ރަސްމާލޭގައި އީގަލް ހިލްސްއިން ތަރައްގީކުރަން ނިންމާފައިވާ ބޮޑު މަޝްރޫއު އައްޑޫ ސިޓީއަށް ބަދަލުކުރުމުގެ ހިޔާލު، އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ހުށަހަޅުއްވައިފިއެވެ.

އެމްޑީޕީގެ ކޮންގްރެސް ތެރެއިން މިރޭ ބޭއްވި "ރަށްވެހި ތަރައްގީ" ފޯރަމްގެ ތެރެއިން ނަޝީދު ވަނީ އައްޑޫ ސިޓީގެ މޭޔަރު އަލީ ނިޒާރާ ސުވާލު ކުރައްވައިފައެވެ. އެގޮތުން، ރަސްމާލެ މަޝްރޫއު އައްޑުއަށް ގެންދިއުމަށް އީގަލް ހިލްސްއިން އެއްބަސްވެއްޖެ ނަމަ، އެކަމާ މެދު ދެކެނީ ކިހިނެއްތޯ ނަޝީދު ސުވާލުކުރެއްވިއެވެ.

މި ސުވާލަށް ޖަވާބު ދެއްވަމުން ނިޒާރު ވިދާޅުވީ، މިހާރު އޮތް ގޮތަށް އެ މަޝްރޫއު އައްޑުއަށް ގެންދިއުމަށް ތާއީދު ނުކުރައްވާ ކަމަށެވެ. ނަމަވެސް، ދެފުށް ފެންނަ ގޮތެއްގައި އަދި ރައްޔިތުންނަށް ހުރިހާ މައުލޫމާތެއް ސާފުވާނެހެން މަޝްރޫއު ކުރިއަށްދާ ނަމަ، އެކަމަށް އައްޑޫ ކައުންސިލުން އެއްވެސް ހުރަހެއް ނާޅާނެ ކަމަށާއި މަރުހަބާ ކިޔާނެ ކަމަށް ނިޒާރު ވިދާޅުވިއެވެ.

އެއާއެކު ނަޝީދު ވަނީ އެ އިންވެސްޓަރުން އައްޑުއަށް ގެނައުމުގެ އުންމީދު ފާޅުކުރައްވައިފައެވެ. އެގޮތުން، އެކަމަށް އެމްޑީޕީގެ ފަރާތުން ލޮބީކުރުމަށް ނަޝީދު ހުށަހެޅުއްވިއެވެ.

ފަތުރުވެރިކަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ހިންގާ މި މަޝްރޫއާ ގުޅޭގޮތުން ނަޝީދު ފާހަގަކުރެއްވި ގޮތުގައި، މިފަދަ އިގްތިސޯދީ މަޝްރޫއުތަކަށާއި ރެސިޑެންސީ ޕްރޮގްރާމްތަކަށް ގައުމު ހުޅުވާލުމަކީ އުސޫލެއްގެ ގޮތުން ގޯސް ކަމެއް ނޫނެވެ. ނަމަވެސް، އެ މަޝްރޫއުގެ ކޮންޓްރެކްޓް ހާމަކޮށްފައި ނުވުމާއި، އެޑްވާންސް ފައިސާ ނުލިބުމުގެ އިތުރުން މާލެ ސަރަހައްދުގައި އެކަން ކުރުމަކީ އެ މަނިކުފާނުގެ ކަންބޮޑުވުމެއްކަމަށް ވިދާޅުވިއެވެ.

ރަސްމާލެ މަޝްރޫއު އައްޑޫއަށް ބަދަލުކުރުމުގެ ވިސްނުން ނަޝީދު ގެންގުޅުއްވާއިރު، ކުރީގެ ރައީސް އިބްރާހިމް މުހައްމަދު ސޯލިހު ވަނީ އެމްޑީޕީގެ ވެރިކަމެއްގައި މި އެއްބަސްވުމަށް އެއްވެސް ޖާގައެއް ނޯންނާނެކަމަށް ވިދާޅުވެފައެވެ.