ރާއްޖޭގެ ދިރޭތަކެތީގެ ނަސްލުތައް ރައްކާތެރިކޮށް ދެމެހެއްޓުމަށް ބައިނަލްއަގުވާމީ ފެންވަރުގައި ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން، ގްލޯބަލް އެންވަޔަރަންމަންޓް ފެސިލިޓީ (ޖެފް) ގެ ހިލޭ އެހީގެ ދަށުން ހިންގާ ދެ މަޝްރޫއެއްގައި އެންވަޔަރުމެންޓް މިނިސްޓްރީން މިއަދު ސޮއިކޮށްފިއެވެ.

އެންވަޔަރުމެންޓް މިނިސްޓްރީގައި މިއަދު ބޭއްވި ރަސްމިއްޔާތެއްގައި އެކަމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަލީ ޝަރީފެވެ. ޔުނައިޓެޑް ނޭޝަންސް ފޯ ޑިވެލޮޕްމެންޓް ޕްރޮގްރާމް (ޔޫއެންޑީޕީ)ގެ ފަރާތުން ސޮއިކުރެއްވީ ރެޒިޑެންޓް ރެޕްރެޒެންޓޭޓިވް އަދްނާން ޗީމާއެވެ.

އެންވަޔަރުމެންޓް މިނިސްޓްރީން މިއަދު ބުނީ މި އެއްބަސްވުމުގެ ދަށުން ކުރިއަށް ގެންދިއުމަށް ހަމަޖެހިފައިވަނީ "އަމްބްރެލާ ޕްރޮގްރާމް ޓު ސަޕޯޓް އެންބީއެސްއޭޕީ އަޕްޑޭޓް އެންޑް ދަ 7 ނޭޝަނަލް ރިޕޯޓް" އަދި "އަމްބްރެލާ ޕްރޮގްރާމް ޓު ސަޕޯޓް ޑިވެލޮޕްމަންޓް އޮފް ބަޔޯޑައިވާސިޓީ ފައިނޭންސް ޕްލޭންސް" ދެ މަޝްރޫއެއް ކަމަށެވެ.

މި މަޝްރޫއުތަކުގެ މައިގަނޑު މަގްސަދަކީ 2022 ވަނަ އަހަރު ފާސްކުރި "ކުންމިން މޮންޓްރިއަލް ގްލޯބަލް ބައޯޑައިވާސިޓީ ފްރޭމްވޯކް" ގެ ލަނޑުދަނޑިތަކާ އެއްގޮތްވާ ގޮތުގެ މަތިން، ރާއްޖޭގެ ގައުމީ ސްޓްރެޓަޖީ އެކުލަވާލައި، އެކަންކަން ތަންފީޒުކުރުމަށް ބޭނުންވާ މާލީ ވަސީލަތްތައް ހޯދާނެ ދެމެހެއްޓެނިވި ޕްލޭނެއް އެކަށައެޅުންކަމަށް މިނިސްޓްރީން ބުންޏެވެ.

މި މަޝްރޫއުތަކުގެ ސަބަބުން ރާއްޖޭގެ "ނޭޝަނަލް ބަޔޯޑައިވާސިޓީ ސްޓްރެޓަޖީ އެންޑް އެކްޝަން ޕްލޭން" (އެންބީއެސްއޭޕީ) ޒަމާނީކޮށް އިސްލާކުރުމުގެ އިތުރުން، ބައިނަލްއަގުވާމީ މުއާހަދާގެ ދަށުން ހުށަހަޅަންޖެހޭ 7 ވަނަ ގައުމީ ރިޕޯޓް އެކުލަވާލުމަށް މަގުފަހިވާނެކަމަށް އެންވަޔަރުމެންޓް މިނިސްޓްރީން ބުންޏެވެ.

އަދި ދިރޭތަކެތީގެ ނަސްލު ހިމާޔަތްކުރުމަށް ބޭނުންވާ ފައިސާ ހޯދުމަށް "ނޭޝަނަލް ބައޯޑައިވާސިޓީ ފައިނޭންސް ޕްލޭން" ތައްޔާރުކުރުމުގެ މަސައްކަތްވެސް ކުރިއަށްދާނެކަމަށް މިނިސްޓްރީން ބުންޏެވެ.

މި ފިޔަވަޅުގެ ސަބަބުން ރާއްޖޭގެ ނާޒުކު ތިމާވެށި ރައްކާތެރިކުރުމަށް ކުރަމުންދާ މަސައްކަތްތައް އިތުރަށް ހަރުދަނާވެ، ބޭނުންވާ މާލީ އެހީތެރިކަން ދެނެގަނެ، އެ ވަސީލަތްތައް ފަސޭހަކަމާއެކު ހޯދުމަށް ބޮޑު ބާރަކަށް ވެގެންދާނެކަމަށް މިނިސްޓްރީން ބުންޏެވެ.