މެސީގެ ޖާދުވީ މެޗެއް، އިންޓަ މިއާމީ އަލުން ފޯމަށް

އިންޓަ މިއާމީން ރޭ މޭޖާ ލީގު ސޮކާގައި ކުޅުނު މެޗުގައި ސީއެފް މޮންޓްރެއަލް ކައިރިން 7-1 މޮޅުވެއްޖެއެވެ.

އިންޓަ މިއާމީން ރޭ އަމިއްލަ ދަނޑުގައި ކުޅުނު މެޗުގައި ކެޕްޓަން ލިއޮނަލް މެސީ ވަނީ ހަތަރު ގޯލް ޖަހައިފައެވެ. އޭގެ އިތުރުން އޭނާ ވަނީ އެސިސްޓެއްވެސް ފުރިހަމަ ކޮށްފައެވެ. މެސީގެ ތަފާތާއެކު ރޭ ހޯދި މޮޅަކީ މިދިޔަ ފަސް މެޗުގެ ފަހުން އެޓީމުން ހޯދި ފުރަތަމަ މޮޅެވެ.

އުމުރުން 39 އަހަރުގެ މެސީ، ބައްޕަ މަރުވުމަށްފަހު ފުޓުބޯޅައިން ކުޑަ ދުވަސް ކޮޅަކަށް ބްރޭކެއް ނަގާފައިވާ އިރު، އޭގެފަހުން ރޭ ކުޅުނު މެޗަކީ އެންމެ ފޯމު ރަނގަޅު މެޗެވެ. މެޗުގެ ކުރީކޮޅުގައި ކަސެމީރޯ ލީޑު ނެގި އިރު، އޭގެ އިރުކޮޅެއްފަހުން ފަބިއަން ހާބާސް މޮންޓްރެއަލްއަށް އެއްވަރުކުރިއެވެ.

މެސީ، 40 ވަނަ މިނެޓުގައި އިންޓަ މިއާމީއަށް އަލުން ލީޑު ނަގައިދިން އިރު، އޭނާ ވަނީ ދެވަނަ ހާފުގެ ކުރީކޮޅުގައި އިތުރު ގޯލެއް ޖަހައިފައެވެ. އަދި 82 ވަނަ މިނެޓުގައި މެސީ ހެޓްރިކް ފުރިހަމަކުރި އިރު، ލުއިސް ޝުއަރޭޒްއާއި އެލެކްސެންޑާ ޝޯވެސް ވަނީ މެޗުގައި ގޯލް ޖަހައިފައެވެ.

މެޗުގައި މެސީ އޭނާގެ ހަތަރު ވަނަ ގޯލް ޖެހީ ފަހުކޮޅުގައި ހިލޭ ޖެހުމަކުންނެވެ.

މެޗަށްފަހު އިންޓަ މިއާމީގެ ކޯޗު އެންޖޭލް ގުއިލާމޯ ހޯޔޯސް ވަނީ މެސީއަށް ވަރަށް ބޮޑަށް ތައުރީފު ކޮށްފައެވެ. އޭނާ ބުނީ މެސީގެ އެ ތަފާތު ކިޔައިދޭން ބޭނުންކުރާނެ ކަންއިތުރެއް ނުވެސް އެނގޭ ކަމަށެވެ.