ބަހުސަށް ބައެއް މެންބަރުންނަށް ފުރުސަތު ނުލިބުމާއެކު އަޑުގަދަކުރުމުން އެމްޑީޕީ ކޮންގްރެސް ހޫނުވެއްޖެ

ބަހުސްގައި ބައިވެރިވާން ފުރުސަތަކަށް އެދި، އެ ހުރިހާ ފަރާތްތަކަށް ފުރުސަތުނުދީ ކޮންގްރެސް ނިންމައިނުލެވޭނެ ކަމަށްބުނެ އަޑުގަދަކުރުމުން އެމްޑީޕީގެ ކޮންގްރެސް ހޫނުވެއްޖެއެވެ.

މާލޭ ސިޓީ ކައުންސިލުގައި މިހާރު ކުރިއަށްދާ އެމްޑީޕީގެ ކޮންގްރެސްގެ މިއަދުގެ ހެނދުނު ބޭއްވީ އެ ޕާޓީގެ އަސާސީ ގަވާއިދަށް އިސްލާހު ހުށަހެޅުމާއި އެ އިސްލާހުތަކަށް ބަހުސްކުރުމުގެ ސެޝަނެވެ. އަދި މިއަދު މެންދުރުފަހުން ފެށިގެން ކުރިއަށްގެންދިޔައީ ސިޔާސަތު ކަރުދާސް ހުށަހެޅުމާއި ބަހުސަށް ފުރުސަތުދިނުމެވެ.

ވޯޓު ނެގުމަށް ވަގުތު ހަމަވުމާއެކު ރިޔާސަތުން ވަނީ، އިސްލާހުތައް ހުށަހެޅި މެންބަރުންނަށް ފަހު ފުރުސަތު ދީފައެވެ. އެގޮތުން އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލްގެ ވާހަކަތަކަކަށްފަހު އަޑުގަދަވެގެންދިޔައެވެ. އެއީ އިންތިހާބުތަކުގައި ފިރިހެނުންނާ ވެސް އަންހެނުންނަށް ވާދަކުރެވޭނެ ކަމަށް ވިދާޅުވެ، މަނަދޫ ދާއިރާގެ ރައީސް މުހައްމަދު ތޯރިގު ދައްކަވާފައިވާ ވާހަކަތަކަކަށް ފައްޔާޒް ދެއްވި ރައްދެކެވެ.

ފައްޔާޒް ވިދާޅުވީ އެމްޑީޕީގެ މެންބަރެއް ނެތް ރަށެއްގެ މީހަކަށް ގައުމީ މަޖިލީހުގެ މެންބަރުކަން ދިނުމަށް ހަމަހަމަކަން ބޭނުންވާ ބޭފުޅުންނަށް، އަންހެނުންނަށް ކުޑަ ޕަސަންޓެއް ދޭން އެއްބަސްނުވެވޭ ކަމަށެވެ.

ފައްޔާޒްގެ އެ ވާހަކަތަކަށްފަހު ބައެއް މެންބަރުންނަށް ފުރުސަތު ނުލިބި ވޯޓާ ހިސާބަށް ދާން ނަޝީދު ނިންމެވުމުން، އެކަމާ ބައެއް މެންބަރުން ހިތްހަމަނުޖެހުން ފާޅުކޮށް އަޑުގަދަކުރަމުންދިޔައެވެ. އަދި އެ ފަރާތްތަކުން އަޑުގަދަކޮށް ކޮންގްރެސް ކުރިއަށްގެންދިއުމަށް ހުރަސް އަޅަމުންދިއުމުން ހޫނުވެގެން ވެސް ދިޔައެވެ.

ރިޔާސަތުން ރައީސް ނަޝީދު ވިދާޅުވީ ކޮންގްރެސް ކުރިއަށްގެންދަނީ ގަވާއިދާ އެއްގޮތަށް ކަމަށާއި ވަކި ބަޔަކަށް ފުރުސަތުދިނުމުގެ ބަދަލުގައި ވާހަކަދެއްކުމުގެ ފުރުސަތުދެމުންދަނީ ކަރުދާސްކޮޅު ނަގައިގެން ކަމަށެވެ. އަދި ކޮންގްރެސްގައި ވާހަކަދެއްކުމުގެ ފުރުސަތު ބައެއް ފަރާތްތަކަށް ނުލިބުނު ކަމުގައިވީ ނަމަވެސް، ވަގުތަށް ނިންމާލަން ޖެހޭ ކަމަށް އެ މަނިކުފާނު ވިދާޅުވިއެވެ.

އެއަށްފަހު ނަޝީދު ވަނީ އެމްޑީޕީގެ އަސާސީ ގަވާއިދަށް ހުށަހަޅާފައިވާ އިސްލާހުތަކާއި ސިޔާސަތުތަކަށް ހުށަހަޅާފައިވާ ކަރުދާސްތަކަށް ވޯޓަށް އައްސަވައިފައެވެ.