ޓްރާންސްޕޯޓް މިނިސްޓްރީގެ ތެރޭގައި ހިމެނޭ، ސިވިލް އެވިއޭޝަން، އެ މިނިސްޓްރީ ދަށުން ވަކިކޮށް، ޓޫރިޒަމް އެންޑް ސިވިލް އެވިއޭޝަން މިނިސްޓްރީގެ ނަމުގައި އާ މިނިސްޓްރީއެއް އުފައްދައިފިއެވެ.

ޓޫރިޒަމް މިނިސްޓްރީގެ މަގާމުގައި ހުންނެވި ތޯރިގު އިބްރާހިމް މިއަދުވަނީ އެ މަގާމުން އިސްތިއުފާ ދެއްވައިފައެވެ.

ރައީސް އޮފީހުގައި މިރޭ ބޭއްވި ރަސްމިއްޔާތެއްގައި ޓޫރިޒަމް އެންޑް ސިވިލް އެވިއޭޝަން މިނިސްޓަރުގެ މަގާމަށް އައްޔަންކުރައްވާފައިވަނީ ޓްރާންސްޕޯޓް މިނިސްޓަރަކަށް ހުންނެވި މުހައްމަދު އަމީނެވެ.

ރައީސް އޮފީހުންވަނީ ޓްރާންސްޕޯޓް މިނިސްޓްރީގެ މަސައްކަތްތައް، އިކޮނޮމިކް މިނިސްޓްރީގެ ދަށަށް ބަދަލުކޮށް، އިކޮނޮމިކް ޑިވެލޮޕްމެންޓް، ޓްރާންސްޕޯޓް، އެންޑް ޓްރޭޑްގެ ނަމުގައި އާ މިނިސްޓްރީއެއް އުފައްދައި މިނިސްޓަރުގެ މަގާމަށް މުހައްމަދު ސައީދު އައްޔަން ކުރައްވައިފައެވެ.