މިނިކާ ބާޒަކަށް ނުވާނެ ކަމަށާއި ފުރުސަތު ދެއްވައިފި ނަމަ 2023 ގައި އޮންނަ ރިޔާސީ އިންތިހާބަށް ނުކުމެވަޑައިގަންނަވަން ތައްޔާރުކަމަށް ކުރީގެ ރައީސް އަދި އިދިކޮޅު ކޯލިޝަނުގެ އެޑުވައިޒަރު ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.

ޑރ. ވަހީދު އެހެން ވިދާޅުވެފައިވަނީ، ދިވެހި ރާއްޖޭގެ އަޑުން ގެނެސްދޭ 'އަހާށޭ ބުނާނަން' ޕްރޮގްރާމުގައި ރައްޔިތުން އެމަނިކުފާނަށް ފޮނުއްވެވި ސުވާލުތަކަށް ޖަވާބު ދެއްވަމުންނެވެ.

އެ ޕްރޮގްރާމްގައި ވާހަކަފުޅު ދައްކަވަމުން ޑރ. ވަހީދު ވިދާޅުވީ، އިދިކޮޅުން ގަބޫލު ކުރަނީ، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލް ގައްޔޫމަށް ކުރިއަށް އޮތް ރިޔާސީ އިންތިހާބުގައި ވާދަކުރެއްވޭނެ ކަމަށެވެ. އަދި އުންމީދަކީ ކުރިއަށް އޮތް ދެ އަހަރު ތެރޭގައި އެމަނިކުފާނު މިނިވަންވެވަޑައިގަތް އިންތިހާބުގައި ވާދަކުރެއްވޭނެ މަގު ފަހިވެގެން ދިއުން ކަމަށް ވެސް އެމަނިކުފާނު ވިދާޅުވި އެވެ.

ޕްރައިމަރީއެއް ބާއްވައިފި ނަމަ ކުރިމަތިލައްވާނަންތޯ ސުވާލު ދެންނެވުމުން ޑރ. ވަހީދު ވިދާޅުވީ، އެކަމަށް ގޮތެއް ނިންމެވުމަށް އަދި އަވަސް ކަމަށާއި ނަމަވެސް އަދިވެސް ހުންނެވީ ގައުމަށް ހިދުމަތް ކުރެއްވުމަށް ތައްޔާރަށް ކަމަށެވެ.

"އެއީ ޕީޕީއެމް/ޕީއެންސީ ކޯލިޝަންގެ ޑިސިޝަނެއް ދެއްތޯ. އަޅުގަނޑު ގަބޫލުކުރާ ގޮތުގައި ރައީސް ޔާމީނަށް ކުރިމަތި ނުލެއްވޭ ހާލަތެއް ދިމާވެއްޖެ ނަމަ ޕާޓީގެ ފަރާތުން ޕްރައިމަރީއެއް ބާއްވަވާނެ. އޭރުން ދެން އެނގޭނީ،" ޑރ. ވަހީދު ވިދާޅުވި އެވެ.

އަމަނިކުފާނު ރައީސް ކަމަށް އިތުރު ދައުރަކަށް އިންތިހާބުވި ނަމަވެސް ލިބޭނެ އިތުރު މޮޅެއް ނެތް ކަން ރައީސް ވަހީދު ފާހަގަކުރެއްވި އެވެ. އެހެން ނަމަވެސް ގައުމަށް ހިދުމަތް ކުރުމަށް ލިބޭ ކޮންމެ ފުރުސަތެއްގެ ބޭނުން ހިއްޕެވުމަށް ތައްޔާރަށް ހުންނެވި ކަމަށް ވެސް އަމަނިކުފާނު ވިދާޅުވި އެވެ.

"ރައީސް ޔާމީނަށް ކުރިމަތި ނުލެއްވޭނެ ގޮތަކަށް ކަންތައްތައް ދިމާވެއްޖެ ނަމަ ދެން ޕާޓީން ނިންމަވާނީ މުޅި ގައުމަށް ވެސް އަދި ޕާޓީއަށް ވެސް އެންމެ ރަނގަޅު ގޮތެއް. އެ އެންމެ ރަނގަޅު ގޮތަކީ އަޅުގަނޑު އެ މަގާމަށް ކުރިމަތިލުން ކަމުގައިވާ ނަމަ އެއީ އެންމެ ރަނގަޅު ގޮތް،" ޑރ. ވަހީދު ވިދާޅުވި އެވެ.

ރައީސް ޔާމީން ވިދާޅުވެފައިވާ ފަދަ 'މިނިކާ ބާޒަކަށް' އެމަނިކުފާނު ނުވާނެ ކަމަށް ޑރ. ވަހީދު ވިދާޅުވި އެވެ. އަދި އެ 'މިނިކާ ބާޒަކީ' ރިޔާސީ އިންތިހާބުގެ ބޭނުމުގައި ޕާޓީގެ ބޭރުން އަންނަ ބަޔެއް ކަމަށް ފާހަގަކުރެއްވި އެވެ. އެމަނިކުފާނު އެ ލިސްޓުން އުނިވާނެ ކަމަށް ވެސް ވިދާޅުވި އެވެ. ސަބަބެއްގެ ގޮތުގައި ރައީސް ވަހީދު ވިދާޅުވީ، އެމަނިކުފާނަކީ 2013 ވަނަ އަހަރުން ފެށިގެން ޕީޕީއެމްއާ ގުޅިވަޑައިގެން އެ ޕާޓީއާ އެކު މަސައްކަތް ކުރައްވަމުން ގެންދަވާ ބޭފުޅަކަށ ވުން ކަމަށް އެމަނިކުފާނު ފާހަގަކުރެއްވި އެވެ.

"އެހެންވީމަ ބޭރުން އަންނަ މީހަކާ ވަރަށް ތަފާތު ވާނެ ކަމަށް އަޅުގަނޑު ގަބޫލު ކުރަނީ،"، 'މިނިކާ ބާޒެއް' ފަދަ ފަރާތަކަށް އެމަނިކުފާނު ނުވާނެ ކަމުގެ ޔަގީންކަން ރައީސް ޔާމީންގެ ސަޕޯޓަރުންނަށް ދެއްވަމުން ރައީސް ވަހީދު ވިދާޅުވި އެވެ.