އެމްޑީޕީގެ ރައީސާއި ނައިބު ރައީސްގެ މަގާމު އުވާލައި، އެންމެ އިސް މަގާމުގެ ގޮތުގައި ޗެއާޕާސަންގެ މަގާމު ހަމަޖެއްސުމަށް އެ ޕާޓީގެ އަސާސީ ގަވާއިދަށް އިސްލާހު ހުށަހެޅުމަށް ނިންމައިފިއެވެ.

މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށްގެންދާ އެމްޑީޕީގެ ކޮންގްރެސްއަށް އެ އިސްލާހުތައް ހުށަހެޅުއްވުމަށް ނިންމަވާފައިވަނީ އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ.

ފައްޔާޒް ވަނީ އެމްޑީޕީގެ އަސާސީ ގަވާއިދަށް ގިނަ އިސްލާހުތަކެއް ހުށަހެޅުއްވުމަށް ނިންމަވައިފައެވެ. އެގޮތުން ލީޑާޝިޕަށް ގެންނަ ބަދަލުތަކާއި އިތުރު ޗެއާޕާސަންގެ ނައިބެއް ހަމަޖެއްސުމާއި ކޮންގްރެސް އެކުލެވިގެންވާ ގޮތަށް ބަދަލު ގެނައުމާއި ގައުމީ މަޖިލީހަށް މެންބަރުން އިތުރުކުރުމާއި ރިޔާސީ ކެންޑިޑޭޓު ތަބާވާން ޖެހޭ އުސޫލުތަކެއް ކަނޑައެޅުން ފަދަ އިސްލާހުތަކެއް ހިމެނެއެވެ.

ލީޑާޝިޕަށް ގެންނަ އެންމެ ބޮޑު ބަދަލެއްގެ ގޮތުގައި ފާހަގަކޮށްލެވެނީ ޕާޓީގެ ރައީސާއި ނައިބު ރައީސްގެ މަގާމު އުވާލުމެވެ. އޭގެ ބަދަލުގައި ޗެއާޕާސަންގެ މަގާމަކީ އެންމެ އިސް މަގާމުގެ ގޮތުގައި ހަމަޖެއްސުމަށް ހުށަހެޅުއްވުމަށް ވަނީ ނިންމަވައިފައެވެ. އޭގެ އިތުރުން ޗެއާޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށް ހަމަޖެއްސުމަށް ވެސް ހަމަޖެހިފައިވެއެވެ. އަދި މިހާރު ހިމެނޭ ޗެއާޕާސަން ނައިބު (އިދާރީ) އާއި ޗެއާޕާސަން ނައިބު (މާލީ)ގެ އިތުރުން ޗެއާޕާސަން ނައިބު (ސިޔާސީ) މަގާމު އިތުރުކުރުމަށް ހުށަހެޅުއްވުމަށް ފައްޔާޒް ވަނީ ނިންމަވައިފައެވެ.

އެމްޑީޕީގެ ގައުމީ މަޖިލީހަށް މެންބަރުން އިތުރުކުރުމަށް ހުށަހަޅުއްވާ އިސްލާހަކީ، މިހާރު ތިބޭ "ދާއިރާ ރައީސް"ގެ ބަދަލުގައި، ޕާޓީގެ މެންބަރުންގެ އަދަދަށް ބަލައިގެން ކޮންމެ ރަށަކުން ގައުމީ މަޖިލިސް މެންބަރު (މަންދޫބު) އިންތިހާބުކުރުމަށެވެ. އެއީ ފުރަތަމަ 100 މެންބަރުންނަށް އެއް މަންދޫބު، 500 މެންބަރުން ހަމަވާނަމަ ދެ މަންދޫބުން އަދި 1000 މެންބަރުން ހަމަވާނަމަ ތިން މަންދޫބުންނެވެ. ނަމަވެސް ތިން މަންދޫބުންނަށް އިތުރުނުކުރާ ގޮތަށް ވަނީ ލިމިޓްކޮށްފައެވެ. އަދި ގައުމީ މަޖިލިސް އެކުލެވިގެންވާ ގޮތުގެ ތަފްސީލު ވެސް ފައްޔާޒްގެ އިސްލާހުގައި ވަނީ ހިމަނުއްވައިފައެވެ.

އެމްޑީޕީގެ ރިޔާސީ ކެންޑިޑޭޓު ތަބާވާން ޖެހޭ އުސޫލުތައް ކަނޑައެޅުމަށް ވެސް ފައްޔާޒްގެ އިސްލާހުތަކުގެ ތެރޭގައި ހިމެނެއެވެ. އެ އުސޫލުތަކަކީ؛

  • ރިޔާސީ ޕްރައިމަރީ ކާމިޔާބުކުރާ ފަރާތަށް، ގައުމީ އިންތިހާބު ކާމިޔާބުވެއްޖެނަމަ ސަރުކާރު އެކުލަވާލުމުގައާއި، މުހިންމު ސިޔާސަތުތައް ކަނޑައެޅުމާއި، ތަންފީޒުކުރުމަށް ގައުމީ މަޖިލީހުގެ ލަފައާއި މަޝްވަރާ ހޯދުމަށް އެއްބަސްވާ އެއްބަސްވުމެއްގައި ޕާޓީއާއެކު ސޮއިކުރުން ލާޒިމުވުން.
  • ޕާޓީ ދިވެހިރާއްޖޭގެ ވެރިކަމާ ހަވާލުވެ އޮންނައިރު ސަރުކާރުގެ މައިގަނޑު ސިޔާސަތުތައް އެކުލަވާލުމުގައި ރައީސުލްޖުމްހޫރިއްޔާ ޕާޓީއާއެކު އަބަދުވެސް މަޝްވަރާކުރަންވާން.
  • ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރަންވާނެ.
  • ރިޔާސީ ޕްރައިމަރީ ކާމިޔާބުކުރާ ފަރާތަކީ ގައުމީ މަޖިލީހުގެ މެންބަރެއް ކަމުގައިވާނަމަ، ޕާޓީއާއެކު ޕާޓީއާއެކު އެއްބަސްވުމުގައި ސޮއިކުރާ ދުވަހުން ފެށިގެން އެފަހަރުގެ ރިޔާސީ އިންތިހާބު ކާމިޔާބުކުރާ ފަރާތުން ރައީސުލްޖުމްހޫރިއްޔާގެ ހުވާކުރާ ދުވަހާ ހަމައަށް ގައުމީ މަޖިލީހުގެ މެންބަރެއްގެ ގޮތުގައި ހިމެނޭނެ.