ހުޅުމާލެއިން 232 ބަނގުރާ ފުޅިއާއެކު 3 ބިދޭސީއަކު އަތުލައިގެންފިއެވެ.

އެ މައްސަލައިގައި ހައްޔަރުކޮށްފައިވަނީ އެމްޑީ ރިޔާސް އުއްދީން، ބަންގްލަދޭޝް (19އ)، އެމްޑީ އަޝްރަފުލް އަލަމް، ބަންގްލަދޭޝް (27) އަދި ޔާސިރް ހަމީދު، ޕާކިސްތާން (24އ) އެވެ.

ފުލުހުން މިއަދު ބުނީ އެ ތިން މީހުންނަކީވެސް ފުޅާ ދާއިރާއެއްގައި ބަނގުރަލުގެ ވިޔަފާރިކޮށް ބަނގުރާ ބޭނުންކުރާ ކަމުގެ ތުހުމަތުކުރެވޭ ބައެއް ކަމަށެވެ.

26 އޮކްޓޫބަރު 2025، ރޭ ދަންވަރު ފުލުހުން ހުޅުމާލެއިން އަތުލައިގަތް ބަނގުރާފުޅިތައް ---- ފޮޓޯ: ޕޮލިސް

މި ތިން މީހުން ހައްޔަރުކޮށްފައި ވަނީ ރޭ ދަންވަރުގެ ވަގުތެއްގައި ހުޅުމާލޭގެ ފުލުހުން ރަށުތެރެ ޕެޓްރޯލްކުރުމުގެ ތެރޭގައިކަމަށް ފުލުހުން ބުންޏެވެ.

ފުލުހުން ޕެޓްރޯލުކުރަމުން ދިޔައިރު ފުލެޓް 100 ކައިރީގައި އެ މީހުން ފޮށިތަކަކާއި ފޮށިގަނޑުތަކެއް ގެންގުޅޭތީ ތުހުމަތުކުރެވިގެން އެ ތަކެތި ބަލައިފާސްކުރިއިރު ބަނގުރާ ކަމަށް ބެލެވޭ އެއްޗެއްހުރި 500 އެމްއެލްގެ 232 ފުޅި ފެނުނުކަމަށް ފުލުހުން ބުންޏެވެ.

އެ ތަނުން އެކަކު ދިރިއުޅޭ އެޕާޓްމަންޓު ބަލައިފާސްކުރިއިރު ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 49 ފުޅި ފެނުނުކަމަށްވެސް ފުލުހުން ބުންޏެވެ.