ގަވާއިދާ ހިލާފަށް ބޮޑުތަކުރުފާނު މަގުގައި ޕާކްކޮށްފައި ހުރި އުޅަނދުތައް ޓޯކުރަން ފަށައިފިއެވެ.

ފުލުހުން މިރޭ އެކްސްގައި ކުރި ޕޯސްޓެއްގައި ބުނީ މާލެގެ ބޮޑުތަކުރުފާނުމަގުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް ޓޯ ކުރުމުގެ މަސައްކަތް ކުރަމުންދާ ކަމަށެވެ. އެގޮތުން ރެއިން ފެށިގެން މިހާތަނަށް ހަތަރު ފުރޮޅުލީ ނުވަ އުޅަނދެއް ވަނީ ޓޯކޮށްފައެވެ.

ގަވާއިދާ ހިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ކުރަމުންދާ މަސައްކަތް މިރޭވެސް ކުރިއަށް ގެންދާނެ ކަމަށް ފުލުހުން ބުންޏެވެ. އެހެންކަމުން، މަގުމަތީގައި ގަވާއިދާ ހިލާފަށް އުޅަނދު ޕާކުނު ކުރުމަށާއި އެގޮތަށް ޕާކުކޮށްފައިވާ އުޅަނދުތައް ނެގުމަށް އެންމެހައި ފަރާތްތަކަށް ފުލުހުން ވަނީ އިލްތިމާސް ކޮށްފައެވެ.

ބޮޑުތަކުރުފާނުމަގު ފުޅާކޮށް، ތާރު އަޅައިގެން އަލުން ހެދި ހިސާބުގައި ޕާކް ކުރުމަކީ މަނާ ކަމެކެވެ. އަދި ބޮޑުތަކުރުފާނު މަގުގެ ގިނަ ސަރަހައްދުތަކަކީ ޕާކް ކުރުން މަނާ ސަރަހައްދުތަކެކެވެ.

ނަމަވެސް އެ ސަރަހައްދުތަކުގައި ގަވާއިދާ ހިލާފަށް ހަތަރު ފުރޮޅުލީ އުޅަނދުތައް ވަރަށް ގިނައިން ޕާކްކޮށްފައި ހުރެއެވެ. ހާއްސަކޮށް ބާޒާރުމަތީ ސަރަހައްދުގައި ޓެކްސީތަކާއި ޕްރައިވެޓް ކާރާއި ސައިކަލްތައް ވެސް މިހާރު ޕާކުކޮށްފައި ހުރެއެވެ.

އެންމެ ފަހުން ހަދައި ހުޅުވި، ހިސާބުގައި ޕާކްކުރުން އަދި މަދު ނަމަވެސް އެ މަގުގައި ވެސް ބައެއް ވެހިކަލްތައް ޕާކްކޮށްފައި ހުރެއެވެ.