ޖީ7 ގައުމުތަކުގެ ރިޒާވްތަކުން ކުރިއަށް އޮތް ހަތަރު މަސްދުވަހުގެ ތެރޭގައި 100 މިލިއަން ފީފާގެ ތެޔޮ ބާޒާރަށް ނެރެން ނިންމައިފިއެވެ.

ފަރަންސޭސިވިލާތުގެ ރައީސް އެމަނުއެލް މެކްރޯން ވިދާޅުވި ގޮތުގައި، މިގޮތަށް ނިންމީ ދުނިޔޭގެ ބާޒާރުގައި ތެލުގެ އަގު އުފުލެމުންދާތީއާއި، އެމެރިކާއިން ޑީސަލް އެކްސްޕޯޓުކުރުން މަނާކޮށްފާނެކަމުގެ އިންޒާރު އެ ގައުމުގެ ރައީސް ޑޮނަލްޑް ޓްރަމްޕް ދެއްވުމާ ގުޅިގެންނެވެ. އެމެރިކާގައި ނޮވެންބަރު މަހު ބާއްވާ މިޑްޓާމް އިންތިހާބާ ދިމާކޮށް އެ ގައުމުގައި ތެލުގެ އަގު އިންތިހާއަށް އުފުލިފައިވުމުން، އަގުތައް ދަށްކުރުމަށް ޓްރަމްޕަށް ވަނީ ޕްރެޝަރު ބޮޑުވެފައެވެ.

ޖީ7 އިން ނެރުނު ގުޅިފައިވާ ބަޔާނެއްގައި ބުނެފައިވާ ގޮތުގައި، އިންޓަނޭޝަނަލް އެނާޖީ އޭޖެންސީ (އައިއީއޭ) މެދުވެރިކޮށް މި ތެޔޮ ނެރުމުގެ މަސައްކަތް ވަގުތުން ފަށާނެއެވެ. ފުރަތަމަ 20 ދުވަހުގެ ތެރޭގައި ބޮޑު އަދަދެއްގެ ޑީސަލް ބާޒާރަށް ނެރޭނެކަމަށް އެ ބަޔާނުގައި ބުނެފައިވެއެވެ. މީގެ އިތުރުން، ޖީ7 ގައުމުތަކުގެ މެދުގައި ހަކަތައިގެ ބާވަތްތައް އެކްސްޕޯޓުކުރުމަށް އެއްވެސް ހުރަހެއް ނާޅަން އެ ގައުމުތަކުން އެއްބަސްވެފައިވާކަމަށް ވެސް އެ ބަޔާނުގައި ފާހަގަކޮށްފައިވެއެވެ.

ޖީ7 ގެ ނިންމުމަށްފަހު ނޫސްވެރިންނާ ވާހަކަފުޅުދައްކަވަމުން ޓްރަމްޕް ވިދާޅުވީ، ޔޫރަޕުން ގިނަ އަދަދެއްގެ ޑީސަލް ނެރެން އެއްބަސްވެފައިވާތީ އެމެރިކާއިން އެކްސްޕޯޓުކުރުން މަނާ ނުކުރާނެ ކަމަށެވެ.

މީގެ އިތުރުން، ޓްރޫތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ޔޫރަޕުގެ ރިޒާވްތަކުގައި ހުރި ގިނަ އަދަދެއްގެ ޑީސަލް ނެރެން އެއްބަސްވެފައިވާ ކަމަށާއި، އެ މަސައްކަތް ވަގުތުން ފަށާނެ ކަމަށެވެ.

ބްލޫމްބާގުން ރިޕޯޓުކޮށްފައިވާ ގޮތުގައި، ޖީ7 ގެ މި ނިންމުމުގެ ސަބަބުން ކުރު މުއްދަތެއްގައި ތެލުގެ އަގު ދަށްވި ނަމަވެސް، މިއީ ދާއިމީ ހައްލެއް ނޫންކަމަށް ބައެއް އެނަލިސްޓުން ފާހަގަކުރެއެވެ.