އަޔަލެންޑާއި އިޒްރޭލް ޔޫއެފާ ނޭޝަންސް ލީގު ބީގައި ރޭ ވާދަކުރި މެޗު، އަޔަލެންޑުން ތަފާތު ބޮޑުކޮށް ކާމިޔާބު ކޮށްފިއެވެ.

އަޔަލެންޑާއި އިޒްރޭލް ރޭ ވާދަކުރަން އޮތް މެޗަކީ އެކިއެކި ގޮތްގޮތުން ސަމާލުކަން ބޮޑުވެފައި އޮތް މެޗެކެވެ. ފަލަސްތީނުގެ ގައްޒާ ރައްޔިތުންނަށް ކުރިމަތިކުރަމުންދާ ލާއިންސާނީ ހަމަލާތަކުގެ ސަބަބުން އިޒްރޭލާ ދެކޮޅަށް ނޭޝަންސް ލީގު މެޗުތައް ކުޅެން އަޔަލެންޑްގެ ކުޅުންތެރިންވެސް ވަނީ ދެކޮޅު ހަދައިފައެވެ.

އަޔަލެންޑަކީ އިޒްރޭލުގެ ލާއިންސާނީ ހަމަލާތަކާ ދެކޮޅަށް އެންމެ ވަރުގަދައަށް އަޑުއުފުލަމުންދާ އެއް ގައުމެވެ. އިޒްރޭލުން ފަލަސްތީނުގެ އެތައް އާންމުންނެއް ޝަހީދުކުރަމުންދާ އިރު، އެތައް ކުޅިވަރު އެތުލީޓުންތަކެއްވެސް އިޒްރޭލުގެ ނިރުބަވެރި ހަމަލާތަކުގައި ޝަހީދުވެފައިވެއެވެ. އޭގެ ތެރޭގައި ފުޓުބޯޅަ ކުޅުންތެރިންވެސް ހިމެނެއެވެ. އެހާލަތަށް ކަންކަން ގޮސްފައި އޮތް ނަމަވެސް ފީފާއިން އަދިވެސް އިޒްރޭލް ފުޓުބޯޅައިން ބޭރުކޮށްފައެއް ނުވެއެވެ.

ރޭގެ މެޗަށް އަޔަލެންޑް ނުކުތީ މެޗު ކުޅެން ވޯޓަކަށްވެސް އަހައިގެންނެވެ. އަޔަލެންޑްގެ ކީޕަރު ގެވިން ބަޒޫނޫ ވަނީ އިޒްރޭލާ ދެކޮޅަށް ނުކުޅެންވެގެން ސްކޮޑުންވެސް ބޭރުވެފައެވެ.

މެޗުގެ ކުރިން އަޔަލެންޑްގެ އެތައް ރައްޔިތުންނެއް އެދެމުން ދިޔައީ އެމެޗު ބޮއިކޮޓް ކުރުމަށެވެ.

އަޔަލެންޑްގެ ކޯޗު ހެއިމިރް ހަލްގްރިމްސަން ބުނީ މެޗުތައް ކުޅެނީ މަޖުބޫރު ހާލަތުގައި އިޒްރޭލުގެ ލާއިންސާނީ ޖަރީމާތަކާ ދެކޮޅަށް ކަމަށެވެ. ދެ މެޗަށްވެސް އޮތް އަޒުމަކީ އެކަމުގައި އިޒްރޭލާ ދެކޮޅަށް ބަސް ބުނުން ކަމަށްވެސް އޭނާ ފާހަގަކުރިއެވެ.

އެކަމުގައި އިޒްރޭލުގެ ފަރާތްތަކުން ނުރުހުން ފާޅުކުރުމުން ކޯޗުގެ ދިފާއުގައި އަޔަލެންޑް ބޮޑުވަޒީރު މިޝޭލް މާޓިން ވަނީ ވާހަކަވެސް ދައްކަވައިފައެވެ.

އަޔަލެންޑާއި އިޒްރޭލް އަދި އެއް ފަހަރު ވާދަކުރަން ޖެހޭނެއެވެ. އެމެޗު އޮންނާނީ ސާބިއާގައެވެ. އެއީ ނިއުޓްރަލް ދަނޑެއްގައެވެ.

ރޭގެ މެޗު ނިއުޓްރަލް ދަނޑެއްގައި ކުޅުނު އިރު، އެމެޗު ކުޅުނީ ހަންގޭރީގެ ޑެބްރެސެންގެ ނަގްޔާޑޭ ސްޓޭޑިއޯންގައެވެ.

އެމެޗު އަޔަލެންޑުން 3-0 އިން ކާމިޔާބުކުރި އިރު، އަޔަލެންޑް ކުޅުންތެރިން ކުޅުނީ ކަޅު ބޭންޑްގައެވެ. އެއީ ފަލަސްތީނުގައި ޝަހީދުވި އެތައް ރައްޔިތުންނެއްގެ ހަނދާނުގައެވެ. އަދި އިޒްރޭލްގެ ގައުމީ ސަލާމް ކީ ވަގުތު، އެކަމުގައި އިހުތިރާމު އަދާނުކުރުމަށް އަޔަލެންޑް ކުޅުންތެރިން ތިބީ އިސް ޖަހައިގެންނެވެ. އަދި އިޒްރޭލް ޓީމާ އަޔަލެންޑް ކުޅުންތެރިން ސަލާމްވެސް ކޮށްފައެއް ނުވެއެވެ.

މެޗުގެ ފުރަތަމަ ކޮޅުގައި އަޔަލެންޑުން ގޯލްތައް ޖެހި އިރު، ގޯލްތައް ޖެހީ ޓްރޮއީ ޕަރޮޓާއި އެޑަމް އިޑާ އަދި ޖެކް މޮއިލަންއެވެ.