ކަރަންޓު ކެނޑުމުގެ މައްސަލަ ބޮޑުވެފައިވާ އައްޑޫ ސިޓީގެ ކަރަންޓުގެ ހުރިހާ ހިދުމަތްތަކާ ސްޓެލްކޯ އިން މިއަދު ރަސްމީކޮށް އަލުން ހަވާލުވެއްޖެއެވެ.

މިއީ، ސްޓެލްކޯއިން އައްޑޫގެ ކަރަންޓާ ހަވާލުވި ދެވަނަ ފަހަރެވެ. މާލެ ފިޔަވައި އެންމެ އާބާދީ ބޮޑު އައްޑޫ ސިޓީއަށް މިހާތަނަށް ކަރަންޓު ފޯރުކޮށްދެމުން އައީ ފެނަކަ ކޯޕަރޭޝަނުންނެވެ.

ނަމަވެސް، ހިދުމަތް ރަސްމީކޮށް ބަދަލުވުމާއެކު، ސްޓެލްކޯގެ މެނޭޖިން ޑިރެކްޓަރު އަލީ އަޒުވަރު މިހާރު އައްޑުއަށް ކުރައްވަމުން ގެންދަވާ ދަތުރުގައި ވަނީ އައްޑޫގެ މައި އިންޖީނުގެއަށާއި މަރަދޫފޭދޫ އޮފީހަށް ވަޑައިގެން އެ ތަންތަނުގައި ސްޓެލްކޯގެ ދިދަ ނަންގަވައިދެއްވައިފައެވެ.

މަރަދޫފޭދޫ އޮފީހުގެ މުވައްޒަފުންނާ ބައްދަލުކުރައްވައި ވާހަކަދައްކަވަމުން އަޒުވަރު ވިދާޅުވީ، މިއީ އައްޑޫގެ ރައްޔިތުންނަށް އާ އުއްމީދުތަކެއް ގެނެސްދިން މުހިންމު ފެށުމެއް ކަމަށެވެ. އަދި ކުރިއަށް އޮތް ތަނުގައި ޒަމާނީ ވަސީލަތްތަކުގެ އެހީގައި ރައްޔިތުންނަށް އިތުބާރު ހުރި، ދެމެހެއްޓެނިވި އަދި ފެންވަރު ރަނގަޅު ހިދުމަތެއް ފޯރުކޮށްދިނުމުގައި ދެމިތިބޭނެ ކަމުގެ ޔަގީންކަން އޭނާ ދެއްވިއެވެ.

އައްޑޫގެ ފެނާއި ނަރުދަމާގެ ހިދުމަތް މާދަމާއިން ފެށިގެން އެމްޑަބްލިއުއެސްސީގެ ބެލުމުގެދަށަށް ބަދަލުކުރުމަށް ވަނީހަމަޖެހިފައެވެ.