އިނގިރޭސި ޕްރިމިއާ ލީގުގައި ރޭ ޓޮޓެންހަމްއިން ކުޅުނު މެޗުގައި ޗެލްސީ ކައިރިން ބަލިވެއްޖެއެވެ.

ޗެލްސީ ދަނޑުގައި ރޭ ކުޅުނު މެޗުގައި އެޓީމުން ޓޮޓެންހަމް ބަލިކުރީ 2-1 ގެ ނަތީޖާއަކުންނެވެ. އެ ނަތީޖާއާއެކު ޓޮޓެންހަމްއަށް ވަނީ ޕްރެޝަރާ ކުރިމަތިވެފައެވެ. އެޓީމުން 17 ވަނައިގައި އޮތީ 37 މެޗުން 38 ޕޮއިންޓާއެކުގައެވެ. މިވަގުތު 18 ވަނައިގައި އޮތް ވެސްޓް ހޭމް، 37 މެޗުން 36 ޕޮއިންޓާއެކު އޮތް އިރު، ރެލިގޭޝަނުގެ އެންމެ ފަހު ޖާގަ ޔަގީންވާނީ އެންމެފަހު ދުވަހުއެވެ.

ޓޮޓެންހަމްއަށް އަމިއްލަ ބާރުގައި ސަލާމަތްވެވެން އޮތް ނަމަވެސް، އެންމެ ފަހު މެޗުން ޕޮއިންޓެއް ހޯދަން ޖެހެއެވެ. ވެސްޓް ހޭމް ސަލާމަތްވާނީ ޓޮޓެންހަމްގެ ނަތީޖާއަށް ބަރޯސާ ވެގެންނެވެ.

ޗެލްސީއަށްވެސް މި ސީޒަނުގައި އުނދަގޫތަކަކާ ކުރިމަތިވެފައިވީ ނަމަވެސް، ރޭގެ މެޗުގައި އެޓީމު ފެނުނީ ފުރުސަތުގެ ބޭނުންކުރިތަނެވެ.

ކުރީކޮޅުގައި ޓޮޓެންހަމްއިން ރަނގަޅަށް ފެށި ނަމަވެސް، މަތިއަސް ޓެލްއަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ބޭރަށެވެ. އެ ނުރައްކަލާ އެކުގައިވެސް ޗެލްސީން މަޑުމަޑުން ކުޅުން ރަނގަޅުކުރިއެވެ.

ކޯލް ޕާމާގެ ބާރު ހަމަލާއެއް އެންޓޮނިން ކިންސްކީ މަތަކުރި އިރު، 18 ވަނަ މިނެޓުގައި ޗެލްސީން ލީޑުވެސް ނެގިއެވެ. އެ ގޯލަކީ 25 ޔާޑް ދުރުން ފެނާންޑޭޒް ފޮނުވާލި ހަމަލާއެއް ގޯލަށް ވައްދާލައިގެން ކާމިޔާބުކުރި ގޯލެކެވެ. އޭގެފަހުން ފެނާންޑޭޒްގެ ހިލޭ ޖެހުމެއް ދަނޑިއަށް އަމާޒުވި އިރު، ޕާމާގެ އިތުރު ހަމަލާއެއްވެސް ފެނުނެވެ.

އަންނަ ސީޒަނުން ފެށިގެން ޒަބީ އެލޯންސޯގެ ކޯޗުކަމުގައި ނުކުންނަ ޗެލްސީން ދެވަނަ ހާފުގައި ނަތީޖާ ފުޅާވެސް ކުރިއެވެ. އެ ގޯލް ޖަހައިދިނީ އަންދްރޭ ސަންޓޯސްއެވެ. އެއީ 67 ވަނަ މިނެޓުގައެވެ.

އޭގެފަހުން ސަލާމަތްވުމަށް ޓޮޓެންހަމްއިން މެޗު އެއްވަރުކުރަން މަސައްކަތް ކުރިއެވެ. ރިޗާލިސަންގެ ގޯލަކުން ޓޮޓެންހަމްއިން ފަރަގު ކުޑަކުރި ނަމަވެސް، ޕަޕޭ މަޓާ ސާއާއި ޖޭމްސް މެޑިސަންއަށް ލިބުނު ފުރުސަތުތަކުގެ ބޭނުމެއް ނުހިފުނެވެ.