މަސްތުގެ ހާލަތުގައި ތިބެ މަގުމަތީ ވެހިކަލް ދުއްވުމުގެ މައްސަލަތައް އާދަޔާ ހިލާފަށް ގިނަވެފައިވާކަމަށް ހޯމްލޭންޑް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.

ސަލްޓަން ޕާކުގައި މިރޭ ބޭއްވި "އަހާ" ފޯރަމްގެ ހަތްވަނަ ސެޝަންގައި ވާހަކަދައްކަވަމުން އިހުސާން ވިދާޅުވީ، މަގުތަކުގެ ސަލާމަތީ ކަންކަން ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އިހުސާން ވިދާޅުވީ، ސަރުކާރުން މަގުތަކަށް އިތުރަށް ފުލުހުން ނެރެ، މަގުތައް ބެލެހެއްޓުމުގެ މަސައްކަތް ހަރުދަނާ ކޮށްފައިވާ ކަމަށެވެ.

ނަމަވެސް، މަގުމަތީގައި ހިތާމަވެރި ހާދިސާތައް ގިނަވެފައިވާ ކަން ފާހަގަކުރައްވައި، މިއީ ހަމައެކަނި ލައިސަންސް ނެތި ދުއްވުމުގެ މައްސަލައާ ގުޅުން އޮތްކަމެއް ނޫންކަމަށް މިނިސްޓަރު ވިދާޅުވިއެވެ. ބައެއް ފަރާތްތަކުން ލައިސަންސް ނަގާފައި ހުންނަނީ ގާނޫނާއި ގަވާއިދު އެއްވެސް ވަރަކަށް ނޭނގި ކަމަށާއި، ބައެއް އެކްސިޑެންޓްތައް ހިނގާފައިވާ ގޮތުން އެ މީހުންނަށް މަގުމަތީގެ އެންމެ އާދައިގެ ގަވައިދުތަކާއި އުސޫލުތައްވެސް ނޭނގޭކަން ސާފުވާކަމަށް މިނިސްޓަރު ވިދާޅުވިއެވެ.

"މަސްތުގެ ހާލަތުގައި ވެހިކަލްތައް ދުއްވަމުންދާކަން އަޅުގަނޑުމެންނަށް އާދަޔާ ހިލާފަށް ފާހަގަކުރެވިފައި އެބައޮތް. އެކަމަށް މިހާރު ވަރަށް ބޮޑަށް ސަމާލުކަން ދީގެން ފުލުހުން ދަނީ މަސައްކަތް ކުރަމުން،" އިހްސާން ވިދާޅުވިއެވެ.

މިދިޔަ ދެ އަހަރުގެ ތެރޭގައި އެހެން މީހުންނަށް ނުރައްކާވާ ގޮތަށް ދުއްވި 1,904 ވެހިކަލް ޓޯކޮށްފައިވާނެ ކަމަށާއި، ކޮންމެ ފަހަރަކު ބޮޑު އަދަދަކުން ޖޫރިމަނާވެސް ކުރާކަމަށް މިނިސްޓަރު ވިދާޅުވިއެވެ. އަދި ބައެއް ފަރާތްތަކާ މެދު ޖިނާއީ ދައުވާވެސް އުފުލާފައިވާކަމަށް އިހްސާން ވިދާޅުވިއެވެ.