަ މެޗު ކުޅެފައެވެ.

ރާއްޖޭން ދެން މިފަހަރުގެ އިންޓަނޭޝަނަލް ބްރޭކްގައި ކުޅޭނީ ލުބުނާނާ ދެކޮޅަށެވެ. އެވެސް ކިރިގިސްތާނުގައި ކުޅޭ މެޗެކެވެ. އެމެޗު އޮންނާނީ އަންނަ ބުރާސްފަތި ދުވަހު ރާއްޖެ ގަޑިން ހަވީރު 5:00 ގައެވެ.