މަގުމަތީގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން، ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާ ދެކޮޅަށް އެޅެން އޮތް އެންމެ ހަރުކަށި ފިޔަވަޅުތައް އެޅުމަށް ކޮމިޝަނާ އޮފް ޕޮލިސް އަހުމަދު މުހައްމަދު އަންގަވައި، އެ ފިޔަވަޅުތައް ތަންފީޒުކުރަން ފަށައިފިއެވެ.

ކޮމިޝަނާ އޮފް ޕޮލިސް މިރޭ ނެރުއްވި މެސެޖެއްގައި ވިދާޅުވީ، މަދު ބައެއްގެ ފަރުވާކުޑަ އަމަލުތަކުގެ ސަބަބުން ހިނގާ ނުރައްކާތެރި އެކްސިޑެންޓުތައް ހުއްޓުވުމަށްޓަކައި މުއައްސަސާތަކާ ގުޅިގެން ހާއްސަ ފިޔަވަޅުތަކެއް އަޅަން ނިންމާފައިވާ ކަމަށެވެ. އަދި މި ފިޔަވަޅުތައް މާލެ ސަރަހައްދުގެ އިތުރުން މުޅި ރާއްޖޭގައިވެސް އެންމެ މަތީ ދަރަޖައިގައި ކުރިއަށް ގެންދިއުމަށް ފުލުހުންގެ ކަމާބެހޭ ބަހާތަކަށް އަންގަވާފައިވާކަމަށް ކޮމިޝަނަރު ވިދާޅުވިއެވެ.

ކޮމިޝަނާ ވިދާޅުވީ މަގުތަކަކީ އަމާން ތަނަކަށް ހެދުމަށްޓަކައި އާންމު ރައްޔިތުންގެ ފުރިހަމަ އެއްބާރުލުން ދިނުމަށް އެދޭ ކަމަށެވެ.

ފުލުހުން މިފަދަ ފިޔަވަޅުތަކެއް އަޅަން ފަށާފައި މިވަނީ، މާލޭ ސޯސަންމަގުގައި މި މަހުގެ 20 ވަނަ ދުވަހު ހިނގި ނުރައްކާތެރި އެކްސިޑެންޓެއްގައި ޒުވާން އަންހެނަކު މަރުވެފައިވާ ދަނޑިވަޅެއްގައެވެ. އެ އެކްސިޑެންޓުގައި ލިބުނު ބޮޑެތި އަނިޔާތަކަށް ހޮސްޕިޓަލުގައި ފަރުވާދެމުން ދަނިކޮށް ނިޔާވީ ށ. ފޯކައިދޫ، މަގުމަތީގޭ، އުމުރުން 26 އަހަރުގެ އާއިޝަތު މާހިދާއެވެ.

އެ ހާދިސާއާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ ތ. ދިޔަމިގިލި، އައްސޭރި، އުމުރުން 21 އަހަރުގެ މާހު ހަސަންއެވެ. ކްރިމިނަލް ކޯޓުން އޭނާގެ ބަންދަށް 15 ދުވަސް ދީފައިވާއިރު، އޭނާއަކީ ލައިސަންސް ނެތި ސައިކަލު ދުއްވައިގެން މިއަހަރު ތެރޭގައި ހަތަރު ފަހަރަކު ޖޫރިމަނާކޮށްފައިވާ މީހެކެވެ.

ކޯޓު އަމުރުގައި ބަޔާންކޮށްފައިވާ ގޮތުގައި، މި އެކްސިޑެންޓު ހިނގަން މެދުވެރިވީ އޭނާ ބާރު ސްޕީޑުގައި ޒިގްޒެގްކޮށް ދުއްވާފައި ދަނިކޮށް އެހެން ސައިކަލެއްގައި ޖެހިގެންނެވެ. އެ އެކްސިޑެންޓުގައި އަނެއް ސައިކަލުގައި ތިބި ދެ މީހުންގެ ސިކުނޑިއަށްވެސް ވަނީ ބޮޑެތި ގެއްލުންތަކެއް ލިބިފައެވެ.

މީގެއިތުރުން، އާޓިފިޝަލް ބީޗު ސަރަހައްދުގައި ޓްރެފިކް ބޮޑު ވަގުތެއްގައި ނުރައްކާތެރި ގޮތަކަށް ބާރު ސްޕީޑުގައި ދުއްވި ދެ ސައިކަލެއްގެ ވީޑިއޯ ސޯޝަލް މީޑިއާގައި އާންމުވުމާ ގުޅިގެން، އެ މައްސަލާގައި ޝާމިލުވާ މީހުން ހޯދުމުގެ މަސައްކަތް ފުލުހުން ދަނީ ކުރަމުންނެވެ.