ވަށާޖެހޭ ސިޔާސަތެއްގެ ތެރެއިން ނަފުސާނީ ހިދުމަތްތައް ލިބޭނެ ނިޒާމެއް ގާއިމުކުރަން ގޮވާލައި މަޖިލީހަށް ގަރާރެއް

ވަށާޖެހޭ ސިޔާސަތުތަކެއްގެ ތެރެއިން ރާއްޖޭގައި ނަފުސާނީ ހިދުމަތްތައް ލިބޭނެ ނިޒާމެއް ގާއިމުކުރުމަށް ސަރުކާރަށް ގޮވާލައި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބު ރައީސް އަދި ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ގަރާރެއް ހުށަހަޅައިފިއެވެ.

އެ ގަރާރު ހުށަހަޅުއްވާ ސަބަބެއް ކަމަށް ރިޔާޒު ވިދާޅުވީ، ރާއްޖޭގައި ނަފުސާނީ ބަލިތަކާއި އެ ބަލިތަކަށް ފަރުވާދިނުމާއި ފަރުވާ ހޯދުމާއި އެ ކަންކަމާމެދު އާއްމު ހޭލުންތެރިކަން އޮތް މިންވަރަށް ރިއާޔަތްކުރުމާއެކު، ނަފުސާނީ ސިއްހަތު ނުވަތަ ނަފުސާނީ ދުޅަހެޔޮކަމާ ގުޅޭ ހިދުމަތްތަކާއި ނަފުސާނީ ސިއްހަތުގެ ފަރުވާ ދިނުމާބެހޭ ހަރުދަނާ އޮނިގަނޑެއް ރާއްޖޭގައި ނެތުމުން ކަމަށެވެ.

އަދި ރާއްޖޭގެ އާބާދީއާއި އެކަށޭނަ މިންވަރަށް އެ ހިދުމަތްތައް ލިބެން ނެތުމާއި ސަރުކާރުން ހިންގާ އެންމެ ބޮޑު ހޮސްޕިޓަލް އައިޖީއެމްއެޗުން އެކަށޭނަ އަވަސްމިނުގައި ނަފުސާނީ ފަރުވާގެ ފުރުސަތު ނުލިބުމަކީވެސް އެ ގަރާރު ހުށަހެޅި ސަބަބެއް ކަމަށް ވިދާޅުވިއެވެ.

ރިޔާޒު ވިދާޅުވީ، ސަރުކާރުގެ ސްޓްރެޓީޖިކް އެކްޝަން ޕްލޭން 2019–2023 ގައި ނަފުސާނީ ދުޅަހެޔޮ ކަމަށް ބޭނުންވާ ފަރުވާގެ ކަންކަން ކުރިއަރުވައި އެފަދަ ބަލިތައް ތަހައްމަލުކުރަމުންދާ މީހުންނަށް ފެންވަރު ރަނގަޅު ސިއްހީ ފަރުވާ ލިބޭނެ ނިޒާމެއް ތަންފީޒުކުރާނެ ކަމަށް ބަޔާންކޮށް އެކަށައަޅާފައިވާ ސިޔާސަތު (ނަމްބަރު 8) އަށް އެކަށީގެންވާ ގޮތަށް ތަންފީޒު ކުރުމަށް ސަރުކާރުން އަހަންމިއްޔަތު ކަމެއް ނުދެއެވެ.

ގަރާރުގައިވާ އެހެން ކަންކަން:

އެ ގަރާރުގައި މެންބަރު ރިޔާޒް ވަނީ، ނަފުސާނީ ބަލި ތަހައްމަލުކުރާ ފަރާތްތަކަށް ނަފުސާނީ ބަލިތަކަށް ބޭނުންވާ ފަރުވާ ދިނުމަށް އެކަށީގެންވާ ނިޒާމެއް ގާއިމުކުރުމަށް ގޮވާލައިފައެވެ.