ފުޓުބޯޅައިގެ ދަނޑުމަތީގައި ނޭމާ ޖޫނިއާ ފަދައިން ސަޕޯޓަރުން މުނިފޫހިފިލުވައިދިން ކުޅުންތެރިން މަދެވެ. އޭނާގެ ހަލުވި ދުވުމާއި، ޖެހިލުންކުޑަ ކުޅުމާއި، އާދަޔާހިލާފު ހުނަރުތަކުގެ ސަބަބުން އޭނާ ވެގެންދިޔައީ މި ޖީލުގެ އެންމެ ފާހަގަކޮށްލެވޭ އެއް ކުޅުންތެރިޔާއަށެވެ.

ދިހަވަރަކަށް އަހަރު ވާންދެން ބްރެޒިލްގެ އުންމީދުތައް އުފުލައި، ދުނިޔޭގެ އެންމެ މަޝްހޫރު އެއް ސުޕަސްޓާރަށް ނޭމާ ވިއެވެ. ނަމަވެސް، އޭނާގެ ބައިނަލްއަގުވާމީ ކެރިއަރު ނިމުމަކަށް އަންނަ އިރު، ކޮންމެ މީހެއްގެ ހިތުގައިވެސް އުފެދޭ އެއް ސުވާލެއް އޮވެއެވެ. އެއީ، އަނިޔާތަކާ ކުރިމަތިލާން ނުޖެހުނު ނަމަ ނޭމާ ހުންނާނީ ކިހާ ހިސާބެއްތޯ ކުރެވޭ ސުވާލެވެ.

ސަންޓޯސްއިން ފެށި ރަން ދަތުރު

ނޭމާގެ ފުޓުބޯޅަ ކެރިއަރު ފެށިގެން އައީ ބްރެޒިލްގެ މަޝްހޫރު ސަންޓޯސް އެފްސީންނެވެ. މިއީ ފުޓުބޯޅައިގެ ލެޖެންޑް ޕެލޭވެސް ވިދާލި ކްލަބެވެ. ފުރާވަރުގެ އުމުރުގައިވެސް ނޭމާގެ ކިބައިގައި އާދަޔާހިލާފު ހުނަރެއް ހުއްޓެވެ. އޭނާގެ ހަލުވިކަމާއި، ބެލެންސް އަދި ކޮންފިޑެންސްގެ ސަބަބުން އިދިކޮޅު ޑިފެންޑަރުންނަށް އޭނާ ހުއްޓުވުން ވީ ބޮޑު ގޮންޖެހުމަކަށެވެ. ވަރަށް އަވަހަށް ބްރެޒިލް ފުޓުބޯޅައިގެ މޫނުމައްޗަށް އޭނާ ވެގެންދިޔައެވެ.

ސަންޓޯސްއަށް 2011 ވަނަ އަހަރު ކޮޕާ ލިބެޓަޑޯރެސް ކާމިޔާބުކޮށްދިނުމުގައި ނޭމާ މުހިންމު ދައުރެއް އަދާކުރިއެވެ. މިއީ ގާތްގަނޑަކަށް 50 އަހަރަށްފަހު އެ ކްލަބުން ހޯދި ބައްރުގެ ފުރަތަމަ ތަށްޓެވެ. ޔޫރަޕްގެ ބޮޑެތި ކްލަބްތަކުން އޭނާ ހޯދަން މަސައްކަތްކުރި އިރު، 2013 ވަނަ އަހަރު އޭނާ އިހުތިޔާރުކުރީ ސްޕެއިންގެ ބާސެލޯނާއެވެ.

ބާސެލޯނާގެ ރަން ޒަމާނާއި "އެމްއެސްއެން"

ބާސެލޯނާގައި ނޭމާ ވެގެންދިޔައީ ފުޓުބޯޅައިގެ ތާރީހު ދުށް އެންމެ ނުރައްކާތެރި އެއް އެޓޭކިން ޓްރިއޯގެ މުހިންމު ހިއްސާއަކަށެވެ. ލިއޮނެލް މެސީ އާއި ލުއިސް ސުއަރޭޒްއާއެކު އޭނާ އުފެއްދި މަޝްހޫރު "އެމްއެސްއެން" ޓްރިއޯއިން ވަނީ އިދިކޮޅު ޓީމުތަކަށް ބޮޑެތި ބިރުވެރިކަން ކުރިމަތިކުރުވައިފައެވެ. މި ތިން ކުޅުންތެރިން އެކުގައި ތިން ސީޒަނުގެ ތެރޭގައި 364 ގޯލު ޖެހިއެވެ.

ބާސެލޯނާގައި ނޭމާ ވަނީ ގިނަ ތަށިތަކެއް ކާމިޔާބުކޮށްފައެވެ. އޭގެ ތެރޭގައި 2014-15 ވަނަ އަހަރުގެ ޔޫއެފާ ޗެމްޕިއަންސް ލީގާއި، ސްޕެނިޝް ލީގުގެ ތަށިތަކުގެ އިތުރުން ކަޕް މުބާރާތްތައް ހިމެނެއެވެ. މެސީ އާއި ކްރިސްޓިއާނޯ ރޮނާލްޑޯގެ ޕީކް ދުވަސްވަރު ނިމުމުން، ދުނިޔޭގެ އެންމެ މޮޅު ކުޅުންތެރިޔާގެ މަގާމަށް ނޭމާ އަންނާނެ ކަމަށް އޭރު ގިނަ ބަޔަކު ގަބޫލުކުރިއެވެ.

ނޭމާ، ލިއޮނެލް މެސީ އަދި ލުއިސް ސުއަރޭޒް ބާސެލޯނާގައި -- ފޮޓޯ/ ގެޓީ

ޕެރިހަށް ބަދަލުވުމާއި ކުރިމަތިވި ހުރަސްތައް

ފުޓުބޯޅައިގެ ދުނިޔެ ސިއްސުވާލުމަށްފަހު 2017 ވަނަ އަހަރު ޕެރިސް ސެންޓް ޖާމައިން (ޕީއެސްޖީ) އަށް ނޭމާ ބަދަލުވިއެވެ. މިއީ 222 މިލިއަން ޔޫރޯގެ އަގަކަށް ހެދި، މިއަދާ ހަމައަށްވެސް ފުޓުބޯޅައިގެ ތާރީހުގައި ހެދި އެންމެ އަގުބޮޑު ޓްރާންސްފާއެވެ. މި ބަދަލާއެކު އޭނާއަކީ ދުނިޔޭގެ އެއްވަނަ ކުޅުންތެރިޔާ ކަމުގައި ވެގެންދާނެ ކަމަށް ބެލެވުނެވެ.

ނަމަވެސް، ޕެރިހުގައި އޭނާގެ ދުވަސްތައް ވެގެންދިޔައީ މޮޅު ކުޅުމާ އެކު މާޔޫސްކަން އެކުލެވިގެންވާ ދުވަސްތަކަކަށެވެ. ފިޓްކޮށް ހުންނަ ކޮންމެ ފަހަރަކު ނޭމާ ވަނީ އާދަޔާހިލާފު މޮޅު ކުޅުމެއް ދައްކައި، ރީތި ގޯލުތަކެއް ޖަހައިފައެވެ. އެހެންނަމަވެސް، ތަކުރާރުކޮށް ކުރިމަތިވި އަނިޔާތަކުގެ ސަބަބުން އޭނާގެ ކުޅުމުގެ ރިދަމް ގެއްލި، ދިގު މުއްދަތަކަށް އެއް ފެންވަރެއްގައި ކުޅުން ދެމެހެއްޓުމަށް ހުރަސްއެޅުނެވެ. ޕީއެސްޖީގައި ހޭދަކުރި ދުވަސްތަކުގައި އަނިޔާގެ ސަބަބުން އޭނާއަށް 100 އަށްވުރެ ގިނަ މެޗު ގެއްލުނެވެ.

ނޭމާ އާއި މެސީ، ޕީއެސްޖީގައި -- ފޮޓޯ/ ގެޓީ

ބްރެޒިލްގެ ރަން ދަރިފުޅު

ބްރެޒިލްގެ ގައުމީ ޓީމަށް ބަލާއިރު، ދިހަވަރަކަށް އަހަރުވާންދެން ޓީމުގެ އެންމެ މުހިންމު ކުޅުންތެރިޔަކީ ނޭމާއެވެ. އޭނާ ވަނީ 2013 ވަނަ އަހަރުގެ ފީފާ ކޮންފެޑެރޭޝަންސް ކަޕް ކާމިޔާބުކޮށް، ފީފާ ވޯލްޑް ކަޕްގެ އެކި މުބާރާތްތަކުގައި ފާހަގަކޮށްލެވޭ ކުޅުމެއް ދައްކައިފައެވެ. އަދި 2016 ވަނަ އަހަރުގެ އޮލިމްޕިކްސްގައި ބްރެޒިލަށް ރަން މެޑަލް ހޯދައިދިނެވެ. މިއީ ބްރެޒިލްގެ ފުޓުބޯޅަ ތާރީހުގައި ލިބުނު މުހިންމު ކާމިޔާބީއެކެވެ.

ބައިނަލްއަގުވާމީ ކެރިއަރުގައި ނޭމާ ވަނީ ގިނަ ގޯލުތަކެއް ޖަހައި، އެސިސްޓްކޮށްފައެވެ. އޭނާ ވަނީ ޕެލޭގެ ރެކޯޑު މުގުރާލައި، 79 ގޯލާއެކު ބްރެޒިލްގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާގެ މަގާމު ހޯދައިފައެވެ. މިއާއެކު، ބްރެޒިލްގެ ތާރީހުގައި އުފެދުނު އެންމެ މޮޅު ކުޅުންތެރިންގެ ލިސްޓުން އޭނާ ޖާގަ ހޯދިއެވެ.

ވޯލްޑް ކަޕް 2026 ގެ ގަދަ 16 ގައި ނޯވޭ އަތުން ބަލިވި މެޗަށްފަހު ބްރެޒިލް ތަރި ނޭމާ -- ފޮޓޯ/ ގެޓީ

އަނިޔާގެ ހިތްދަތި ތަޖުރިބާތައް

ބަދުނަސީބަކީ އަނިޔާވުމެވެ. ފައިތިލައަށާއި، ކަކުލުގެ ލިގަމެންޓަށް ލިބުނު އަނިޔާތަކުގެ އިތުރުން މަސްގަނޑަށް ލިބުނު އެތައް އަނިޔާއެއް އޭނާ ތަހައްމަލުކުރިއެވެ. ގިނަ ފަހަރަށް މި އަނިޔާތައް ކުރިމަތިވީ ސީޒަނުގެ އެންމެ މުހިންމު ދުވަސްވަރު ނުވަތަ ބޮޑެތި މުބާރާތްތަކާ ދިމާކޮށެވެ.

ވޯލްޑް ކަޕް 2014 ގައި ކޮލަމްބިއާއާ ދެކޮޅަށް ކުޅުނު މެޗުގައި އޭނާގެ ބުރަކައްޓަށް ލިބުނު ސީރިއަސް އަނިޔާގެ ސަބަބުން، މުބާރާތުގެ އެންމެ ފަހު މަރުހަލާގައި ބްރެޒިލްގެ އެންމެ މުހިންމު ކުޅުންތެރިޔާއާ ނުލައި ކުޅެން ޖެހުނެވެ. ޕީއެސްޖީގައި ހޭދަކުރި ފަހު އަހަރުތަކުގައިވެސް ޗެމްޕިއަންސް ލީގުގެ ނޮކްއައުޓް މެޗުތަކާ ދިމާކޮށް އޭނާއަށް އަނިޔާވިއެވެ. ސައުދީ އަރަބިއްޔާގެ އަލް ހިލާލްއަށް ބަދަލުވި ފަހުން، 2023 ވަނަ އަހަރުގެ ފަހުކޮޅު ކަކުލަށް ލިބުނު ސީރިއަސް އަނިޔާއެއްގެ ސަބަބުން އަނެއްކާވެސް އޭނާގެ ކުޅުން ހުއްޓުމަކަށް އައެވެ. ކޮންމެ ފަހަރަކުވެސް ނޭމާ އެނބުރި އައިސް މޮޅު ކުޅުމެއް ދައްކަން ފަށާއިރަށް، އިތުރު އަނިޔާއަކާ ކުރިމަތިލާން ޖެހެއެވެ.

ވޯލްޑް ކަޕް 2014 ގައި ނޭމާއަށް އަނިޔާވެފައި -- ފޮޓޯ/ ގެޓީ

ތަފާސްހިސާބުތަކަށްވުރެ ބޮޑު ލެގަސީއެއް

ނޭމާގެ ކެރިއަރުގެ ވާހަކަ ހަމައެކަނި ތަފާސްހިސާބުތަކަކުން ކިޔައެއް ނުދެވޭނެއެވެ. އޭނާގެ ޖެހިލުންކުޑަ ކުޅުމާއި ޑްރިބަލްކުރުމުގެ ހުނަރުން އެތައް ޒުވާން ކުޅުންތެރިންނަކަށް ހިތްވަރު ލިބުނެވެ. ދުނިޔޭގެ އެކި ކަންކޮޅުތަކުގައި ކުޑަކުދިން އޭނާގެ ސްޓައިލާއި އުކުޅުތައް ކޮޕީކުރިއެވެ. ފުޓުބޯޅައަކީ މުނިފޫހިފިލުވައިދޭ ކުޅިވަރަކަށް ހެދުމުގައި އޭނާ މުހިންމު ދައުރެއް އަދާކުރިއެވެ.

ބައިނަލްއަގުވާމީ ފުޓުބޯޅައިން އޭނާ ރިޓަޔާ ކުރާއިރު، ބައެއް މީހުން އޭނާ ހޯދި ތަށިތައް ހަނދާންކުރާނެއެވެ. އަނެއް ބަޔަކު ހަނދާންކުރާނީ އޭނާއަށް ލިބުނު އަނިޔާތަކެވެ. ނަމަވެސް، ނޭމާ ދަނޑުމައްޗަށް އަރާ ކޮންމެ ފަހަރަކު ފުޓުބޯޅަ މެޗުތައް އިތުރަށް ޝައުގުވެރިވެގެންދިޔަކަމީ ދެބަސްވެވެން ނެތް ހަގީގަތެކެވެ. އޭނާގެ ލެގަސީ ބިނާވެފައިވަނީ ހަމައެކަނި ގޯލުތަކާއި މެޑަލްތަކުގެ މައްޗަކަށް ނޫނެވެ. އެއީ ސަޕޯޓަރުން އާޝޯހުކޮށްލި އެތައް ހިނދުކޮޅެއްގެ މައްޗަށެވެ. އަނިޔާތަކާ ނުލައި އޭނާގެ ކެރިއަރު ކުރިއަށް ދިޔަ ނަމަ، ފުޓުބޯޅައިގެ ތާރީހު ލިޔެވިފައި އޮންނާނީ މިއަށްވުރެވެސް ތަފާތުކޮށް ކަމަށް ވެދާނެއެވެ.