އާޖެންޓީނާއާއި ސްޕެއިން ވާދަކުރި ފީފާ ވޯލްޑް ކަޕް 2026ގެ ފައިނަލަށް ޔޫއެފާގެ ރައީސް އެލެކްސެންޑާ ޗެފެރިން ވަޑައިނުގަންނަވާ ކަމަށް ނޫސްތައް ބުނެފިއެވެ.

ސްލޮވޭނިއާގެ ޗެފެރިން ވޯލްޑް ކަޕް ހުޅުވުމަށް މެކްސިކޯ ސިޓީއަށް ވަޑައިގަތް ނަމަވެސް، ވޯލްޑް ކަޕް ތެރެއިން ފީފާއާއި ޔޫއެފާގެ މައްސަލަ ވަނީ ގޯސްވެފައެވެ. ހާއްސަކޮށް އެމެރިކާގެ ފޮލާރިން ބަލޮގުންގެ ރަތް ކާޑުގައި ފީފާއިން އަމަލުކުރި ގޮތުން އެކަމުގައި ޔޫއެފާއިން ވަނީ ނުރުހުން ފާޅުކޮށްފައެވެ.

ހަބަރުތައް ބުނެފައި ވަނީ ޗެފެރިން ވޯލްޑް ކަޕް ފައިނަލަށް ނުދިޔައީ އެ ސަބަބަށްޓަކައި ކަމަށެވެ.

ވޯލްޑް ކަޕް 2026 ގެ ގަދަ 32 ގައި އެމެރިކާއިން ބޮސްނިއާ ބަލިކޮށް، ގަދަ 16 ޔަގީންކުރި މެޗުގައި ރަތް ކާޑު ދެއްކި އެމެރިކާގެ އިތުބާރު ފޯވަޑް ބަލޮގަންއަށް ބެލްޖިއަމާ ދެކޮޅަށް ކުޅެވޭނެ ގޮތަށް ފީފާއިން ވަނީ ހަދައިފައެވެ. އުމުރުން 25 އަހަރުގެ ބަލޮގަންއަށް އެމެޗުގައި ރަތް ކާޑު ދެއްކީ ބޮސްނިއާގެ ޑިފެންޑަރު ޓަރިކް މުހަރެމޮވިޗް ފައިގެ ކުޑަހުޅު މައްޗަށް އެރުމުން، އެއީ ނުރައްކާތެރި ކުޅުމެއް ކަމަށް ނިންމައިފައެވެ.

ކުއްލިއަކަށް އެ ރަތް ކާޑުގެ އެއް މެޗު ސަސްޕެންޝަން އަހަރެއް ދުވަހަށް ސަސްޕެންޑެޑް ބޭންއަކަށް ހަދަން ނިންމާފައިވުމާއެކު އެކަމަށް ވަނީ ފާޑުކިޔުންތައް އަމާޒުވެފައެވެ. ފަހުން އެމެރިކާ ރައީސް ޑޮނަލްޑް ޓްރަމްޕް ވިދާޅުވީ ޖިއާނީ އިންފަންޓީނޯއަށް އޭނާ ގުޅި ކަމަށެވެ.

އެ މައްސަލައިގައި ޔޫއެފާއިން ބަޔާން ނެރެފައިވާ އިރު، ޔޫއެފާއިން ބުނީ ފުޓުބޯޅައަކީ އެންމެން ގަޔާވާ، އެންމެ ގިނަ ބަޔަކު ލޯބިކުރާ ކުޅިވަރަކަށްވީ ސަބަބަކީ މުޅި ދުނިޔޭގައި އެއް އުސޫލަކަށް ކުޅެ، އެއް ގަވާއިދުތަކެއް ހިފަހައްޓާތީ ކަމަށެވެ. އަދި އެކަން ކުރުމުގައި ފުޓުބޯޅައިގެ ބަލަދުވެރި ފަރާތުން ވަކި ކޮޅަކަށް ބުރަވާނަމަ މުޅި ކުޅިވަރު ހަލާކުވުމުގެ ބިރު އެބައޮތް ކަމަށްވެސް ޔޫއެފާއިން ބުންޏެވެ.

އޭގެ އިތުރުން ޔޫއެފާއިން ބުނީ ފުޓުބޯޅައަށް ނުފޫޒު ވަނުމުގެ ބިރު ބޮޑުވެގެންދާ މި ހާލަތުގައި ފީފާ އޮތް ހާލަތަކީ ކަންބޮޑުވާ ހާލަތެއް ކަމަށާއި، މިހާރު ފީފާއިން އަމަލުކުރަމުންދާ ގޮތުން ހަމަހަމަ ގެއްލޭނެ ކަމަށެވެ. އަދި ކުރިއަށް އޮތްތަނުގައި ރަތް ކާޑުތަކުގައި އަމަލުކުރާނެ ވަކި ގޮތެއް ނުހިފެހެއްޓި، އެކި މީހުންނަށް އެކި ފިޔަވަޅުތައް އަޅަން ޖެހޭނެ ހާލަތްތައް އައުމުގެ ބިރު އެބައޮތް ކަމަށްވެސް ޔޫއެފާއިން ބުނެފައިވެއެވެ.

އޭގެ އިތުރުން ފީފާއިން ވޯލްޑް ކަޕްގައި އަމަލުކުރި ބައެއް ގަވާއިދުތަކަށްވެސް އަމަލުނުކުރަން ޔޫއެފާއިން ވަނީ ނިންމައިފައެވެ.