ދުބާއީން އެމެރިކާއަށް ދަތުރުކުރާ ފަސިންޖަރުން ހާއްސަ ފޯމެއް ފުރުން އެމިރޭޓްސްއިން މަޖުބޫރުކޮށްފި

ދުބާއީން އެމެރިކާއަށް ދަތުރުކުރާ ފަސިންޖަރުން ފްލައިޓަށް އެރުމުގެ ކުރިން ހާއްސަ އިގްރާރު ފޯމެއް ފުރައި ހުށަހެޅުން އެމިރޭޓްސްއިން މަޖުބޫރުކޮށްފިއެވެ.

އެ އެއާލައިންގެ ވެބްސައިޓުގައި އާންމުކޮށްފައިވާ ދަތުރުފަތުރުގެ އިރުޝާދުތަކާ ހަވާލާދީ ގަލްފް ނިއުސްއިން ރިޕޯޓުކޮށްފައިވާ ގޮތުގައި، މި އުސޫލު ހިނގާނީ އެމެރިކާ ރޭ 11:59 ގެ ފަހުން އެ ގައުމަށް ފުރާ ހުރިހާ ފްލައިޓްތަކެއްގެ ފަސިންޖަރުންގެ މައްޗަށެވެ. މީގެ ތެރޭގައި އެމެރިކާ މަގުން އެހެން ގައުމުތަކަށް ޓްރާންސިޓްކޮށް ދަތުރުކުރާ ފަސިންޖަރުންވެސް ހިމެނެއެވެ.

އެމިރޭޓްސްއިން ބުނި ގޮތުގައި، ރަސްމީ އިސްތިސްނާއެއް ލިބިފައިވާ ފަރާތްތައް ފިޔަވައި އެހެން ހުރިހާ ފަސިންޖަރުންވެސް ޗެކްއިންވުމުގެ ކުރިން މި ފޯމު ފުރައި ސޮއިކުރަންޖެހޭނެއެވެ.

މި ފޯމަކީ ފްލައިޓަށް އެރުމުގެ ކުރިން ހިނގި 21 ދުވަހުގެ ތެރޭގައި ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) އަށް ގޮސްފައި ނުވާކަން ކަށަވަރުކޮށްދިނުމަށް ހުށަހަޅާ ލިޔުމެކެވެ. ފޯމުގައި ހިމަނާ ހުރިހާ މައުލޫމާތަކީ ތެދު އަދި ސައްހަ މައުލޫމާތަށް ވާން ޖެހޭނެ ކަމަށް އެ އެއާލައިނުން ބުންޏެވެ. އަދި ކޮންމެ ފަސިންޖަރަކަށް ވަކި ފޯމެއް ބޭނުންވާއިރު، ހުއްދަ އޮންނަ ހާލަތްތަކުގައި ފަސިންޖަރުގެ ފަރާތުން ކަނޑައަޅާފައިވާ މަންދޫބަކަށް އެ ފޯމު ފުރައި ސޮއިކުރެވިދާނެ ކަމަށްވެސް ބުނެފައިވެއެވެ.

މި ފިޔަވަޅަކީ އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން އޮކްޓޫބަރު 22 ގައި ނެރުނު އަމުރަކާ ގުޅިގެން ތަންފީޒުކުރަން ފެށި އުސޫލެކެވެ. އެމިރޭޓްސްއިން އިރުޝާދުދީފައިވާ ގޮތުގައި، ފަސިންޖަރުން ޖެހޭނީ އެމެރިކާ ސަރުކާރުގެ ވެބްސައިޓުން މި ފޯމު ޑައުންލޯޑުކޮށް ޕްރިންޓުކުރުމަށްފަހު، ޗެކްއިން ކައުންޓަރަށް އޭގެ ކަރުދާސް ކޮޕީއެއް ހުށަހަޅާށެވެ. ނަމަވެސް މި އުސޫލުން އިސްތިސްނާވާނީ ކޮން ބައެއްކަމާއި، ފަސިންޖަރުގެ ބަދަލުގައި އެހެން މީހަކަށް ސޮއިކުރުމުގެ ހުއްދަ ލިބޭނެ ހާލަތްތަކުގެ ތަފްސީލު ރަސްމީ އިއުލާނުތަކުން އަދި ކަށަވަރުވާކަށް ނެތެވެ.