މި ސަރުކާރުން ބާރުތައް މަސްހުނިކޮށް ހުދުމުހުތާރުކަން އިސްކޮށްފައިވާ ކަމަށް ވިދާޅުވެ، އަނިޔާވެރިކަމާއި ރައްޔިތުންނާ ދެމެދު އޮންނަ އައްޑަނައަކީ އަބަދުވެސް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ކަމަށް އެ ޕާޓީގެ ރިޔާސީ ރޭހުގައި ވާދަކުރައްވަން ނިންމަވާފައިވާ ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ އެމްޑީޕީގެ ފަސް ވަނަ ކޮންގްރެސް ނިންމުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުންނެވެ. އޭނާ ވަނީ ދައުލަތުގެ ތިން ބާރު ވަކިނުވެ ތަޅުލެވިފައިވާ ކަމަށް ތުހުމަތުކުރައްވައި، ރައްޔިތުންގެ ހައްގުތައް ނިގުޅައިގަނެވެމުންދާ ކަމަށް ވިދާޅުވެފައެވެ.

މިހާރު ގައުމު އޮތީ ވަރަށް ނާޒުކު ފައްތަރެއްގައި ކަމަށާއި އިސްރާފާއި ކޮރަޕްޝަން އިންތިހާއަށް ގޮސްފައިވާ ކަމަށް ފައްޔާޒް ފާހަގަކުރެއްވިއެވެ. ގައުމު ހަލާކުކޮށް ރައްޔިތުންނަށް އަނިޔާދޭއިރު އެކަމުން ސަލާމަތްކުރުމަށް އެމްޑީޕީ ފަހަތަށް ނުޖެހޭނެ ކަމުގެ ޔަގީންކަންވެސް އޭނާ ދެއްވިއެވެ.

"ހުދުމުހުތާރު ވެރިކަމާއި އަނިޔާވެރިކަމާ ދިވެހި ރައްޔިތުންނާ ދެމެދުގައި އޮންނަ އައްޑަނައަކީ އަބަދުވެސް އެމްޑީޕީ. ދެން އޮންނާނީ ވެސް ހަމަ އެމްޑީޕީ ދިވެހި ރައްޔިތުން އެކަމުން ސަލާމަތް ކުރަން،" ފައްޔާޒް ވިދާޅުވިއެވެ.

ޑޮލަރާއި ކާޑާއި ބޭހަށް ޖެހި ގައުމުގެ ކަންކަން ބޮއްސުންލައިގެން ދިއުމުގައި ވެރިކަން ކުރާ ނިޒާމުގެ މައްސަލަތަކެއް ހުރިކަން ފާހަގަކުރައްވައި ފައްޔާޒު ވިދާޅުވީ ނިޒާމު ބަދަލުކުރަން ޖެހެނީ އެ ސަބަބުތަކާ ހުރެ ކަމަށެވެ.

ބޮޑު ބަދަލުގެ ނަމުގައި ފައްޔާޒް ހުށަހެޅުއްވި ސިޔާސަތު ކަރުދާހުގައިވާ އެންމެ މުހިންމު ނިންމުމަކީ ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިން އިންތިހާބުކުރުމެވެ. މި ހުށަހެޅުމުގައިވާ ގޮތުން ސަރުކާރުގެ ވެރިޔާ އިންތިހާބުކުރާނީ ރައްޔިތުންގެ ސީދާ ވޯޓަކުންނެވެ. އަދި ދައުލަތުގެ ވެރިޔާ އިންތިހާބުކުރާނީ ރައްޔިތުންގެ މަޖިލީހާއި ކައުންސިލްތަކުން ނަގާ ވޯޓަކުންނެވެ.