ފިނޭންސް އެންޑް ޕަބްލިކް އެންޓަޕްރައިސަސް މިނިސްޓަރު ހަސަން ޒަރީރާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ މެނޭޖިން ޑިރެކްޓަރު އަހުމަދު ސައުދީ މިއަދު ބައްދަލުކުރައްވައި، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ މަސައްކަތްތައް އެމްޓީސީސީއާ އެއްކޮށްލުމާ ގުޅޭގޮތުން މަޝްވަރާކުރައްވައިފިއެވެ.

އެމްޓީސީސީގައި ކުރިއަށްދިޔަ މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ ސަރުކާރުން ހިންގާ ތަރައްގީގެ މަޝްރޫއުތައް ތަންފީޒުކުރުން މިހާރަށްވުރެ އަވަސްކުރުމަށް ކުރެވެން ހުރި ކަންކަމުގެ މައްޗަށެވެ. އެގޮތުން، މަޝްރޫއުތައް ހުއްޓުމެއްނެތި ކުރިއަށްގެންދިއުމަށްޓަކައި ކުންފުނިތަކުގެ ހިންގުން ހަރުދަނާކުރުމުގެ މުހިންމުކަން ވަނީ ފާހަގަކޮށްފައެވެ.

މީގެ އިތުރުން، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ އޮޕަރޭޝަންތައް އެމްޓީސީސީގެ ދަށަށް ބަދަލުކުރުމުގެ މަސައްކަތްތަކާ ގުޅޭގޮތުންވެސް ދެ ބޭފުޅުން ވަނީ ފުޅާ ދާއިރާއެއްގައި މަޝްވަރާކުރައްވައިފައެވެ. މި ބަދަލުވުމުގެ މަރުހަލާ އޮމާންކަމާއެކު އަދި އެންމެ އެކަށީގެންވާ ނަތީޖާ ނެރެވޭނެ ގޮތަކަށް ކުރިއަށްގެންދިއުމަށް ބޭނުންވާ ފިޔަވަޅުތަކާ މެދުވެސް މި ބައްދަލުވުމުގައި ވާހަކަދެކެވިފައިވާ ކަމަށް އެމްޓީސީސީން ބުންޏެވެ.

އާރުޑީސީ އުވާލައި އެމްޓީސީސީއާ އެއްކޮށްލަން ކެބިނެޓުން ނިންމާފައިވާކަން ރައީސް ޑރ. މުހައްމަދު މުއިއްޒު ވަނީ މިދިޔަ މަހުގެ 7 ގައި ބޭއްވި ނޫސްވެރިންގެ ބައްދަލުވުމުގައި އިއުލާންކުރައްވައިފައެވެ. އާރުޑީސީން ކުރަމުންދަނީ މައިގަނޑު ގޮތެއްގައި މަގުހެދުމުގެ މަސައްކަތް ކަމަށާއި އެމްޓީސީސީއަކީ ވެސް މަގު ހަދައި، އަދި އެހެން އުމްރާނީ މަސައްކަތްތައްވެސް ކުރާ ކުންފުންޏެއް ކަމަށް އެމަނިކުފާނު ވިދާޅުވެފައިވެއެވެ.

"ޑުޕްލިކޭޝަން ވަރަށް ގިނަ، ހަރަދު ވަރަށް ގިނަ. އެހެންވީމަ، އެފިޝަންޓް ނިޒާމެއްގެ ތެރެއިން އުމްރާނީ މަސައްކަތްތައް ޑެލިވާ ކުރުމަށްޓަކައި، މި ބަދަލު މި ގެންނަނީ. އެހެންވީމަ އާރްޑީސީ އުވާލެވި، އެމްޓީސީސީއާ އެއްކޮށްލެވި، އެމްޓީސީސީގެ ސަރުކާރުގެ ހިއްސާ ބޮޑުކުރެވި ރައްޔިތުންނަށް މީގެ ފައިދާތައް ލިބިގެންދާނެ. އެހެންވީމަ، މި ދެ މަސައްކަތްވެސް އިރާދަކުރެއްވިއްޔާ ކުރިއަށްދާނެ،" އެމަނިކުފާނު ވިދާޅުވެފައިވެއެވެ.

އޭގެ އިތުރުން އެމްޑަބްލިޔުއެސްސީގެ 100 ޕަސަންޓު ހިއްސާ އާއި ދިރާގުގެ 51 ޕަސަންޓުގެ ހިއްސާ ސަރުކާރަށް ގަނެ، ބައެއް އެހެން ކުންފުނިތައް ވެސް އެއްކޮށްލަން ނިންމަވާފައިވާކަން ވެސް ރައީސް އިއުލާންކުރެއްވިއެވެ.