އިނގިރޭސި ޕްރިމިއާ ލީގުގެ އެއްވަނައިގައި އޮތް މެންޗެސްޓާ ސިޓީން މިރޭ ކުޅުނު މެޗުގައި ލިވަޕޫލް ކައިރިން މޮޅުވެއްޖެއެވެ.

ސިޓީން މިރޭ ރަށުން ބޭރުގައި 3-0 އިން މޮޅުވި އިރު، އެމެޗަކީ އެ ކްލަބުގެ މައްޗަށް މައްސަލަތައް ސާބިތުވިފަހުން ކުޅުނު ފުރަތަމަ މެޗެވެ.

ސިޓީގެ 115 މައްސަލައެއް މިނިވަން ކޮމިޝަނުން ބަލަން ފެށީ 2023 ވަނަ އަހަރު ފެބްރުއަރީ މަހުގައެވެ. އެ މައްސަލަތަކަކީ 2009 ވަނަ އަހަރުން ފެށިގެން 2018 ވަނަ އަހަރާ ދެމެދު ސިޓީން ހިންގާފައިވާ މުއާމަލާތްތަކުގެ މައްސަލަތަކެކެވެ.

މިނިވަން ކޮމިޝަނާ ހަވާލާދީ ޕްރިމިއާ ލީގުން ނެރުނު ސްޓޭޓްމެންޓްގައި ބުނެފައި ވަނީ މައްސަލަތައް ސާބިތުވުމުގެ އިތުރުން އެ މައްސަލަ ތަހުގީގުކުރުމަށް ސިޓީން އެއްބާރުލުން ނުދޭކަންވެސް ސާބިތުވެފައިވާ ކަމަށެވެ.

އެ މައްސަލަތަކާ ހެދި މެޗަށް ނުކުތްއިރު ސިޓީއަށް ކޮންމެވެސް ވަރެއްގެ ޕްރެޝަރެއްވެސް އޮތެވެ. އެހެން ނަމަވެސް ކޯޗު އެންޒޯ މަރެސްކާ ބުނީ ކުޅުންތެރިންނަށް އެކަމުގެ އަސަރު ނުކުރާ ކަމަށެވެ. އަވޭ މެޗެއް ނަމަވެސް. ސިޓީގެ ސަޕޯޓަރުން ވަނީ ޓީމާއެކުގައި ތިބިކަން ދައްކާލައިފައެވެ. ވައިޖެހި ދޮންކެޔޮ ފުއްޕާހަންތަކެއް ހިފައިގެން ސަޕޯޓަރުން ދަނޑަށް ވަދެފައިވާ އިރު، އެއީ އެ ކްލަބުގެ ތާރީހާ ގުޅިފައިވާ ކަމެކެވެ.

ފުރަތަމަ ހާފުގައި މާގިނަ ހަމަލާތަކެއް ފެނިގެން ގޮސްފައެއް ނުވެއެވެ. ސިޓީ ކުޅުންތެރިން ފައިގައި ބޯޅަ ޖެހޭ ކޮންމެ ފަހަރަކު ލިވަޕޫލް ސަޕޯޓަރުންގެ ހަޅޭކުގެ އަޑު ބާރުކުރަމުން، ބައެއް ޗޭންޓްތައް ކިޔަމުން ދިޔަ ނަމަވެސް، ސިޓީ ކުޅުންތެރިންގެ ފަރާތުން އެކަމަށް ސަމާލުކަންދިންތަނެއް ނުފެނެއެވެ.

ކުރީކޮޅުގައި ލިވަޕޫލުން ބޮޑަށް ނުރައްކާކޮށް ފެނުނު ނަމަވެސް ފުރަތަމަ ހާފުގައި ސިޓީއަށް ރަނގަޅު ފުރުސަތެއް ލިބުނެވެ. އެއީ އެންޓޮއިިން ސެމެންޔޯއަށް ލިބުނު ފުރުސަތެކެވެ. އޭނާއަށް ލިބުނު ފުރުސަތުގައި ތިރިން ނަގައިދިން ބޯޅަ ގޯލަށް ވައްދާލެވޭ ގޮތެއް ނުވިއެވެ.

ދެވަނަ ހާފު ފެށިގެން ޖިއާންލުއީޖީ ޑޮނަރޫމާ ވަނީ މުހިއްމު ދެ ސޭވެއް ކޮށްފައެވެ. އެއީ ލެވިސް ކޫމާސްއާއި ރަޔަން ގްރަވެންބާޗް ފޮނުވާލި ހަމަލާތަކެވެ. އޭގެފަހުން އެލެކްސިސް މެކް އަލިސްޓާގެ ހަމަލާ ގޯލާ އަމާޒުނުވެ ދިޔަ އިރު، ލިވަޕޫލް އަތުން މެޗު ބީވެގެން ދިޔައީ ގްރަވެންބާޗަށް ދެވަނަ ރީނދޫ ކާޑަކާއެކު ރަތް ކާޑު ދެއްކުމުންނެވެ. އެއީ 62 ވަނަ މިނެޓުގައެވެ.

އޭގެ ތިން މިނެޓްފަހުން އާލިން ހާލަންޑް ވަނީ ސިޓީއަށް ލީޑު ނަގައިދީފައެވެ. މެޗަށް ދެވަނަ ހާފަށް ނުކުތް ޖެރަމީ ޑޮކޫ ސިޓީގެ މޮޅުގައި މުހިއްމު ދައުރެއް އަދާކޮށްފައިވާ އިރު، ދެވަނަ ގޯލަކީ 68 ވަނަ މިނެޓުގައި އޭނާ ޖަހައިދިން ގޯލެކެވެ. އެއީ ރަސްމީކޮށް އޭނާ ނިންމާލާ ކަހަލަ ބޯޅައެއް ދުރު ކަނަށް އަމާޒުކޮށްލައިގެން ޖެހި ގޯލެކެވެ.

ރަޔަން ޗާކީ، 78 ވަނަ މިނެޓުގައި ސިޓީގެ ތިންވަނަ ގޯލް ޖަހައިދިން އިރު، އެއީ ހިތްގައިމު ޓީމު ގޯލެކެވެ. 41 ޕާސް ފުރިހަމަކޮށް ސިޓީން އެ ގޯލް ޖެހި އިރު، އެއީ 2023 ވަނަ އަހަރު ފިލް ފޮޑެން ނޮޓިންހަމް ކޮޅަށް ޖެހި ގޯލަށްފަހު އެންމެ ގިނަ ޕާސް ފުރިހަމަކޮށްގެން ޖެހި ގޯލެވެ. އެފަހަރު ސިޓީން ގޯލް ޖެހީ 46 ޕާސް، ގެއްލުވާނުލައި ފުރިހަމަ ކޮށްގެންނެވެ.