މިނިސްޓްރީތަކުން ހިންގަމުންދާ މަޝްރޫއުތަކާއި މަސައްކަތްތަކުގެ މައުލޫމާތު ރައްޔިތުންނާ ހިއްސާކުރުމަށް ބާއްވާ ސިލްސިލާ "އަހާ" ފޯރަމްގެ އަށްވަނަ ބައްދަލުވުން، މިއަންނަ އާދިއްތަ ދުވަހުގެ ރޭ ބާއްވަން ނިންމައިފިއެވެ.

ރައީސް އޮފީހާއި، ޕަބްލިކް ސާވިސް މީޑިއާ (ޕީއެސްއެމް) ގުޅިގެން ގެނެސްދޭ މި ފޯރަމަކީ، ދައުލަތުގެ އެކި އިދާރާތަކުގެ މަސައްކަތްތައް ވީހާވެސް ދެފުށް ފެންނަ ގޮތެއްގައި އާންމުންނަށް ތަފްސީލުކޮށްދީ، ރައްޔިތުންގެ ހުރި ޝަކުވާތަކާއި ސުވާލުތަކަށް ސީދާ މިނިސްޓަރުންގެ ފަރާތުން ޖަވާބު ހޯދައިދިނުމުގެ މަގުސަދުގައި ކުރިއަށްގެންދާ ހަރަކާތެކެވެ.

އާދިއްތަ ދުވަހުގެ 21:00 ގައި ފަށާ މި ފޯރަމް ދެ ގަޑިއިރަށް ކުރިއަށްދާއިރު، ބައިވެރިވެވަޑައިގަންނަވާ މިނިސްޓަރުންނާ ސުވާލުކުރުމުގެ ފުރުސަތު މިހާރު ވަނީ ހުޅުވާލައިފައެވެ. އެގޮތުން، ފޯރަމް ކުރިއަށްދާ މާލަމަށް ހާޒިރުވެ ސުވާލުކުރުމުގެ އިތުރުން، ޕީއެސްއެމް އެއާ އެޕްލިކޭޝަނާއި، ފޭސްބުކް އަދި އެކްސް މެދުވެރިކޮށްވެސް އޮންލައިންކޮށް ސުވާލު ފޮނުވުމުގެ ފުރުސަތު އާންމުންނަށް ލިބިގެންދާނެއެވެ.

އާދިއްތަ ދުވަހުގެ ރޭ އަހާ ފޯރަމްގައި ބައިވެރިވެވަޑައިގަންނަވަނީ އެޓާނީ ޖެނެރަލް އަހުމަދު އުޝާމް، ޑިފެންސް މިނިސްޓަރު ހަސަން ރަޝީދު އަދި އިކޮނޮމިކް އެންޓް ޓްރާންސްޕޯޓް މިނިސްޓަރު މުހައްމަދު ސައީދެވެ.

މި ސިލްސިލާ ފޯރަމްތައް އެންމެ ފުރަތަމަ ފަށާފައިވަނީ 2024 ވަނަ އަހަރުގެ ޖެނުވަރީ މަހުގައެވެ.