މިފަހަރު ވޯލްޑް ކަޕް 2026 ގައި ކުޅުނު ކުޑަކުޑަ ކޭޕް ވާޑްގެ ހީރޯއަކަށްވި ގޯލްކީޕަރު ވޮޒީނިއާއަށް އެ މުބާރާތުން ލިބުނު މަގުބޫލުކަމާ އެކު ދިރިއުޅެން އުނދަގޫވެފައިވާ ކަމަށް އޭނާ ބުނެފިއެވެ.

އުމުރުން 40 އަހަރުގެ ވޮޒީނިއާ ވޯލްޑް ކަޕަށް ދިޔައީ ފްރީ އެޖެންޓެއްގެ ގޮތުގައި ހުރެގެންނެވެ. އޭރު އޭނާގެ އިންސްޓަގްރާމް ފޮލޯވާސްގެ އަދަދަކީ އެންމެ 50،000 އެވެ. ވޯލްޑް ކަޕްގައި ވޮޒީނިއާއަށް ބޮޑު މަގުބޫލުކަމެއް ލިބިފައިވާ އިރު، އޭނާ ވަނީ ސަޕޯޓަރުން ހޮވި އެންމެ މޮޅު ޓީމުގައި ހިމެނިފައެވެ. ވޮޒީނިއާ ވަނީ މުބާރާތުގެ ތަށި ނެގި ސްޕެއިންގެ އިތުރުން ސައުދީ އަރަބިއާ އާއި އުރުގުއާއީ ކައިރިން ކޭޕް ވާޑަށް ޕޮއިންޓެއް ހޯދައިދިނުމުގައި މުހިއްމު ރޯލެއް އަދާކޮށްފައެވެ. އެގޮތުން ސްޕެއިން މެޗާއި ސައުދީ އަރަބީ މެޗުގައި ވޮޒީނިއާ ކޮޅަށް ގޯލެއް ނުވަދެއެވެ.

އެ ތިން މެޗުން އެއްވަރުވެ، އެންމެ ފަސް ލައްކައެއްހާ މީހުން ދިރިއުޅޭ ކޭޕް ވާޑް، ގަދަ 32 އަށް ދިޔުންވީ މުޅި ދުނިޔެ ހައިރާން ކޮށްލި ކަމަށެވެ. ގަދަ 32 ގައި އާޖެންޓީނާ ކައިރިން ބަލިވީ އިތުރު ވަގުތުގައި ކުޅެގެން 3-2 އިންނެވެ.

ވޯލްޑް ކަޕާއެކު ވޮޒީނިއާއާއި އޭނާގެ މަންމައަށްވެސް މަގުބޫލުކަން ލިބުނެވެ. އެއީ ވިސާގެ މައްސަލަތަކާއި ހަރަދު ބޮޑުކަމުން ވޯލްޑް ކަޕަށް ނުދެވި ހުރި މަންމަ، ފީފާގެ އިސްނެގުމަށް ވޯލްޑް ކަޕަށް ގެންދިޔުމުންނެވެ. ވޮޒީނިއާގެ އިންސްޓަގްރާމް ފޮލޯވަރުންގެ އަދަދު މިހާރު ވަނީ 28 މިލިއަނަށްވުރެ މައްޗަށް އަރައިފައެވެ.

"އަހަރެންގެ މިނިވަންކަމާއި ހަމަޖެހުންވެސް ގެއްލިއްޖެ. އަހަރެންގެ މިހާރު އެއްވެސް ޕްރައިވެސީއެއް ނެތް،" ބެލޮންޑިއޯގެ އެންމެ މޮޅު ކީޕަރަށް ދޭ ޔަޝިން ޓްރޮފީއަށްވެސް ނޮމިނޭޓްވި ވޮޒީނިއާ ބުންޏެވެ.

ވޮޒީނިއާ ބުނީ ރެސްޓޯރެންޓަކަށް ދިޔަސް، ފޮޓޯ ނަގައި އޮޓޯގްރާފް ނަގަން އެތައް ބަޔަކު ތިބޭ ކަމަށާއި، ނޫނީ އެހެން މީހަކު އަބަދުވެސް އޭނާ ވީޑިއޯ ކުރަމުން ދާނެ ކަމަށެވެ. އަދި އެކަމުގައި ކުރެވޭނެ ކަމެއް ނެތް ކަމަށްވެސް އޭނާ ބުންޏެވެ.

ވޮޒީނިއާ މިހާރު ޗިލީގެ ކޯލޯ ކޯލޯއަށް ސޮއިކޮށް، އެ ކްލަބަށް ކުޅެމުންދާ އިރު، ވޮޒީނިއާ ބުނީ އޭނާގެ މަންމަ އަމިއްލަ ގައުމުގައި އެކަން ހުންނަ އިރު ބައެއް ސަޕޯޓަރުން ގެ ކައިރިއަށްވެސް ދާ ކަމަށެވެ. އަދި މަންމަ މެންނާއި އާއިލާ އެހެން މީހުންނަށް އުނދަގޫވުމުން ކުރެވޭނެ މާބޮޑު ކަމެއް ނޯންނަ ކަމަށްވެސް އޭނާ ބުންޏެވެ.

ވޮޒީނިއާ ބުނީ "ގިނަ ބަޔަކު މަޝްހޫރުވާން ބޭނުންވޭ، އެކަމަކު ވިސްނަނީ އެކަމުގެ ޕޮސިޓިވް ކަންކަމަށް އެކަނި،" ކަމަށެވެ. އަސްލު ހަގީގަތުގައި އޭގެން ކުރިމަތިވާ އުނދަގޫތަކަށް މީހުން ނުވިސްނާ ކަމަށްވެސް ވޮޒީނިއާ ބުނި އިރު، އޭނާ ފާހަގަކުރީ ކުރީގެ ދިރިއުޅުން މާ ފަސޭހަ ކަމަށެވެ. އަދި މިހާރުވެސް އޭނާ އިހުތިޔާރުކުރަން ބޭނުންވަނީ އެ ދިރިއުޅުން ކަމަށް ވޮޒީނިއާ ފާހަގަކުރިއެވެ.