ތިލަފުށި ޕޯޓް: ދޯނި ކާގޯ ކްލިއަރެންސް މަސައްކަތް އޮކްޓޫބަރުގައި ތިލަފުއްޓަށް ބަދަލުކުރަނީ

މާލެ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ މަޝްރޫއުގެ ދަށުން ކުރިއަށް ގެންދާ ޔާޑުގެ ޕޭވިންގެ މަސައްކަތްތައް އޮކްޓޫބަރު މަހު ނިމޭނެ ކަމަށާއި އެ މަސައްކަތް ނިމުމުން، މާލޭ ވިޔަފާރި ބަނދަރުގައި ކުރިއަށްދާ ދޯނި ކާގޯ ކްލިއަރެންސް މަސައްކަތްތައް ތިލަފުއްޓަށް ބަދަލުކުރެވޭނެ ކަމަށް އެމްޕީއެލުން ބުނެފިއެވެ.

ތިލަފުށި ޕޯޓް މަޝްރޫއާ ގުޅޭ އެންމެ ފަހުގެ މައުލޫމާތު ހިމަނައި އެމްޕީއެލުން ތައްޔާރުކޮށްފައިވާ ވީޑިއޯއަކާ އެކު އިކޮނޮމިކް މިނިސްޓަރު މުހައްމަދު ސައީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ ރާއްޖޭގެ ވިޔަފާރި އާއި އިގުތިސޯދީ ތަރައްގީއާ އެންމެ ބޮޑަށް ގުޅިފައިވާ އެއް މަޝްރޫއަކީ، މާލޭ ވިޔަފާރި ބަނދަރުގެ ހާލަތު ބަދަލުކޮށް، ޒަމާނީކޮށް، މިއަދުގެ އިގުތިސޯދީ ހަގީގަތްތަކާ ފައިހަމަކުރުމާއި ވިޔަފާރީގެ ކާރުބާރު ހަލުވިކޮށް ފަސޭހަކޮށްދިނުން ކަމަށެވެ.

މިކަމުގެ ހިޔާލު މީގެ އެތައް އަހަރުތަކެއް ކުރިން ކަމާބެހޭ އިދާރާތަކުން ކުރަމުން ދިޔަ ނަމަވެސް އެތައް ޒަމާނެއް ވެގެން ދިޔައިރުވެސް ރާއްޖޭގެ މައި ވިޔަފާރި ބަނދަރަށް ގެނެވިފައި ވަނީ ވަރަށް ކުދިކުދި ތަރައްގީ ކަމަށް ވެސް މިނިސްޓަރު ވިދާޅުވިއެވެ.

"މި ހާލަތު ބަދަލު ކުރެއްވުމަށް އިސް ނަންގަވައި، އެކަމުގެ އަމަލީ މަސައްކަތްޕުޅު ފައްޓަވައި، ގައުމުގައި ހުރި މި ނޫން މިފަދަ އެތައް ބޮޑެތި މައްސަލަތަކެއް ވެސް ހައްލުކުރައްވަމުން ރައީސް ޑރ. މުހައްމަދު މުއިއްޒު އެ ގެންދަވަނީ ހިކުމަތްތެރިކަމާ އެކު. ދުނިޔޭގެ މަސްރަހަށް އަންނަ އެކި ބަދަލުތަކާއި އިގުތިސޯދީ އެތައް ގޮންޖެހުމެއްގެ ތެރޭގައި، ގައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސް ޑރ. މުހައްމަދު މުއިއްޒު އެ ގެންދަވަނީ ހިތްވަރާއެކު ސާބިތުކޮށްދެއްވަމުން،" މިނިސްޓަރު ވިދާޅުވިއެވެ.

މިނިސްޓަރު އިތުރަށް ވިދާޅުވީ ވެރިއެއްގެ ޒިންމާއަކީ ހުރަސްތަކާއި އުނދަގޫތަކާ ކުރިމަތިލައްވައި، އިހުލާސްތެރި މަސައްކަތެއް ކޮށްދެއްވައި، އެ ހާލަތުން ގައުމު މިންޖުކޮށްދެއްވުން ކަމަށާއި އެކަން ރައީސް މުއިއްޒު އެ ގެންދަވަނީ ކަށަވަރުކޮށްދެއްވަމުން ކަމަށެވެ.

މިނިސްޓަރު ހިއްސާ ކުރެއްވި ވީޑިއޯގައި އެމްޕީއެލުން ބުނީ މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއުގެ ދަށުން، އެމްޓީސީސީއާ ހަވާލުކުރެވުނު 100 މީޓަރުގެ ކީވޯލްގެ މަސައްކަތް މިހާރު ފުރިހަމަކޮށްފައިވާ ކަމަށެވެ. މިހާރު ކުރިއަށްދަނީ ޔާޑުގެ ޕޭވިން މަސައްކަތްތައް ކަމަށާއި މި މަސައްކަތްތައް އޮކްޓޯބަރު މަހުގެ ކުރީކޮޅު ނިމޭނެ ކަމަށް ލަފާ ކުރެވޭ ކަމަށެވެ.

"މި ސަރަހައްދު ތަރައްގީ ކުރަނީ ޑޮމެސްޓިކް އޮޕަރޭޝަންތަކަށް ކަމަށްވާ އިރު، މަސައްކަތް ނިމުމުން މާލޭ ވިޔަފާރި ބަނދަރުގައި ކުރިއަށްދާ ދޯނިކާގޯ ކްލިއަރެންސް މަސައްކަތްތައް ތިލަފުއްޓަށް ބަދަލުކުރެވިގެންދާނެ،" އެމްޕީއެލުން ބުންޏެވެ.

މީގެއިތުރުން އެ ސަރަހައްދުގައި ވަގުތީ ވޯކްޝޮޕާއި ކެންޓީނާއި އޮފީސް އަދި މަޖޫރީންގެ ވެއިޓިން އޭރިއާ އާއި މިސްކިތް ހެދުމުގެ މަސައްކަތް އެމްޕީއެލުން އަންނަނީ ކުރަމުންނެވެ.

އެމްޕީއެލުން ބުނީ ތިލަފުށީގައި ތަރައްގީކުރާ ބައިނަލްއަގުވާމީ ބަނދަރުގެ 375 މީޓަރުގެ ކީވޯލާއި ދެ ކިލޯމީޓަރުގެ ޑޮމެސްޓިކް ކީގެ ބައެއް މަސައްކަތްތައް ހަވާލުކޮށްފައިވާ ޗައިނާގެ ހާބާ އިންޖިނިއަރިން އިން އެ މަސައްކަތްތައް ބާރު ސްޕީޑުގައި ކުރިއަށް ގެންދާ ކަމަށެވެ. އަދި 820 މީޓަރުގެ ޑޮމެސްޓިކް ކީއަށް ބޭނުންވާ ބިން ހިއްކުމުގެ 40 އިންސައްތަ މަސައްކަތް މިހާރު ނިމިފައިވާ ކަމަށާއި ކީވޯލްގެ ޕްރީކާސްޓް ޔުނިޓްތައް ހެދުމުގެ މަސައްކަތް އޮކްޓޯބަރު މަހު ފެށުމަށް ހަމަޖެހިފައިވާ ކަމަށް ވެސް ބުންޏެވެ.

ބަނދަރުގެ އޮޕަރޭޝަންތަކަށް ބޭނުންވާ ދެ އެސްޓީއެސް ކްރޭނާއި އެއް މޯބައިލް ހާބާ ކްރޭން ހޯދުމުގެ މަސައްކަތް ކުރަމުން އަންނަ ކަމަށާއި އަމާޒަކީ 2027 ވަނަ އަހަރުގެ އޮކްޓޫބަރު 15 ގެ ކުރިން މި ތަކެތި ރާއްޖެ ގެނައުން ކަމަށެވެ. އަދި ތާވަލުކުރެވިފައިވާ ގޮތުން ޑޮމެސްޓިކް ކީގެ މަސައްކަތް 2026 ވަނަ އަހަރުގެ ނޮވެމްބަރު މަހަށް ނިމޭނެ ކަމަށާއި އިންޓަނޭޝަނަލް ކީގެ މަސައްކަތްތައް 2027 ވަނަ އަހަރުގެ ޖުލައި މަހުގެ ތެރޭގައި ނިމޭނެ ކަމަށް ވެސް އެމްޕީއެލުން ބުންޏެވެ.

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ މާލޭގެ ބަނދަރަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ މުހިންމު މަޝްރޫއެކެވެ. އެންމެ ފަހުގެ ޓެކްނޮލޮޖީއާއި ވަސީލަތްތަކާއެކު ތަރައްގީކުރެވޭ މި ބަނދަރަކީ ރައީސް ޑރ. މުހައްމަދު މުއިއްޒުގެ އިގުތިސާދީ ވައުދުފުޅެކެވެ.

މި ބަނދަރު ތަރައްގީވެގެންދާނީ ވިޔަފާރިވެރިންނާއި އެމްޕީއެލްގެ ހިދުމަތް ހޯދާ ފަރާތްތަކަށް 24 ގަޑިއިރު ހިދުމަތް ދެވޭނެ ފުރިހަމަ ނިޒާމެއް ގާއިމުވެފައިވާ ތަނަކަށް ކަމަށް އެމްޕީއެލުން ބުނެއެވެ. އަންނަ އަހަރުގެ ނޮވެމްބަރު މަހުގެ 11 ވަނަ ދުވަހު ހުޅުވުމަށް އަމާޒު ހިފާފައިވާ މި ބަނދަރަކީ، ޒަމާނީ ވަސީލަތްތަކާއެކު "ސްޓޭޓް އޮފް ދި އާޓް" މާސްޓާ ބަނދަރެއްގެ ގޮތުގައި ތަރައްގީކުރެވޭ ތަނެއް ކަމަށް އެމްޕީއެލުން ބުނެއެވެ.