މާލެ ސަރަހައްދަށް ހަތަރު ފުރޮޅުލީ އުޅަނދު އެތެރެކުރުމުގެ ކުރިން ގަރާޖު ސިޓީ ދައްކަން ޖެހޭ ގޮތަށް ހަމަޖެއްސުމުން، ރާއްޖެއަށް ވެހިކަލް އެތެރެކުރާ އަދަދު ވަރަށް ބޮޑަށް މަދުވެފައިވާކަމަށް އިކޮނޮމިކް އަދި ޓްރާންސްޕޯޓު މިނިސްޓަރު މުހައްމަދު ސައީދު ވިދާޅުވެއްޖެއެވެ.

މިދިޔަ އަހަރުގެ އޭޕްރީލް 13 ވަނަ ދުވަހު އެއްގަމު އުޅަނދު ރަޖިސްޓްރީ ކުރުމުގެ ގަވާއިދަށް ގެނައި މި ބަދަލުގެ ދަށުން، އުޅަނދު ބާއްވާނެ ގަރާޖެއް ނުވަތަ ގުދަނެއްގެ ހުއްދަ އޮތްކަން ކަށަވަރުކުރުން ވަނީ ލާޒިމުކޮށްފައެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ، މި ބަދަލާ އެކު އާންމުންގެ ފަރާތުން ކަންބޮޑުވުންތަކެއް އައި ނަމަވެސް، މިއީ ތޮއްޖެހުމުގެ މައްސަލައަށް ހައްލެއް ހޯދުމަށް އެޅުނު ނުހަނު ބޭނުންތެރި ފިޔަވަޅެއް ކަމަށެވެ. އަދި، ލިބިފައިވާ ތަފާސްހިސާބުތަކުން ރާއްޖެ އެތެރެކުރާ ވެހިކަލްތަކުގެ އަދަދު ވަރަށް ބޮޑަށް ދަށްވަމުން އަންނަކަން ފާހަގަކުރެވިފައިވާކަމަށް މިނިސްޓަރު ވިދާޅުވިއެވެ.

"އަޅުގަނޑުމެންގެ ހިސާބުތައް ދައްކާ ގޮތުގައި ވަރަށް ބޮޑުތަނުން ވެހިކަލްތަކުގެ އަދަދުވެސް ދަށްވަމުން އެބަ އާދޭ އެ ނިންމުމާ ގުޅިގެން" ސައީދު ވިދާޅުވިއެވެ.

ސައީދު ވިދާޅުވީ، އެއް ގަރާޖެއްގެ ޖާގައަށް ވުރެ ގިނައިން މިނިސްޓްރީގެ ސިސްޓަމް ތެރެއިން ވެހިކަލްތައް ރަޖިސްޓްރީކޮށްފައިވާ މައްސަލަތައް ހުރި ކަމަށާއި، ގަވާއިދާ ހިލާފަށް އުޅަނދު އެތެރެކުރުން ހުއްޓުވުމަށް ހާއްސަ ޓީމަކާއި ފުލުހުން ގުޅިގެން ފިޔަވަޅުތަކެއް އަޅަމުންދާކަމަށް މިނިސްޓަރު ވިދާޅުވިއެވެ.

މާލޭގެ، ޖާގައިގެ 82 ޕަސަންޓް ހިއްސާކުރަނީ އުޅަނދުތައް ކަމަށާއި، ހިނގާބިނގާވެ އުޅުމަށް އޮތީ އެންމެ 18 ޕަސަންޓްކަމަށް މިނިސްޓަރު ވިދާޅުވިއެވެ. އަދި، މިހާތަނަށް 14،911 ކާރާއި 115،896 ސައިކަލާ އެކު ޖުމުލަ 130،806 އުޅަނދު ރަޖިސްޓްރީކޮށްފައިވާކަމަށް ސައީދު ވިދާޅުވިއެވެ.