ދައުލަތް ހިންގުމަށް މިހާރު އޮތްގޮތަށް އިސްލާހުތަކެއް ގެންނަން އިދިކޮޅު އެމްޑީޕީން ނިންމައި "ބޮޑު ބަދަލުގެ އޮފީސް" ގެ ނަމުގައި އޮފީހެއް ހަަދައިގެން މަސައްކަތްތަކެއް ކުރަމުންދާ އިރު، އެ ޕާޓީން ގެންނަން ނިންމާފައިވާ ބޮޑު ބަދަލުގެ ތެރެއިން ދައުލަތުގެ ކަންކަން ނިންމުމަށް ދެ މަޖިލީހެއް އޮންނަންޖެހޭގޮތަށް ބަދަލު ގެންނަން އެމްޑީޕީގެ ކޮންގްރެސް އިން ފާސްކޮށްފިއެވެ.

އެމްޑީޕީން ގެންނަން ބޭނުންވާ ބޮޑު ބަދަލާބެހޭ ކަރުދާސް އެ ޕާޓީގެ ކޮންގްރެސްއަށް މިއަދު ހުށަހެޅުއްވީ، އެ ޕާޓީގެ ރިޔާސީ ޕްރައިމަރީގައި ވާދަކުރައްވާ ކުރީގެ އިކޮނޮމިކް މިނިސްޓަރު އަދި އެ ޕާޓީގެ މަގުޗާޓު ކޮމިޓީގެ މުގައްރިރު ފައްޔާޒް އިސްމާއީލެވެ.

ފައްޔާޒްގެ ހުށަހެޅުއްވުމުގައި ހިމެނެނީ ރައްޔިތުންގެ މަޖިލީހުގެ އިތުރުން ބައެއް ކަންކަން ނިންމުމަށް ބޮޑު މަޖިލީހުގެ ގޮތުގައި ރައްޔިތުންގެ މަޖިލީހުގެ އިތުރުން ހުރިހާ ރަށެއްގެ ކައުންސިލަރުން ހިމެނޭ "ބޮޑު މަޖިލިސް" އެއް އޮތުމަށެވެ.

ފައްޔާޒް ހުށަހެޅުއްވި ބޮޑު ބަދަލުގެ ސިޔާސަތުގައި ހިމަނާފައިވަނީ، މިނިވަން މުއައްސަސާތަކަކީ ވަކި ބާރެއްގެ ގޮތުގައި ވަކިކޮށް ބޭއްވުމަށެވެ. އެގޮތުން މިނިވަން މުއައްސަސާތަކަށް މެންބަރުން އައްޔަން ކުރުމަށް ރައީސުލްޖުމްހޫރިއްޔާ، ރައްޔިތުންގެ މަޖިލީހަށް ނަމެއް ފޮނުވަންޖެހޭގޮތަށް މިހާރު އޮންނަ އޮތުން ބަދަލުކޮށް، އެމްޑީޕީގެ ބޮޑު ބަދަލުގެ ސިޔާސަތުގައި ހިމެނެނީ، މިނިވަން މުއައްސަސާތަކުގެ މެންބަރުން އައްޔަންކޮށް ވަކި ކުރާނީ "ބޮޑު މަޖިލީސް" އިން ކަމަށެވެ.

"މިހާރު އެކަން ކުރަނީ މަޖިލީހުގައި އޮންނަ މިނިވަން މުއައްސަސާތަކުގެ ކޮމިޓީން، އޭގެން އަންނަނީ ސިޔާސީ ނިންމުމެއް، ސަރުކާރުން ހިތްހަމަނުޖެހިއްޖެއްޔާ އެ ކޮމިޓީން ނިންމާނީ އެމީހަކު ވަކިކުރަން. އެ ފުރުސަަތު އަޅުގަނޑުމެން މި ބޭރުކޮށްލަނީ ކޮމިޝަނުން މިނިވަން މުއަައްސަސާތައް ރެގިއުލޭޓް ކުރާނީ އަދި މިދަންނަވާ މިނިވަން މުއައްސަސާތަކުގެ އޯވަސައިޓް ކޮމިޓީގެ މީހުން ވަކިކުރަންޏާ މަޖިލީހުން އެމީހުން ވަކިކުރަން ނިންމީމާ ރައްޔިތުންނާ ހިސާބަށް އެބަ ރެފަރެންޑަމަކަށް ދާންޖެހޭ،" އޭނާ ވިދާޅުވިއެވެ.

ފައްޔާޒު ވިދާޅުވީ، ދައުލަތް އެތުރިފައި މިހާރު އޮންނަ ގޮތުން ވަރަށް ގިނަ ބާރުތައް އޮންނަނީ ރައީސުލްޖުމްހޫރިއްޔާއަށް ކަމަށެވެ. އެކަމާ ގުޅިގެން ރައީސަށް މަޖިލިސް ލިބުމުން ކަންކަމުގައި ބޭނުން ގޮތަކަށް އަމަލު ކުރުމުގެ ފުރުސަތު ލިބިގެންދާ ކަމަށެވެ.

"އެހެންވީމަ އަޅުގަނޑުމެން މި ހުށަހަޅަނީ ސަރުކާރުގެ ބާރު ކުޑަ ކުރަން، ކުޑަކުރާއިރުގައި ދައުލަތާއި ސަރުކާރާ އެއީ ވަކި ދެކަމެއްގެ ގޮތުގައި ބާއްވާފައި ދައުލަތުގެ ވެރިއަކާއި ސަރުކާރުގެ ވެރިއަކާ ބަދަލުކުރުން ނަމަވެސް މިއީ ބަރުލަމާނީ ނިޒާމެއްގެ ވާހަކައެއް ނޫން،"

އެގޮތުން ސަރުކާރު ހިންގާނީ މިހާރުވެސް އޮންނަ ގޮތަށް ރައްޔިތުން އިންތިހާބުކުރާ ރައީސުލްޖުމްހޫރިއްޔާއެއް ކަމަށާއި، ދައުލަތުގެ ވެރިޔާއަކީ މަޖިލީހުން ނުވަތަ ބޮޑު މަޖިލީހުން އައްޔަންކުރާ މީހެއްކަމުން ސަރުކާރުގެ ވެރިޔަކީ މިހާރެކޭ އެއްގޮތަށް ރައްޔިތުންގެ އާއްމު ވޯޓަކުން ހޮވިގެން ހުންނަ ވެރިޔެއް ކަމަށާއި، އޮންނާނީ އެ ރައީސް ހުށަހަޅުއްވާ ކެބިނެޓެއް ކަމަށްވެސް ވިދާޅުވިއެވެ.

ބޮޑު ބަދަލުގެ ސިޔާސަތުގައި ރައްޔިތުންގެ މަޖިލީހަށްވެސް ބޮޑު ބަދަލުތަކެއް ގެންނަން ވަނީ ހުށަހަޅައިފައެވެ.

"އޭރުގެ އުއްމީދަކަށްވީ އެ ދާއިރާއެއްގެ މީހަކަަށް އެ ދާއިރާއެއްގެ ރައްޔިތުން ތަމްސީލުކުރަން އާދެވޭނެ ގޮތެއް ހޯދުން، އޭރުގައި ފައިސާ ހަރަދުކޮށްގެނެއް ނޫން މަޖިލީހަށް މެންބަރުން އަންނަނީ. އެހެންނަމަވެސް މިދިޔަ 15، 20 އަހަރު ތެރޭގައި ބަދަލުވެގެން މިދިޔައީ މަޖިލީހަށް މި އާދެވެނީ ވަރަށް ބައިވަރު ފައިސާ ހަރަދު ކޮށްގެން. އަނެއްހެން ދަންނަވަންޏާ ހަމަ ރައްޔިތުންނަށް ރިޝްވަތު ދީގެން ރައްޔިތުން އަތުން ވޯޓު ގަނެގެން. މަޖިލީހަށް މި އާދެވެނީ 10 މިލިއަން 15 މިލިއަން 5 މިލިއަން ހަރަދުކޮށްގެން މަޖިލީހަަށް މީހަކު އައިސްފަ ރައްޔިތުންގެ ހައްގުގައި އޭނާ ދައްކާނެ ވާހަކައެއް ދެން ނޯންނާނެ،"

އެހެންކަމުން ފައްޔާޒުގެ ހުށަހެޅުއްވުމަކީ އަތޮޅަކުން މެންބަރަކު ތަމްސީލުކުރާ ގޮތަށް ރައްޔިތުންގެ މަޖިިލިސް އެކުލަވައިލުމެވެ.

"ތަންކޮޅެއް ބޮޑު ދާއިރާއަކުން މަޖިލިސް މެންބަރުން ހޮވާ ކަމަށްވަންޏާ ވޯޓު ގަނެ ވިއްކުމުގެ ކަންތައްތައް ހުއްޓުމަކަށް ގެނެވޭނެ. ރައްޔިތުންގެ މަގުބޫލުކަން އޮތް މީހަކަށް އޭރުން އާދެވޭނީ ރަަނގަޅު ސިޔާސަތުތަކެއް ހިފައިގެން ރައްޔިތުންގެ ފަރާތުން ވަކާލާތުކުރަން. އެހެެންވީމަ އަޅުގަނޑުމެން މި ހުށަހަޅަނީ މަޖިލިސް ވަކި އަދަދަކަށް ފިކްސް ކޮށްފަ އަދަދެއް އަޅުގަނޑަކަށް ނޭނގެ އެއީ އިތުރު މަޝްވަރާއަށްފަހުން ނިންމަންޖެހޭކަމެއް. އެހެންނަމަވެސް މަޖިލިސް މެންބަރު ހޮވަން އަޅުގަނޑުމެން ހުށަހަޅާފައި މިއޮތީ މުޅި އަތޮޅުންނޭ. އެހެންނަމަވެސް އަޅުގަނޑުމެން ކުރިއަށްއޮތް އިތުރު މަޝްވަރާތަކުގައި ބަދަލުތައް ގެނެވޭނެ،"

ބޮޑު ބަދަލުގެ ސިޔާސަތު ކޮންގްރެސް އިން ފާސްކުރީ އެވަގުތު ކޮންގްރެސް ބައްދަލުވުމުގައި ތިބި 563 މެންބަރުންގެ ތެރެއިން 520 މެންބަރުން ވޯޓު ދީގެންނެވެ.