ދުނިޔޭގެ އެންމެ ގިނައިން ކަދުރު އެކްސްޕޯޓުކުރި ގައުމުގެ މަގާމު ވިދިވިދިގެން ހަތަރުވަނަ އަހަރު ސައުދީ އަރަބިއްޔާއަށް ލިބިއްޖެއެވެ. އިންޓަނޭޝަނަލް ޓްރޭޑް ސެންޓަރު (އައިޓީސީ) އިން އާންމުކުރި ތަފާސްހިސާބުތަކާ ހަވާލާދީ ސައުދީ ޕްރެސް އެޖެންސީން ރިޕޯޓުކޮށްފައިވާ ގޮތުގައި، 2025 ވަނަ އަހަރު އެ ގައުމުން ވަނީ 1.938 ބިލިއަން ސައުދީ ރިޔާލަ (517.7 މިލިއަން ޑޮލަރު) ގެ ކަދުރު އެކްސްޕޯޓުކޮށްފައެވެ.

މިއީ 2024 ވަނަ އަހަރާ އަޅައި ބަލާއިރު 14 އިންސައްތައިގެ ކުރިއެރުމެކެވެ.

ތަފާސްހިސާބުތައް ދައްކާ ގޮތުން 2023 ވަނަ އަހަރު 1.462 ބިލިއަން ރިޔާލުގެ ކަދުރު އެކްސްޕޯޓުކޮށްފައިވާއިރު، 2024 ވަނަ އަހަރު އެ އަދަދު ވަނީ 1.695 ބިލިއަން ރިޔާލަށް އިތުރުވެފައެވެ.

ސައުދީގެ ނޭޝަނަލް ސެންޓަރ ފޯ ޕާމްސް އެންޑް ޑޭޓްސް (އެންސީޕީޑީ) އިން ހާމަކުރި ގޮތުގައި، މިހާރު އެ ގައުމުގެ ކަދުރު ދުނިޔޭގެ 125 ގައުމަކަށް އެކްސްޕޯޓުކުރެއެވެ. ސައުދީގައި 37 މިލިއަނަށް ވުރެ ގިނަ ކަދުރު ރުށް ހުރިއިރު، އަހަރެއްގެ މައްޗަށް 1.9 މިލިއަން ޓަނަށް ވުރެ ގިނަ ކަދުރު އުފައްދައެވެ. މިއީ ދުނިޔޭގައި އުފައްދާ ކަދުރުގެ 17 އިންސައްތައެވެ.

އޮބްޒަވޭޓަރީ އޮފް އިކޮނޮމިކް ކޮމްޕްލެކްސިޓީގެ މައުލޫމާތަށް ބަލާއިރު، ސައުދީން އެންމެ ގިނައިން ކަދުރު އެކްސްޕޯޓުކުރި ގައުމުތަކުގެ ތެރޭގައި އެކުވެރި އަރަބި އިމާރާތް (ޔުނައިޓެޑް އަރަބް އެމިރޭޓްސް - ޔޫއޭއީ)، ޔަމަން، ކުވައިތު، މޮރޮކޯ އަދި އުރުދުން ހިމެނެއެވެ.

އެންސީޕީޑީގެ ސީއީއޯ އަހުމަދު އަލް މޫސާ ވިދާޅުވެފައިވާ ގޮތުގައި، މި ކާމިޔާބީ ލިބުނީ ސަރުކާރާއި އަމިއްލަ ކުންފުނިތަކާ ދެމެދު އޮތް ގުޅުމުގެ ސަބަބުންނާއި، ސަޕްލައި ޗެއިންތައް ހަރުދަނާކުރުމަށް ކުރި މަސައްކަތުންނެވެ. އަދި ބައިނަލްއަގުވާމީ ބާޒާރުތަކަށް ކަދުރު ފޯރުކޮށްދިނުމުގައި އެ ސެންޓަރުން ކުރިއަށްގެންދާ ޕްރޮގްރާމްތަކަކީ މި ކުރިއެރުމުގެ މައިގަނޑު އެއް ސަބަބު ކަމަށް އޭނާ ފާހަގަކުރެއްވިއެވެ. މީގެ އިތުރުން، މިއީ ސައުދީގެ 'ވިޝަން 2030' ގެ ދަށުން ތެލަށް ބަރޯސާވާ މިންވަރު ކުޑަކޮށް، ދަނޑުވެރިކަމުގެ އުފެއްދުންތައް އެކްސްޕޯޓުކުރުން އިތުރުކުރުމަށް ކަނޑައަޅާފައިވާ ލަނޑުދަނޑިތައް ހާސިލުވަމުން އަންނަކަމުގެ ހެއްކެއް ކަމަށް ވެސް ބުންޏެވެ.

2016 ވަނަ އަހަރާ އަޅައި ބަލާއިރު، ސައުދީގެ ކަދުރު އެކްސްޕޯޓުކުރާ މިންވަރު ވަނީ 192.5 އިންސައްތަ އިތުރުވެފައެވެ. މިއީ އަހަރެއްގެ މައްޗަށް އެވްރެޖްކޮށް 12.7 އިންސައްތައިގެ ކުރިއެރުމެކެވެ. އެންސީޕީޑީން އަންނަނީ ޖަރުމަނުވިލާތާއި އެމެރިކާ ފަދަ ގައުމުތަކުގެ ރީޓެއިލް މާކެޓުތަކަށް ސައުދީ ކަދުރު ތައާރަފުކުރުމުގެ މަސައްކަތް ފުޅާކުރަމުންނެވެ. އެގޮތުން ޖަރުމަނުވިލާތުގެ 15 ރީޓެއިލް ޗެއިނެއްގެ 1،500 އަށްވުރެ ގިނަ ފިހާރައިގައި ސައުދީގެ 10 ކުންފުންޏެއްގެ ކަދުރު މިހާރު ވިއްކަމުންދާ ކަމަށް އެ ސެންޓަރުން ވަނީ ބުނެފައެވެ.