ގަތަރު ވޯލްޑް ކަޕް 2022 ގެ ގްރޫޕް ޑީގެ ފުރަތަމަ މެޗުގައި ޓިއުނީޝިއާއާއި ޑެންމާކު ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

ޓިއުނީޝިއާ މިހާތަނަށް ފަސް ވޯލްޑް ކަޕެއްގައި ވާދަކޮށްފައިވޭ. އޭގެ އިތުރުން އެފްރިކާ ކަޕް އޮފް ނޭޝަންސްގައި 20 ފަހަރު އަދި އެފްރިކާ ނޭޝަންސް ޗެމްޕިއަންޝިޕްގައި ދެ ފަހަރަކު ވާދަކޮށްފައިވޭ. ޓިއުނީޝިއާ އިން ވަނީ އެފްރިކާ ކަޕް އޮފް ނޭޝަންސް 2004 އަދި އެފްރިކާ ނޭޝަންސް ޗެމްޕިއަންޝިޕް 2011 ގެ ޗެމްޕިއަންކަން ހޯދައިފައި. ޓިއުނީޝިއާ އިން ވާދަކުރި ފަސް ވޯލްޑް ކަޕު ވެސް ނިންމާލީ ގްރޫޕު ސްޓޭޖުން. ނަމަވެސް އެއިން ކޮންމެ ވޯލްޑް ކަޕެއްގައި ވެސް ޓިއުނީޝިއާ އިން ރަނގަޅު ފައިޓެއް ދީފައިވޭ.

ޑެންމާކުގެ ފުރަތަމަ ވޯލްޑް ކަޕަކީ 1986 ވަނަ އަހަރު މެކްސިކޯގައި ބޭއްވި ވޯލްޑް ކަޕް. އެ ވޯލްޑް ކަޕުގެ ގްރޫޕު ސްޓޭޖުގައި ޑެންމާކުން ކުޅުނު ތިން މެޗުން ވެސް ވަނީ މޮޅުވެފައި. އެއަށްފަހު ކުޅުނު ދެ ވޯލްޑް ކަޕުން ފުރުސަތު ނުލިބުނު ޑެންމާކުން ދެން ވާދަކޮށްފައިވަނީ ވޯލްޑް ކަޕް 1998 ގައި. އެއީ ޑެންމާކުގެ އެންމެ ކާމިޔާބު ވޯލްޑް ކަޕް. ވޯލްޑް ކަޕް 2002 އާއި ވޯލްޑް ކަޕް 2018 ގެ ގަދަ 16 އަށް ޑެންމާކު ދަތުރުކުރި އިރު, ވޯލްޑް ކަޕް 2010 ނިންމާލީ ގްރޫޕު ސްޓޭޖުން. ވޯލްޑް ކަޕް 2006 އާއި 2014 އަށް ޑެންމާކް ކޮލިފައިވެފައެއް ނުވޭ. ޑެންމާކަކީ ޔޫރޯ 2020 ގެ ސެމީގައި ކުޅުނު ޓީމެއް.