އެމްޑީޕީގެ ރައީސާއި ނައިބު ރައީސްގެ މަގާމު އުވާލައި، އެންމެ އިސް މަގާމުގެ ގޮތުގައި ޗެއާޕާސަންގެ މަގާމު ހަމަޖެއްސުމަށް އެ ޕާޓީގެ އަސާސީ ގަވާއިދަށް އިސްލާހު ގެނެސްފިއެވެ.

މާލޭ ސިޓީ ކައުންސިލުގެ ހޯލުގައި ކުރިއަށްދާ އެމްޑީޕީގެ ކޮންގްރެސްއަށް އެ އިސްލާހުތައް ހުށަހަޅުއްވާފައިވަނީ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ. އެ އިސްލާހުތަކާއެކު ވެސް ފައްޔާޒް ވަނީ ގިނަ އިސްލާހުތަކެއް ހުށަހަޅުއްވައިފައެވެ.

ފައްޔާޒްގެ އެ ހުށަހެޅުއްވުމަށް ޖުމުލަގޮތެއްގައި ގިނަ މެންބަރުން ތާއީދުކުރި ނަމަވެސް، ބައެއް އިސްލާހުތަކަށް ތާއީދުނުކުރާކަން ބައެއް މެންބަރުން ވަނީ ފާހަގަކޮށްފައެވެ. އެގޮތުން ބައެއް މެންބަރުން ތާއީދުކޮށްފައިނުވަނީ، އާބާދީއަށް ބަލާފައި ރަށްރަށުން ގައުމީ މަޖިލީހަށް މެންބަރުން އިތުރުކުރުމުގެ އިސްލާހާއި، މަގާމުތައް އުވާލައި ހުރިހާ ބާރެއް ޗެއާޕާސަނަށް ދިނުމުގެ އިސްލާހަށެވެ. އޭގެ އިތުރުން ފައްޔާޒްގެ އިސްލާހުތަކަށް ގަނޑުކޮށް ވޯޓު ނަގަން އުޅޭތީ ކަންބޮޑުވުންތަކެއް ވެސް ފާޅުކުރިއެވެ.

އެމްޑީޕީގެ ޕާލިމަންޓަރީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މަޖިލިސް މެންބަރު އިބްރާހިމް ނާޒިލް ވެސް ވަނީ އިސްލާހެއް ހުށަހަޅުއްވައިފައެވެ. އެއީ ޕާޓީގެ އިންތިހާބުތަކަށް ކުރިމަތިލުމާއި ވޯޓުދިނުމާ ގުޅޭގޮތުން ފައްޔާޒް ހުށަހެޅުއްވި ހުށަހެޅުއްވުމަށް ގެންނަ ބަދަލެއްގެ ގޮތުގައެވެ. ފައްޔާޒްގެ ހުށަހެޅުމުގައި ވަނީ، ވޯޓުލެވޭނީ އެ އިންތިހާބަކަށް ނުވަތަ ވޯޓަކަށް އިއުލާންކުރާ ދުވަހުގެ ތިން މަސް ދުވަސް ކުރިން ޕާޓީގެ ދަފްތަރުގައި ރަޖިސްޓަރީވެފައިވާ މެންބަރުންނަށެވެ. އަދި އިންތިހާބުތަކުގައި ވާދަކުރުމުގެ ހައްގު ލިބިގެންވާނީ އެ އިންތިހާބަކަށް އިއުލާންކުރާ ދުވަހު ޕާޓީގެ ދަފްތަރުގައި ރަޖިސްޓަރީވެފައިވާ މެންބަރުންނަށް ކަމަށް ހުށަހެޅުމުގައިވެއެވެ.

ނާޒިލް ހުށަހެޅުއްވީ އިންތިހާބުގައި ވޯޓުލެވޭނީ، ވޯޓުލާ ދުވަސްކަމަށް ކަނޑައަޅާ ދުވަހުގެ ތިން މަސް ދުވަސްކުރިން ޕާޓީގެ މެންބަރުންގެ ގޮތުގައި ތިބި މެންބަރުންނަށް ހެދުމަށް އަދި އިންތިހާބު ބާއްވާ ދުވަހުގެ ހަތަރު މަސް ދުވަސްކުރިން އިންތިހާބުތަކަށް އިއުލާންކުރުމަށެވެ. އެ އިސްލާހުތަކަށް ފައްޔާޒް ވެސް ވަނީ ތާއީދުކުރައްވައިފައެވެ. ނާޒިލްގެ އެ އިސްލާހު ކޮންގްރެސްގައި ބައިވެރިވި މެންބަރުންގެ އަގުލަބިއްޔަތުން ވަނީ ފާސްކޮށްފައެވެ.

އޭގެ އިތުރުން އެމްޑީޕީގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހުމާން ވެސް އަސާސީ ގަވާއިދަށް ހަ އިސްލާހެއް ހުށަހެޅިއެވެ. ޝާތިރު ހުށަހެޅި އިސްލާހުތަކުގެ ތެރޭގައި ގޮފިތައް އުވާލުމާއި، ކޮންގްރެސްގައި ބައިވެރިންގެ ނަންތައް ދިހަ ދުވަސްކުރިން އިއުލާންކުރުމާއި އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތް ކަމުގެ މައްސަލަތަކުގައި ވޯޓުނުލެވޭ ގޮތަށް ހެދުމާއި މުހިންމު ކޮމިޓީތަކެއް އައްޔަންކުރުމުގެ ބާރު ޗެއާޕާސަންގެ އަތުން ނަގައި ގައުމީ މަޖިލީހަށް ދިނުން ފާހަގަކޮށްލެވެއެވެ. އަދި މިހާރު ވެސް އޮންނަ ގޮތަށް ގައުމީ މަޖިލީހަށް ކޮންމެ ރަށަކުން ވެސް އެއް މެންބަރު އިންތިހާބުކުރަން ޖެހޭ ގޮތަށް ބޭއްވުމަށް ހުށަހެޅުއްވިއެވެ.

ޝާތިރު ހުށަހެޅުއްވި އިސްލާހުތަކުގެ ތެރެއިން ކޮންގްރެސްގައި ބައިވެރިންގެ ނަންތައް ދިހަ ދުވަސްކުރިން އިއުލާންކުރުމާއި އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތް ކަމުގެ މައްސަލަތަކުގައި ވޯޓުނުލެވޭ ގޮތަށް ހެދުމާއި ގައުމީ މަޖިލީހުގައި ކޮންމެ ރަށަކުން އެއް މެންބަރަކު ހިމެނުމަށް ހުށަހެޅި އިސްލާހު ވަނީ ފާސްކޮށްފައެވެ.

އެމްޑީޕީގެ އަސާސީ ގަވާއިދަށް ފައްޔާޒް ހުށަހެޅުއްވި އިސްލާހުތަކުގެ ތެރޭގައި ލީޑާޝިޕަށް ގެންނަ ބަދަލުތަކާއި އިތުރު ޗެއާޕާސަންގެ ނައިބެއް ހަމަޖެއްސުމާއި ކޮންގްރެސް އެކުލެވިގެންވާ ގޮތަށް ބަދަލު ގެނައުމާއި ގައުމީ މަޖިލީހަށް މެންބަރުން އިތުރުކުރުމާއި ރިޔާސީ ކެންޑިޑޭޓު ތަބާވާން ޖެހޭ އުސޫލުތަކެއް ކަނޑައެޅުން ފަދަ އިސްލާހުތައް ހިމެނެއެވެ. ނަމަވެސް އޭގެ ތެރެއިން ބައެއް އިސްލާހުތަކަށް ފަހުން ވަނީ ބަދަލުތައް ގެންނަވައިފައެވެ. ބަދަލުތަކާއެކު ފައްޔާޒް ހުށަހެޅުއްވި އިސްލާހުތައް 546 ވޯޓާއެކު ވަނީ ފާސްކޮށްފައެވެ.

ފައްޔާޒްގެ ހުށަހެޅުމުގައި ލީޑާޝިޕަށް ގެންނަ އެންމެ ބޮޑު ބަދަލެއްގެ ގޮތުގައި ފާހަގަކޮށްލެވެނީ ޕާޓީގެ ރައީސާއި ނައިބު ރައީސްގެ މަގާމު އުވާލުމެވެ. އޭގެ ބަދަލުގައި ޗެއާޕާސަންގެ މަގާމަކީ އެންމެ އިސް މަގާމުގެ ގޮތުގައި ހަމަޖެއްސުމަށް ހުށަހެޅުއްވިއެވެ. އޭގެ އިތުރުން ޗެއާޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށް ހަމަޖެއްސުން ވެސް ހިމެނެއެވެ. އަދި މިހާރު ހިމެނޭ ޗެއާޕާސަން ނައިބު (އިދާރީ) އާއި ޗެއާޕާސަން ނައިބު (މާލީ)ގެ އިތުރުން ޗެއާޕާސަން ނައިބު (ސިޔާސީ) މަގާމު އިތުރުކުރުމަށް ހުށަހެޅުއްވިއެވެ.

އެމްޑީޕީގެ ރިޔާސީ ކެންޑިޑޭޓު ތަބާވާން ޖެހޭ އުސޫލުތައް ކަނޑައެޅުމަށް ވެސް ފައްޔާޒްގެ އިސްލާހުތަކުގެ ތެރޭގައި ހިމެނެއެވެ. އެ އުސޫލުތަކަކީ؛

  • ރިޔާސީ ޕްރައިމަރީ ކާމިޔާބުކުރާ ފަރާތަށް، ގައުމީ އިންތިހާބު ކާމިޔާބުވެއްޖެނަމަ ސަރުކާރު އެކުލަވާލުމުގައާއި، މުހިންމު ސިޔާސަތުތައް ކަނޑައެޅުމާއި، ތަންފީޒުކުރުމަށް ގައުމީ މަޖިލީހުގެ ލަފައާއި މަޝްވަރާ ހޯދުމަށް އެއްބަސްވާ އެއްބަސްވުމެއްގައި ޕާޓީއާއެކު ސޮއިކުރުން ލާޒިމުވުން.
  • ޕާޓީ ދިވެހިރާއްޖޭގެ ވެރިކަމާ ހަވާލުވެ އޮންނައިރު ސަރުކާރުގެ މައިގަނޑު ސިޔާސަތުތައް އެކުލަވާލުމުގައި ރައީސުލްޖުމްހޫރިއްޔާ ޕާޓީއާއެކު އަބަދުވެސް މަޝްވަރާކުރަންވާން.
  • ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރަންވާނެ.
  • ރިޔާސީ ޕްރައިމަރީ ކާމިޔާބުކުރާ ފަރާތަކީ ގައުމީ މަޖިލީހުގެ މެންބަރެއް ކަމުގައިވާނަމަ، ޕާޓީއާއެކު ޕާޓީއާއެކު އެއްބަސްވުމުގައި ސޮއިކުރާ ދުވަހުން ފެށިގެން އެފަހަރުގެ ރިޔާސީ އިންތިހާބު ކާމިޔާބުކުރާ ފަރާތުން ރައީސުލްޖުމްހޫރިއްޔާގެ ހުވާކުރާ ދުވަހާ ހަމައަށް ގައުމީ މަޖިލީހުގެ މެންބަރެއްގެ ގޮތުގައި ހިމެނޭނެ.