ގދ. އަތޮޅުގެ ފަޅު ރަށެއް ކަމަށްވާ ގަމުން، ޑިންގީއެއްގައި ދަތުރުކުރަމުންދިޔަ މީހަކު ގެއްލިގެން ހޯދަން ފަށައިފިއެވެ.

ފުލުހުން މީޑިއާތަކަށް މިރޭ ފޮނުވި މެސެޖެއްގައި ބުނީ މިއަދު ހެނދުނު 9:30 ހާއިރު ގދ. ގައްދޫން އެ އަތޮޅު ގަމަށް ޑިންގީއެއްގައި ދަތުރުކުރި 75 އަހަރުގެ ފިރިހެނެއްގެ ހަބަރުވެފައި ނުވާ މައްސަލައެއް މިއަދު ހަވީރު 5:05 ހާއިރު ރިޕޯޓުކޮށްފައިވާ ކަމަށެވެ.

މިހާތަނަށް ބެލިބެލުމުން މިއަދު ހެނދުނު 11:15 ހާއިރު އެ މީހާ ގަމުން ފުރާފައިވާ މައުލޫމާތު ލިބިފައިވާ ކަމަށާއި އެ މީހާ އެންމެ ފަހުން ފެނުނު އިރު، ލައިގެން ހުރީ ނޫ ކުލައިގެ އަތްކުރު ގަމީހަކާއި ކަޅުކުލައިގެ ސޯޓެއް ކަމަށް ފުލުހުން ބުންޏެވެ.

ފުލުހުން ބުނީ އެ މީހާ ހޯދުމަށް ކުރަމުންދާ މަސައްކަތްތަކުގެ ތެރެއިން، އެމްއެންޑީއެފް ސައުތު ރީޖަން ކޯސްޓް ގާޑުން ބޭރު ކަނޑުގެ ސަރަހައްދު ބެލުމުގެ މަސައްކަތް ކުރަމުންދާ ކަމަށެވެ. އަދި ގަމާއި އެ ރަށް ކައިރި ފަޅު ރަށްތައް ބެލުމުގެ މަސައްކަތް ވެސް ކުރަމުންދާ ކަމަށް ފުލުހުން ބުންޏެވެ.