ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ވެރިކަމުގައި ކޮސޯވޯގެ މިނިވަންކަން ރާއްޖޭން ގަބޫލުކުރުމުގައި އޭރުގެ ފޮރިން މިނިސްޓަރު ޑރ. އަހުމަދު ޝަހީދާއި އިސް އޮފިޝަލުންތަކެއް ކޮރަޕްޝަން ހިންގާފައިވާ ކަމަށް ބުނާ މައްސަލަ ބަލައި އެކަމުގެ ހަގީގަތް ހާމަކުރުމަށް ރައްޔިތުންގެ މަޖިލީހަށް ހުށަހެޅި ގަރާރު މަޖިލީހުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މި ގަރާރު ހުށަހެޅުއްވީ ރައްޔިތުންގެ މަޖިލިހުގެ ނޮޅިވަރަމު ދާއިރާގެ މެންބަރު މުހައްމަދު ނަޝީދު އަބުދުﷲ އެވެ. މި ގަރާރު މަޖިލީހަށް ބަލައި ގަނޭތޯ ބެލުމަށް ނެގި ވޯޓުގައި، ގަރާރު ބަލައިގަންނަން ވޯޓު ދެއްވީ ގަރާރު ހުށަހެޅުއްވި މެންބަރު އެކަންޏެވެ. 65 މެންބަރުން ތިއްބެވި މިއަދުގެ ޖަލްސާގައި މި ގަރާރު ބަލައިނުގަނެ ބޭރުކޮށްލީ 60 މެންބަރުން ވޯޓު ދެއްވައިގެންނެވެ.

މި ގަރާރު ހުށަހަޅައި ބަހުސަށް ހުޅުވައިލުމުންވެސް އެއްވެސް މެންބަރަކު ގަރާރަށް ވާހަކަ ދައްކަވައިފައެއް ނުވެއެވެ.

މިގަރާރުގައި ބުނެފައިވަނީ ކޮސޯވޯ އަކީ ވަކި ދައުލަތެއްގެ ގޮތުގައި 2008 ފެބްރުއަރީ 17 ވަނަ ދުވަހު އެގައުމުން އަމިއްލަޔަށް އިއުލާންކުރި ހިސާބުން ފެށިގެން މިއަދާ ހަމަޔަށް އައިރު ވެސް އެކަމަކީ އޭގެ ގާނޫނީ ސައްހަ ކަމާމެދު ބައިނަލް އަގުވާމީ މުޖުތަމައުގައި ބަހުސް ކުރެވެމުން އަންނަ ސީރިއަސް މައްސަލައެއް ކަމަށެވެ.

މީގެ އިތުރުން ރާއްޖޭގެ އެންމެ އަވަށްޓެރި ދެގައުމު ކަމުގައިވާ އިންޑިއާ އާއި ސްރީލަންކާގެ ފަރާތުން ވެސް ކޮސޯވޯގެ މިނވަންކަން ބަލައިގެންފައި ނުވާއިރު، އިގްތިސާދީގޮތުން ރާއްޖޭގެ އެންމެ ޒަމާންވީ އެއް ބައިވެރިޔާ، ޗައިނާއިންވެސް ބަލައިގެންފައި ނުވާކަމަށް ބުނެފައި ވެއެވެ.

މި މައްސަލަކީ އދ. ގައިވެސް ބަހުސް ކުރެވެމުން އަންނަ، އެހެން ނަމަވެސް ވަކި ގޮތަކަށް ނިމިފައި ނުވާ މައްސަލައެއް ކަމަށާއި، ދުސްތޫރީ ގޮތުންނާއި ސަލާމަތީ ކަންކަމުގައި ކޮސޯވޯ ސަރަހައްދު ހިންގުމާއި ރަސްމީކޮށް މިވަގުތު ހަވާލުވެ ތިބީ އދ. އާއި ޔޫރަޕްގެ އިއްތިހާދާއި ނޭޓޯ ކަމަށްްވާއިރު، ބައިނަލް އަގުވާމީ މުޖުތަމައުގައި މިހާ ސީރިއަސް މައްސަލައެއްގައި ދިވެހި ރާއްޖޭގެ ފަރާތުން ކުއްލި ގޮތަަށް ނިންމި މި ނިންމުމަކީ އޭރުގެ ފޮރިން މިނިސްޓަރަކަށް ހުންނެވި ފަރާތް އިސްވެ ހުންނަވައިގެން ރިޝްވަތު ނަންގަވައިގެން ނިންމެވި ނިންމެވުމެއް ކަމުގައި ކުރެވޭ ތުހުމަތު ތަކަކީ ސީރިއަސް ތުހުމަތުތަކެއް ކަމަށް ގަބޫލު ކުރެވޭ ކަމަށެވެ.

ކޮސޯވޯގެ މިނިވަންކަން ބަލައިގަތުމުގައި ރާއްޖޭގެ ފަރާތުން ސާބިޔާގެ އިސް ފަރާތްތަކާއި ބައްދަލުކޮށް މަޝްވަރާ ކޮށްފައިވާކަން އެނގެން ނެތްއިރު، ރާއްޖޭގެ އޭރުގެ ފޮރިން މިނިސްޓަރާއި އިސް އޮފިޝަލުންތަކެއް ކޮރަޕްޝަނަށް މަގުފަހިވާ ފަދަ އަމަލުތަކެއް ހިންގާފައި ވާނަމަ އެކަމުގެ ތެދު ހަގީގަތް ކަށަވަރުކޮށް އެނގުމަކީ މަޖިލީހުގެ އެންމެހައި މެންބަރުންގެ ސަމާލުކަމަށް ގެންނަން ޖެހޭ، އަދި ރާއްޖޭގެ ރައްޔިތުންގެ ހައްގުގައި ކުރަން ޖެހޭކަމެއް ކަމަށްވެސް ގަރާރުގައި ބުނެފައި ވެއެވެ.