ގަތަރު ވޯލްޑް ކަޕް 2022 ގެ ގްރޫޕް އީގެ ތިންވަނަ މެޗުގައި ޖަޕާނާއި ކޮސްޓަ ރީކާ ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

މިއަދުގެ މެޗަށް ޖަޕާނުން ނުކުންނަނީ ގްރޫޕް ސްޓޭޖުގެ ފުރަތަމަ މެޗުގައި ޖަރުމަނު ބަލިކޮށްފައި އޮވެގެން. މެޗުން މޮޅުވެއްޖެ ނަމަ އެޓީމަށް ގަދަ 16ގެ ފުރުސަތު ވަރަށް ބޮޑުވާނެ. މިއަދުގެ މެޗުން ޖަޕާން މޮޅުވެ، ދެން މިރޭ ސްޕެއިނާއި ޖަރުމަނު ކުޅޭ މެޗުން ސްޕެއިން މޮޅުވިޔަސް، ނޫނީ އެ މެޗު އެއްވަރު ވިޔަސް، ޖަޕާން ގަދަ 16 އަށް ދާނެ. އަނެއްކޮޅުން ކޮސްޓަ ރީކާ ނުކުންނަނީ ބޮޑު ބައްޔެއް ހަނދާން ނައްތާލަން. އެޓީމުން ފުރަތަމަ ކުޅުނު މެޗުގައި ބަލިވީ ސްޕެއިން އަތުން 7-0 އިން.

  • ޖަޕާން - ހަޖިމީ މޮރިޔަސޫ

"އަހަރެން ވަރަށް ފަހުރުވެރިވޭ ޖަރުމަނު ކައިރީގައި ހޯދި މޮޅަށް. އެކަމަކު އެއީ ކޮސްޓަ ރީކާ ބަލިކުރެވޭނެ ކަމުގެ ޔަގީންކަމެއް ނޫން. ކޮސްޓަރީކާގައި އެތަކެއް ވަރުގަދަ ކުޅުންތެރިންނެއް އެބަ ތިބި. އަދި ހާއްސަކޮށް ސްޕެއިން ކައިރިން ބަލިވުމުން އެ ޓީމުން އަހަރެމެންނާ ދެކޮޅަށް ނުކުންނާނީ ވަރުގަދަކޮށް،"

  • ލުއިސް ފެނާންޑޯ ސުއަރޭޒް

"އަލުން ދިރުމެކޭ؟ އެކަން ކުރާކަށް ނުޖެހޭނެ. އަދި އަހަރެމެން މަރުވީކީ ނޫން. ދިހަ އަހަރު ކުރިން ހޮންޑިއުރަސް އިން ކެނެޑާ ބަލިކުރި 8-1ގެ ނަތީޖާއަކުން. މިހާރު ކެނެޑާއަކީ ވަރުގަދަ ޓީމެއް. އަދި އެކަމަށް ފާއިތުވީ އެންމެ 10 އަހަރު. އެއީ ގޯހުން ދަސްކުރީ. ކޮންމެ ބަޔަކުވެސް ހެދޭ ގޯސްތަކުން ޖެހޭނީ ދަސްކުރަން. އަހަންނަށް އެތައް ފާޑެއް ކިޔަސް އަހަރެން އެނބުރި އަންނާނަން. އެއީ އެނބުރި އަންނަން ބޭނުން ނުވާނީ ލޯސާސް ކަމަށްވާތީ،"