މިއަހަރުގެ މިހާތަނަށް ރާއްޖެއަށް 1.6 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

ޓޫރިޒަމް މިނިސްޓްރީން މިއަދު އާންމުކޮށްފައިވާ ތަފާސްހިސާބުތައް ދައްކާ ގޮތުން، އިއްޔެގެ ނިޔަލަށް 1,622,063 ފަތުރުވެރިން ޒިޔާރަތްކޮށްފައެވެ. މިއީ 2025 ވަނަ އަހަރުގެ އެ މުއްދަތުގައި ރާއްޖެ އައި 1,678,547 ފަތުރުވެރިންނާ އަޅައި ބަލާއިރު 3.6 ޕަސެންޓްގެ ދަށްވުމެކެވެ.

ރާއްޖޭގެ ޓޫރިޒަމްގެ އެއްވަނަ މާކެޓުގެ މަގާމު އަދިވެސް ދަމަހައްޓަމުން އަންނަނީ ޗައިނާއެވެ. އެގޮތުން ޗައިނާއިން މިހާތަނަށް 307,511 ފަތުރުވެރިން ވަނީ ޒިޔާރަތްކޮށްފައެވެ. ދެވަނައިގައި އޮތް ރަޝިއާއިން 231,899 ފަތުރުވެރިން އައި އިރު، 120,837 ފަތުރުވެރިންނާއެކު ތިންވަނައިގައި އޮތީ އިނގިރޭސިވިލާތެވެ.

ރާއްޖެ އައި ފަތުރުވެރިންގެ ތެރެއިން ބޮޑު ޕަސަންޓެއް ދަތުރުކޮށްފައި ވަނީ ވެލާނާ އިންޓަނޭޝަނަލް އެއާޕޯޓް (ވީއައިއޭ) މެދުވެރިކޮށެވެ. އެއީ 1,588,065 ފަތުރުވެރިންނެވެ. މީގެ އިތުރުން ގަން އިންޓަނޭޝަނަލް އެއާޕޯޓް މެދުވެރިކޮށް 5,636 ފަތުރުވެރިން އަދި ސީޕޯޓުތައް މެދުވެރިކޮށް ކަނޑުމަގުން 15,583 ފަތުރުވެރިން ރާއްޖެއަށް އައިސްފައިވެއެވެ.

ފަތުރުވެރިންގެ އެކޮމޮޑޭޝަނަށް ބަލާއިރު، 1,172,792 ފަތުރުވެރިން ރިސޯޓުތަކުގައި ޗުއްޓީ ހޭދަ ކުރި އިރު، މީހުން ދިރިއުޅޭ ރަށްރަށުގެ ގެސްޓް ހައުސްތަކުގައި 348,746 ފަތުރުވެރިން ވަނީ ޗުއްޓީ ހޭދަކޮށްފައެވެ. އަދި ހޮޓެލްތަކުގައި 36,486 ފަތުރުވެރިން ވަނީ މަޑުކޮށްފައިވެއެވެ.