ރާއްޖޭގެ އިގްތިސޯދު ކުރިއަރުވައި، އިންވެސްޓްމެންޓްތަކަށް ފަހި މާހައުލެއް ބިނާކުރުމަށް އެމެރިކާ ސަރުކާރާއެކު މަޝްވަރާތަކެއް ރާއްޖެއިން ކޮށްފިއެވެ.

އެ މަޝްވަރާތައް ކުރިއަށްދިޔައީ ރައީސް އޮފީހުގައި، އެމެރިކާގެ އެސިސްޓެންޓް ސެކްރެޓަރީ އޮފް ސްޓޭޓް އެސް. ޕޯލް ކަޕޫރު، ރައީސް ޑރ. މުހައްމަދު މުއިއްޒުގެ އަރިހަށް ކުރެއްވި އިހުތިރާމުގެ ޒިޔާރަތުގެ ތެރެއިންނެވެ.

ރައީސް އޮފީހުން މިއަދު ބުނީ އެ ބައްދަލުވުމުގެ މައިގަނޑު މަގުސަދަކީ ދެގައުމުގެ ދެމެދުގައި އޮތް 60 އަހަރުވީ ގާތް ގުޅުން އިތުރަށް ހަރުދަނާކޮށް، އާ ދާއިރާތަކުން އެއްބާރުލުން އިތުރުކުރުމެވެ. އެގޮތުން ވިޔަފާރި، އިގްތިސޯދު، ފަތުރުވެރިކަން އަދި ކަނޑުގެ ސަލާމަތާއި ރައްކާތެރިކަން (މެރިޓައިމް ސެކިއުރިޓީ) ފަދަ މުހިންމު ދާއިރާތަކުން ގުޅިގެން މަސައްކަތް ކުރުމަށް އެމެރިކާގެ ފަރާތުން ޝައުގުވެރިކަމެއް ފާޅުކުރިކަމަށް ރައީސް އޮފީހުން ބުންޏެވެ.

އެ ބައްދަލުވުމުގައި ރައީސް ވަނީ، މި ސަރުކާރުގެ "މޯލްޑިވްސް ފަސްޓް" ސިޔާސަތުގެ ދަށުން ރާއްޖޭގެ ތަރައްގީއަށް ބޭނުންވާ މަޝްރޫއުތަކަށާއި، އިގްތިސޯދީ އެކި ދާއިރާތަކަށް ފުޅާކުރުމަށް ކުރާ މަސައްކަތުގައި ބޭރުގެ އިންވެސްޓްމެންޓްތަކަށް ރާއްޖެ ހުޅުވާލެވިފައިވާކަން ފާހަގަކުރައްވާފައިކަމަށް ރައީސް އޮފީހުން ބުންޏެވެ.

މީގެ އިތުރުން، ރާއްޖޭގެ އިގްތިސޯދަށް ފައިދާކުރާނެ ކަންކަމުގައި އެމެރިކާ ފަދަ ބައިވެރިންނާއެކު މަސައްކަތް ކުރުމުގެ މުހިންމުކަން ރައީސް ފާހަގަކުރެއްވިކަމަށް ރައީސް އޮފީހުން ބުންޏެވެ.

ރާއްޖެއާއި އެމެރިކާއާ ދެމެދުގައި ސިޔާސީ ގުޅުން 1966 ވަނަ އަހަރު ގާއިމުކުރެވުނު ފަހުން، މިއީ މި ގުޅުމަށް 60 އަހަރު ފުރޭ ތާރީހީ އަހަރަށް ވުމާއެކު، ދެ ފަރާތުންވެސް ވަނީ ކުރިއަށް އޮތް ތަނުގައި މި ގުޅުން އިތުރު އުސްމިންތަކަކަށް ގެންދިއުމަށް ތައްޔާރަށް ތިބިކަމުގެ ޔަގީންކަން ދެއްވާފައިކަމަށް ރައީސް އޮފީހުން ބުންޏެވެ.

އެ ބައްދަލުވުމުގައި ދެގައުމުގެ ދެމެދުގައި އޮތް ބަދަހި ގުޅުން ރަމްޒުކޮށްދީފައިވަނީ އެކަކު އަނެކަކަށް އިހުތިރާމްކުރުމާއި، ސަރަހައްދީ ހަމަޖެހުމަށް މަސައްކަތް ކުރުމުގެ ރޫހުގެ މައްޗަށްކަމަށް ރައީސް އޮފީހުން ބުންޏެވެ.