މާލެ ސަރަހައްދުގައި ހިނގަމުންދާ ނުރައްކާތެރި މަގުމަތީ އެކްސިޑެންޓުތަކަށް އަވަސް ހައްލެއް ހޯދުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ)، މަޖިލީހަށް ހުށަހެޅުންތަކެއް ހުށަހަޅުއްވައިިފިއެވެ.

މަޖިލީހުގެ ރައީސް އަބްދުއްރަހީމް އަބްދުﷲ އަށް ކުޑޫ މިއަދު ފޮނުއްވި ސިޓީގައި ފާހަގަކުރައްވާފައިވާ ގޮތުގައި، މަގުމަތީގެ ނުރައްކާތެރި ހާދިސާތައް އިންތިހާއަށް އިތުރުވެ، އެކަމުގެ ސަބަބުން އެތައް ބައެއްގެ، ހާއްސަކޮށް ޒުވާނުންގެ ފުރާނަ ގެއްލި، އުމުރުދުވަހުގެ ނުކުޅެދުންތެރިކަމާ ކުރިމަތިލާންޖެހެއެވެ. މިކަމަށް ހައްލެއް ހޯދުމަށް 4 އޮގަސްޓް 2025 ގައި މަޖިލީހުގެ 241 ކޮމިޓީއާއި ޖުޑީޝަރީ ކޮމިޓީ ގުޅިގެން ހާއްސަ އަޑުއެހުމެއް ބޭއްވުމަށް ހުށަހެޅި ނަމަވެސް، މިހާތަނަށް އެކަށީގެންވާ ހައްލެއް ލިބިފައިނުވާކަން އޭނާ ފާހަގަކުރެއްވިއެވެ.

މެންބަރު ވަނީ ގާނޫނީ އޮނިގަނޑަށްވެސް އަލިއަޅުވާލައްވައިފައެވެ. އެގޮތުން، ގާނޫނުލްއުގޫބާތުގެ 112 ވަނަ މާއްދާގައި ފަރުވާކުޑަ އަމަލެއްގެ ސަބަބުން މީހަކު މަރުވުމުން އުފުލަން ޖެހޭ ޖިނާއީ މަސްއޫލިއްޔަތުތައް ބަޔާންކޮށްފައިވާ ކަމަށާއި، އެއްގަމު ދަތުރުފަތުރުގެ ގާނޫނުގައިވެސް ނުރައްކާތެރިކޮށް ދުއްވުމާ ގުޅޭގޮތުން އެޅޭނެ ފިޔަވަޅުތައް ކަނޑައެޅިފައިވާކަން ފާހަގަކުރެއްވިއެވެ. ނަމަވެސް، ތަހުގީގުތައް ދިގުލައިގެން ދިއުމާއި ޝަރުއީ މަރުހަލާގައި މައްސަލަތައް ނުނިމި ގިނަ ދުވަސްވުމަކީ އަދުލު އިންސާފުގެ ނިޒާމާ މެދު އާންމުންގެ އިތުބާރު ކުޑަވާ ކަމެއް ކަމަށް ސިޓީގައި ބުނެފައިވެއެވެ. މިކަމުގެ މިސާލެއްގެ ގޮތުން، 29 މޭ 2018 ގައި ހުޅުމާލޭގައި ހިނގި އެކްސިޑެންޓަކާ ގުޅިގެން އުމަރު ސަލީމްގެ މައްސަލައިގެ ޝަރުއީ މަރުހަލާ ދިގުލައިގެން ގޮސްފައިވާކަން މެންބަރު ފާހަގަކުރެއްވިއެވެ.

މި މައްސަލަތަކަށް ދާއިމީ ހައްލެއް ހޯދުމަށްޓަކައި ކުޑޫ ވަނީ 8 ކަމެއް މަޖިލީހަށް ހުށަހަޅުއްވައިފައެވެ. އޭގެ ތެރޭގައި، އިޖުތިމާއީ ކޮމެޓީގެ އާންމު އަޑުއެހުމެއް ބޭއްވުމާއި، ފުލުހުންނާއި ޕީޖީ އޮފީސް އަދި ޓްރާންސްޕޯޓް މިނިސްޓްރީ ފަދަ އިދާރާތައް ކޮމެޓީއަށް ހާޒިރުކޮށް މައުލޫމާތު ސާފުކުރުން ހިމެނެއެވެ. ތަކުރާރުކޮށް ނުރައްކާތެރިކޮށް ދުއްވާ ފަރާތްތަކުގެ ލައިސަންސް ދާއިމީކޮށް ހިފެހެއްޓުމާއި، އެފަދަ އުޅަނދުތައް ދައުލަތަށް ނެގޭނެ ގޮތަށް ގާނޫނު އިސްލާހުކުރުމަށް ވަނީ ހުށަހަޅުއްވައިފައެވެ. މީގެ އިތުރުން، އެކްސިޑެންޓުތަކުގައި އަނިޔާވާ މީހުންނަށް ބަދަލު ލިބޭނެ ފަދަ ތާޑް ޕާޓީ އިންޝުއަރެންސް ނިޒާމެއް ތައާރަފުކޮށް، އެއީ އުޅަނދު ދުއްވުމަށް ލާޒިމު ޝަރުތެއްގެ ގޮތުގައި ކަނޑައެޅުމަށް ކުރެވިދާނެ ކަންކަން ބެލުމަށްވެސް އެދިވަޑައިގެންފައިވެއެވެ.

ހަމައެއާއެކު، ބޮޑެތި އެކްސިޑެންޓުތަކުގެ ތަހުގީގުތަކާއި ޝަރީއަތްތައް ލަސްވާ ސަބަބުތައް ދެނެގަތުމަށާއި، އަނިޔާ ލިބޭ ފަރާތްތަކަށް މައްސަލައިގެ ކުރިއެރުން ގަވާއިދުން އަންގައިދޭނެ ނިޒާމެއް ގާއިމުކުރުމަށް ސިޓީގައި ބާރުއަޅުއްވާފައިވެއެވެ.

މާލެއާއި ހުޅުމާލޭގައި ސްޕީޑް މޮނިޓަރިން އަދި ލޯ އެންފޯސްމަންޓް ގާއިމުކޮށް، ސްޕީޑް ކެމެރާއާއި އޮޓޮމެޓިކް ފައިން ސިސްޓަމްތައް ގާއިމުކުރުމަށް ބޭނުންވާ ފައިސާ ދައުލަތުގެ ބަޖެޓުން ހަމަޖައްސައިދިނުމަށްވެސް މެންބަރު ވަނީ ހުށަހަޅުއްވައިފައެވެ. މެންބަރު ކުޑޫގެ ސިޓީ ނިންމަވާލައްވަމުން އެދިވަޑައިގެންފައިވަނީ، ކަމާބެހޭ މުއައްސަސާތައް ހާޒިރުކޮށް އަޑުއެހުންތައް ކުރިއަށްގެންގޮސްދެއްވުމަށެވެ.

ކުޑޫ މި ހުށަހެޅުންތައް މަޖިލީހަށް ހުށަހަޅުއްވާފައި މިވަނީ ފަހަކަށް އައިސް މާލެ ސަރަހައްދުގައި ނުރައްކާތެރި އެކްސިޑެންޓުތައް އިތުރުވެފައިވަނިކޮށެވެ. މިގޮތުން މިދިޔަ އެއް މަސްދުވަހުގެ ތެރޭގައި މިފަދަ އެކްސިޑެންޓުތަކުގައި ތިން މީހަކު ވަނީ މަރުވެފައެވެ. މީގެ ތެރޭގައި ދެ އަހަރުގެ ނުވަ އަހަރުގެ ކުއްޖަކު ވެސް ހިމެނެއެވެ.