ގަތަރު ވޯލްޑް ކަޕްގެ ތިންވަނަ ހޮވާ، ބްރޯންޒް ފައިނަލްގައި ކްރޮއޭޝިއާއާއި މޮރޮކޯ ވާދަކުރާ މެޗުގެ ލައިވް ބްލޮގަށް "ވަން" ގެ ކިޔުންތެރިންނަށް މަރުހަބާ!

މިފަހަރުގެ ވޯލްޑް ކަޕްގެ ގްރޫޕް ސްޓޭޖުގައިވެސް މޮރޮކޯއާއި ކްރޮއޭޝިއާ ވާދަކުރި. އެ މެޗު ގޯލެއް ނުޖެހި ވީ އެއްވަރު. ކްރޮއޭޝިއާ ތިންވަނަ ހޮވާ މެޗަށް ނުކުންނަނީ ސެމީ ފައިނަލުގައި އާޖެންޓީނާ ކައިރިން ބަލިވެގެން. އަނެއްކޮޅުން ވޯލްޑް ކަޕްގައި ތަފާތު ހައިރާންކުރުވަނިވި ދަތުރެއްގައި ކުރިއަށް ދިޔަ މޮރޮކޯއިން ތިންވަނަ ހޮވާ މެޗުގައި ނުކުންނަނީ ސެމީ ފައިނަލުގައި ފްރާންސް އަތުން ބަލިވެގެން.

  • ކްރޮއޭޝިއާ - ލަޓްކޯ ޑަލިޗް

"އަހަރެމެންނަށް މިއީ ބޮޑު މެޗެއް، ބޮޑު މުބާރާތެއްގެ ބޮޑު މެޗެއް. މިއީ މެޑައްޔަކަށް ނުކުންނަ ސީރިއަސް މެޗެއް. މިއީ މަހެއްވެސް ނުވަނީސް ޓީމުން ކުޅެންޖެހޭ ހަތްވަނަ މެޗު. އަހަރެމެން ވަރުބަލިވެފައި މި ތިބީ. އޭގެ ސަބަބުން ދިމާވާ އަނިޔާތައްވެސް ޓީމުގައި އެބަހުރި. އަހަރެން އަމިއްލައަށް ބުނިން ހުރިހާ ކުޅުންތެރިން ކައިރީ، އަނިޔާތައް ރިޕޯޓުކޮށް، ފިޒިކަލް ސްޓޭޓަސްވެސް ރިޕޯޓުކުރަން. އެންމެން ބޭނުންވޭ މި މެޗު ކުޅެން. އެކަމަކުވެސް ވަރަށް ސަމާލުވެގެން މި މެޗަށް ނެރޭ ކުޅުންތެރިން ނަގަން ޖެހޭނީ. އެއީ 100 ޕަސެންޓްގައި ނެތް ކުޅުންތެރިޔަކު އަރުވައިގެން ބަދަލުކުރުމަކީ އަހަރެން ބޭނުންވާ ގޮތެއް ނޫންވީމަ،"

"މޮރޮކޯއަކީ މުބާރާތުގެ ސަޕްރައިޒިން ޓީމު. އެ ޓީމުން ކޮލިޓީއާއި އެކުވެރިކަން އަދި ހިތްވަރު ދައްކައިދީފި. މޮރޮކޯއަށް މީހުން ދޭ ލޯތްބާއި ސަޕޯޓް އެ ޓީމަށް ހައްގު. މުބާރާތް ކުރިއަށްދިޔަ ވަރަކަށް މޮރޮކޯ ދިޔައީ ވަރުގަދަވަމުން. އެހެންވީމަ ފުރަތަމަ މެޗާ މި މެޗު ތަފާތުވާނެ. އަހަރެން މޮރޮކޯއަށް މަރުހަބާ ކިޔަން. މޮރޮކޯއަށް ވަރަށް އިހުތިރާމުވެސް ކުރަން. މި މެޗަކީ ދެ ޓީމަށްވެސް ފައިނަލަކަށްވާނެ،"

  • މޮރޮކޯ - ވަލީދު ރަކްރާކީ

"ފުރަތަމަ މެޗުގައި އަހަރެމެން ބަލިނުކުރެވުމުން ކްރޮއޭޝިއާއަށް ވަރަށް ބޮޑެތި ފާޑުކިޔުންތަކެއް އަމާޒުވި. އަހަރެމެންނަކީ އޭރު ސަޕްރައިޒިން ޓީމެއް ނޫން. އެކަމަކު އެ ހިސާބުން ފެށިގެން ގޮސް އަހަރެމެން ދެ ޓީމުވެސް މިހާރު މިއޮތީ ސެމީ ކުޅެފައި. މިހާރު ކްރޮއޭޝިއާއަށްވެސް އިހުސާސްވެފައި އޮންނާނީ އެއީ ދުނިޔޭގެ އެންމެ ވަރުގަދަ ޓީމުތަކުގެ ތެރޭގައި ހިމެނޭ ޓީމެއްކަން. ފުރަތަމަ މެޗަށް ނުކުތް އިރު، ވަރަށް ބޮޑަށް ދެ ޓީމަށްވެސް ފަސްޖެހެވުނު. އެކަމަކު މި މެޗަށް ނުކުންނަ އިރު، ދެ ޓީމުވެސް މިއޮތީ މުބާރާތަށް ރަނގަޅަށް ހޭނިފައި،"

"އަހަރެމެން ހަގީގަތުގައި ބޭނުންވީ ފައިނަލުގައި ކުޅެން. އެކަމަކު ދެން އޮތީ ތިންވަނަ ހޯދުން. އަހަރެމެން ބޭނުންވަނީ އެފްރިކާގެ ޝަރަފުގައި ޕޯޑިއަމްގައި ނިންމާލަން. ވަރަށް ބޮޑަށް ވަރުބަލިކަން އެބަހުރި. އެހެންވީމަ މެޗުން މޮޅުވާން އުނދަގޫތަކެއް ހުންނާނެ. ނަމަވެސް އަދި އަހަރެމެންގެ ކުޅުންތެރިންގެ ހިތްވަރަށް ބަދަލެއް ނާދޭ. އަހަރެމެން ޓީމު އޮތީ ތިންވަނައަށް ބޭނުވެފައި. މެޑައްޔަކަށް ބޭނުންވެފައި،"