Mihaathanah 12.81 percent meehun vote laifi

ރިޔާސީ އިންތިހާބުގައި ވޯޓުލުމުގެ ޝަރުތު ހަމަވާ މީހުންގެ ތެރެއިން، މިހާތަނަށް ވޯޓު ލާފައިވަނީ، 12.81 ޕަސެންޓް މީހުން ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

މީގެ އިރުކޮޅެއް ކުރިން އީސީން ކުރި ޓުވީޓެއްގައި ބުނެފައި ވަނީ، މިއަދު 10:00 އާ ހަމަޔަށް މުޅި ރާއްޖެއިން ވޯޓު ލާފައި ވަނީ 36،163 މީހުން ކަމަށެވެ އެއީ 12.81 ޕަސެންޓު މީހުން ކަމަށްވެސް ބުނެފައިވެއެވެ. އޭގެ ތެރޭގައި ހިމެނެނީ 22،403 ފިރިހެނުންނާއި 13،760 އަންހެނުންނެވެ.

ރާއްޖޭގެ ހުރިހާ ސަރަހައްދެއްގައި ވޯޓުލުުން ފަށާފައި ވަނީ މިއަދު ހެނދުނު 8:00 އިން ފެށިގެންނެވެ.

އިލެކްޝަންސް ކޮމިޝަނުން ބުނީ 8:00 އިން ފެށިގެން ވޯޓުލުން ފަށާފައިވާ އިރު، ހަވީރު 4:00 ގައި ވޯޓު ފޮށިތައް ދަށުގައި ކިޔު ނެތް ފޮށިތައް ބަންދު ކުރާނެ ކަމަށެވެ. ނަމަވެސް ފޮށިދޮށުގައި ވޯޓުލާން ކިއު އޮތް ނަމަ، 4:00 އިން ފެށިގެން އެ ކިއު ބަންދުކޮށް، ވޯޓު ފޮށި ބަންދު ކުރާނީ ކިއުގައި ތިބި މީހުން ވޯޓުލާ ނިމުމުން ކަމަށްވެސް ބުންޏެވެ. އެއަށްފަހު ވޯޓު ގުނަން ފަށާނީ ފޮށި ބަންދުކުރާތާ، 30 މިނެޓު ފަހުންނެވެ.

ފަހުން ވޯޓުލާން މަޑުނުކޮށް އަވަހަށް ވޯޓު ލުމުގެ ކަންކަން ނިންމުމަށް އިލެކްޝަންސް ކޮމިޝަނުން ވަނީ އިލްތިމާސް ކޮށްފައެވެ.

މިފަހަރުގެ އިންތިހާބުގައި ވޯޓުލުމުގެ ހައްގުލި ބިފައިވަނީ 282،395 މީހުންނަށެވެ. މީގެ ތެރޭގައި އަލަށް ވޯޓުލާ 27000 އަށްވުރެ ގިނަ މީހުން ހިމެނެއެވެ. ވޯޓު ލުމަށްޓަކައި ރާއްޖެ އާއި ރާއްޖެއިން ބޭރުގައި 574 ވޯޓު ފޮށި މިފަހަރު ވަނީ ބަހައްޓައިފައެވެ.

ރާއްޖޭން ބޭރުގެ ފަސް ގައުމެއްގައި ވޯޓު ފޮށި ބަހައްޓާފައިވެއެވެ. އެއީ ސްރީލަންކާގެ ކޮލަމްބޯ އާއި، އިންޑިއާގެ ޓްރެވެންޑްރަމާއި، މެލޭޝިއާގެ ކުއަލަލަމްޕޫރުގެ އިތުރުން އިނގިރޭސިވިލާތުގެ ލަންޑަނާއި، ދުބާއީއެވެ. އަދި 65 ރިސޯޓަކާއި ފަސް ޖަލެއްގައި ވޯޓު ފޮށި ބަހައްޓާފައިވެއެވެ.

ވޯޓު ލުމުގެ ކަންކަން ހަވީރު ހަތަރެއްގެ ފަހުން ނިމި ވޯޓު ފޮށިތައް ގުނަމުން އަންނަ ވަރަކަށް، ނަތީޖާ އިއުލާންކުރަމުން ގެންދާގޮތަށް ވަނީ ހަމަޖެހިފައެވެ. މިރޭގެ ވަގުތެއްގައި އިންތިހާބުގެ ވަގުތީ ނަތީޖާއަކާ ހަމައަށް ދެވޭނެއެވެ.

މި އިންތިހާބަކީ ރާއްޖޭގެ ތާރީހުގައި ވެސް އެންމެ ގިނަ ކެންޑިޑޭޓުން ރިޔާސީ އިންތިހާބެއްގައި ވާދަކުރާ އިންތިހާބެވެ. އިސްލާހު ކުރި ގާނޫނުއަސާސީއާ އެކު 2008 ވަނަ އަހަރު ރާއްޖެއަށް ތައާރަފުވި މަލްޓި ޕާޓީ ނިޒާމަށްފަހު، މިއަދު ބާއްވާ ހަތަރު ވަނަ ރިޔާސީ އިންތިހާބުގައި 8 ކެންޑިޑޭޓުން ވާދަ ކުރެއެވެ.

އޭގެ ތެރޭގައި ހިމެނެނީ، ފަސް ސިޔާސީ ޕާޓީއަކުން ވާދަކުރައްވާ ފަސް ކެނޑިޑޭޓަކާއި އަމިއްލަގޮތުން ވާދަކުރައްވާ ތިން ކެންޑިޑޭޓުންނެވެ.