މާލޭ ސިޓީ ކައުންސިލަށް ލިބެމުންދިޔަ ވެހިކަލް ފީ އެ ކައުންސިލް އަތުން އަތުލީ ޓްރެފިކް މައްސަލަތައް ހައްލު ކުރުމަށާއި، މަގުތައް ހެދުމަށް ހަރަދު ކުރަމުން ނުދާތީކަމަށް އެޓާނީ ޖެނެރަލް އަހުމަދު އުޝާމް މިރޭ ވިދާޅުވެއްޖެއެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގެ ބައިވެރިއަކު ކުރި ސުވާލުގައި ވަނީ، މި ސަރުކާރުން އެއްގަމު ދަތުރުފަތުރުގެ ގާނޫނަށް ބަދަލު ގެނެސް ސިޓީ ކައުންސިލަށް ލިބެމުންދިޔަ އާމްދަނީ ހުއްޓުވުމަކީ ލާމަރުކަޒީ ނިޒާމަށް އެޅުނު ހުރަހެއްކަމަށް މޭޔަރު އާދަމް އާޒިމް ސިފަކުރައްވާފައިވާ ކަމަށެވެ.

އެ ސުވާލަށް ޖަވާބު ދެއްވަމުން އުޝާމް ވިދާޅުވީ، މާލޭގައި ދިރިއުޅޭ ރައްޔިތުންގެ އެންމެ ބޮޑު ކަންބޮޑުވުމަކީ މަގުތަކުގެ ހާލަތާއި ތޮއްޖެހުން ކަމަށެވެ. އަދި މި މައްސަލަތައް ހައްލުކުރުމަށްޓަކައި ހެދި އާ ގާނޫނުގެ ދަށުން، ކަމާބެހޭ ވަޒީރުންނާއި ޕޮލިސް ކޮމިޝަނަރު ހިމެނޭހެން "ރޯޑް ސޭފްޓީ ކައުންސިލް" އެއް އެކުލަވާލާފައިވާ ކަމަށާއި، މާލޭގެ ހާލަތު އޮތްގޮތުން ގާނޫނުގައި މާލެއަށް ހާއްސަ ބާބެއްވެސް ހިމަނާފައިވާނެކަމަށް އުޝާމް ވިދާޅުވިއެވެ.

އުޝާމް ވިދާޅުވީ، ވެހިކަލްތަކުން ނަގާ ފީ ދެން ޖަމާވާނީ ހާއްސަ ވަކި ފަންޑަކަށް ކަމަށެވެ. އަދި އެ ފައިސާ ބޭނުންކުރާނީ ހަމައެކަނި ދަތުރުފަތުރާއި މަގުތަކުގެ މައްސަލަތައް ހައްލުކުރުމަށާއި ފުލުހުންނަށް ބޭނުންވާ ވަސީލަތްތައް ހޯދައިދިނުމަށްކަމަށް އުޝާމް ވިދާޅުވިއެވެ.

ސިޓީ ކައުންސިލުން މީގެ ކުރިން އެ ފައިސާ މަގުތައް ބެލެހެއްޓުމަށް ބޭނުންކޮށްފައިނުވާކަމަށް އުޝާމް ވިދާޅުވިއެވެ.

"އެ ފައިސާ މާލޭ ސިޓީ ކައުންސިލުން މިއޮތް ހުރިހާ ދުވަހަކު ބޭނުންކުރަމުން ދިޔައީ އެކަމަކަށް ނޫން. އަޅުގަނޑުމެންނަށް މަގުމަތި ބަލާލީމަ ވަރަށް ސާފުކޮށް ފެންނަން އޮތްކަމެއް، ރަޖިސްޓްރޭޝަން ފީން އެ ލިބުނު ފައިސާއިން ހަގީގަތުގައި މަގުތައް މަރާމާތުކޮށް ބެލެހެއްޓުމެއް ނޫންކަން އޭގެ ބޮޑު ބައެއް ބޭނުންކުރަމުން އައިސްފައި އޮތީ،" އުޝާމް ވިދާޅުވި އެވެ.

"މިކަމުން ލިބޭ ފައިސާ އަޅުގަނޑުމެން ހަރަދުކުރާނީ އެއްގަމު ދަތުރުފަތުރުގެ މައްސަލަތަކަށް ހައްލެއް ހޯދުމަށް. މިސާލަކަށް ފުލުހުންނަށް އެކަމަށް ބޭނުންވާ ވަސީލަތްތައް ހޯދުމަށް މާލޭގެ މަގުތަކުގެ އެކިއެކި މައްސަލަތައް ދިމާވެއްޖެއްޔާ އެކަމަށް ހަރަދުކުރަންް،"

އެ އާމްދަނީ ކަނޑާލުމުން މާލޭގެ ރައްޔިތުންނަށް ދެމުން އައި ހިދުމަތްތަކަށް ބޮޑެތި ގެއްލުންތަކެއް ވާނެކަމަށް މޭޔަރު އާޒިމް މީގެކުރިން ވަނީ ވިދާޅުވެފައެވެ. އާޒިމް ވިދާޅުވެފައިވަނީ އެ ފައިސާއަކީ މަގުތައް މަރާމާތު ކުރުމުގެ އިތުރުން، މިސްކިތްތައް ބެލެހެއްޓުމަށާއި، ފެންބޮޑުވުން ފަދަ ކާރިސާތަކުގައި އެހީތެރިވުމަށާއި، މަގުމަތި ކުނިކަހައި ސާފުކުރުން ފަދަ މުހިންމު އިޖުތިމާއީ ކަންކަމަށް ހޭދަކުރަމުން އައި ފައިސާ ކަމަށެވެ.

އާ ގާނޫނުގައިވާ ގޮތުން، މާލެ ސަރަހައްދުގައި ދުއްވާ އުޅަނދުތަކުގެ އަހަރީ ފީ ދެން ބަލައިގަންނާނީ ޓްރާންސްޕޯޓް މިނިސްޓްރީގެ ދަށުން އުފައްދާފައިވާ "ގްރޭޓާ މާލެ ޓްރާންސްޕޯޓް އެންޑް މޯބިލިޓީ އޮފީސް" އިންނެވެ.