ފުލުހުންގެ ކާރެއްގައި ޖައްސައި ފިލަން މަސައްކަތްކުރި 26 އަހަރުގެ ފިރިހެނަކު މިއަދު ހައްޔަރުކޮށްފިއެވެ.

ފުލުހުން ބުނި ގޮތުގައި މި މައްސަލައިގައި ހައްޔަރުކޮށްފައިވަނީ ކ. މާފުށި، ސްނޯސްކައި، އަހްމަދު ފާރިޒް އެވެ. އޭނާ ހައްޔަރުކުރީ މަސްތުގެ ހާލަތުގައި ހުރެ، އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ނުރައްކާތެރިކޮށް ސައިކަލު ދުއްވި މައްސަލައިގައެވެ. އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ވަނީ ހަތް ދުވަހަށް ބަންދުކުރުމަށް އަމުރުކޮށްފައެވެ.

މި ހާދިސާ ހިނގާފައިވަނީ މިއަދު ދަންވަރު 3:52 ހާއިރުއެވެ. ފުލުހުންނަށް މައުލޫމާތު ލިބުނު ގޮތުގައި، ފާރިޒް ދިޔައީ ހެލްމެޓް ނާޅައި، ސައިކަލުމަތީގައި އޮށޯވެގެން ނުރައްކާތެރިކޮށް ހުޅުމާލެއިން މާލެއަށް ހައިވޭގައި ދުއްވަމުންނެވެ. އެ މައުލޫމާތާ ގުޅިގެން މާލޭގެ ޓްރެފިކް ލައިޓް ކައިރިން އޭނާ ދެނެގަނެ، މަޑުކުރުމަށް ފުލުހުން އެންގިއެވެ. ނަމަވެސް އެ އެންގުމަށް ތަބާނުވެ، ބޮޑުތަކުރުފާނުމަގުން ބާރު ސްޕީޑުގައި ދުއްވާފައި އޭނާ ފިލަން މަސައްކަތްކުރި ކަމަށް ފުލުހުން ބުންޏެވެ.

ފުލުހުންގެ ވެހިކަލް އޭނާގެ ފަހަތުން ގޮސް ތަކުރާރުކޮށް މަޑުކުރަން އެންގުމުންވެސް މަޑުނުކޮށް ފިލަން އުޅުމުގެ ތެރޭގައި، ފުލުހުންގެ ކާރުގައި ޖެހި އެކްސިޑެންޓްވެފައިވާ ކަމަށް ފުލުހުން މައުލޫމާތުދެއެވެ. މި އެކްސިޑެންޓުގައި ފުލުހުންގެ ކާރަށް ގެއްލުންތަކެއް ލިބިފައިވާ އިރު، އޭނާ ވަނީ ސައިކަލު ދޫކޮށް އެ ސަރަހައްދުން ފިލައިފައެވެ. ނަމަވެސް، މާލެތެރެ ޕެޓްރޯލްކުރަމުންދިޔަ ފުލުހުން ކުރި މަސައްކަތުން، މާލެ، މޫންލައިޓް ހިނގުމުން އޭނާ ހުއްޓުވައި ވަނީ ފުލުހުންގެ ބެލުމުގެ ދަށަށް ގެނެސްފައެވެ.

ފުލުހުން ބުނި ގޮތުގައި ފާރިޒަކީ ތަކުރާރުކޮށް އެއްގަމު އުޅަނދު ދުއްވުމުގެ ގާނޫނާއި ގަވާއިދުތަކާ ހިލާފުވެފައިވާ މީހެކެވެ. އޭނާ ނުދައްކައި އޮތް ޓްރެފިކް ޖޫރިމަނާގެ އަދަދު 44،000 ރުފިޔާއަށް އަރައެވެ. އޭނާގެ ޓްރެފިކް ކުށުގެ ރެކޯޑުތަކުގެ ތެރޭގައި ލައިސަންސް ނެތި ދުއްވުމާއި، ވަންވޭއާ ހިލާފަށް ދުއްވުމާއި، ބާރު ސްޕީޑުގައި ދުއްވުމާއި، ލޯގަނޑު ނުޖަހައި ދުއްވުމުގެ އިތުރުން ލައިސަންސް ހިފަހައްޓާފައި އޮއްވައި ތަކުރާރުކޮށް ދުއްވުމާއި، މަގުމަތީގެ އަމާންކަން ގެއްލޭގޮތަށް ނުރައްކާތެރިކޮށް ދުއްވުމާއި ސައިކަލުގެ ލައިޓުތައް މޮޑިފައިކޮށްގެން ދުއްވުން ހިމެނެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.