ހުޅުމާލޭގައި ހަދާ ރާއްޖޭގެ އެންމެ ބޮޑު މިސްކިތުގެ ބިންގާ، އިސްލާމްވި ދުވަހު އަޅަނީ

ރާއްޖެ އިސްލާމްވިތާ 900 އަހަރު ފުރޭ ތާރީހީ މުނާސަބަތާ ގުޅުވައިގެން، ރާއްޖޭގައި ބިނާކުރާ އެންމެ ބޮޑު މިސްކިތުގެ ބިންގާ އެޅުމުގެ ހަމަޖެހިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޝަހީމް އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ ހުޅުމާލޭގައި ގާއިމުކުރާ އެ މިސްކިތް ވެގެންދާނީ ދިވެހިންގެ މުއްސަނދި އިސްލާމީ ހަލާރަތާއި ރީތި ފަރުމާ ދައްކުވައިދޭނެ ފުރިހަމަ ބިނާއަކަށް ކަމަށެވެ. އަދި މިއީ އިލްމާއި އީމާންތެރިކަމާއި އެއްބައިވަންތަކަން އާލާކޮށްދޭނެ މުހިންމު މަރުކަޒަކަށްވާނެ ކަމަށް ޝަހީމް ވިދާޅުވިއެވެ.

މިނިސްޓަރު ވިދާޅުވީ މިއީ، 900 އަހަރުވީ ރާއްޖޭގެ އިސްލާމީ މަތިވެރި ތާރީހާއި، އިލްމީ ހިދުމަތްތައް އަންނަން އޮތް ޖީލުތަކަށް ރައްދުކޮށްދޭނެ އަގުހުރި ތަރިކައެއް ކަމަށެވެ.

އަންނަ މަހު ފާހަގަކުރާ ރާއްޖެ އިސްލާމްވި ދުވަހު މިސްކިތުގެ ބިންގާ އެޅުމަށް ސަރުކާރުން ހާއްސަ އިސްކަމެއް ދީގެން މަސައްކަތް ކުރަމުން އަންނަކަމަށް ޝަހީމް ވިދާޅުވިއެވެ.

ރައީސް ޑރ. މުހައްމަދު މުއިއްޒުގެ ރިޔާސީ ބަޔާނުގައި އިއުލާނު ކުރައްވާފައިވާ އެ މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ފޭސް 2 އަދި ފޭސް 3 ގުޅޭ ސަރަހައްދުގައެވެ. އެ މިސްކިތް އެޅުމަށް ބޭނުންވާ ބިން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން މިހާރު ވަނީ އިސްލާމިކް މިނިސްޓްރީއާ ހަވާލުކޮށްފައެވެ.

މިސްކިތުގެ އިތުރުން ގުރުއާން މިއުޒިއަމަކާއި އެހެނިހެން މުހިންމު ވަސީލަތްތައް ހިމެނޭހެން ކޮމްޕްލެކްސްއެއްގެ ގޮތުގައި ތަރައްގީކުރާ އެ މަޝްރޫއަށް ފައިނޭންސް ކުރުމަށްޓަކައި، ސައޫދީ އަރަބިއްޔާގެ އަލްރަޖްހީ ކުންފުންޏާއެކު އިސްލާމިކް މިނިސްޓްރީންވަނީ އެއްބަސްވުމެއްގައި ސޮއިކޮށްފައެވެ.